ގޭންގް ކުށްތަކާއި ނުރައްކާތެރި ކުށްތަކުގެ އާ ގާނޫނުގެ ދަށުން ބަޔަކު ހައްޔަރުކޮށްފި

ގޭންގް ކުށްތަކާއި ނުރައްކާތެރި ކުށްތަކާ ދެކޮޅަށް ހަރުކަށި ފިޔަވަޅު އެޅުމަށް މިދިޔަ އޮގަސްޓް މަހު އަމަލުކުރަން ފެށި އާ ގާނޫނުގެ ދަށުން، ތޫނު ހަތިޔާރު ގެންގުޅުމުގެ ތުހުމަތުގައި ތިން މީހަކު ހައްޔަރުކޮށްފިއެވެ.

ކްރިމިނަލް ކޯޓުން އިއްޔެ ނެރުނު އަމުރުގައިވާ ގޮތުން، މާލެއިން ހައްޔަރުކުރެވުނު މި ތިން މީހުން ހައްޔަރުކުރެވިފައިވަނީ ދެ ވަޅި ގެންގުޅުމުގެ ތުހުމަތުގައެވެ.

މިދިޔަ އޮގަސްޓް މަހު އަމަލުކުރަން ފެށި ގޭންގް ކުށްތަކާއި ނުރައްކާތެރި ކުށްތައް ހުއްޓުވުމުގެ ގާނޫނުގެ ދަށުން ހައްޔަރުކުރި އެ ތިން މީހުންގެ ތެރެއިން އެކަކުގެ ބަންދަށް 30 ދުވަސް އަދި ދެން ތިބި ދެ މީހުން 15 ދުވަހަށް ބަންދުކުރަން ކޯޓުން ވަނީ އަމުރުކޮށްފަ އެވެ.

އެހެން ނަމަވެސް އެ ތިން މީހުން ހައްޔަރު ކުރުމާ ގުޅޭ ތަފްސީލުތައް ފުލުހުން އަދި ހާމައެއް ނުުކުރެ އެވެ.

ކުރިން އަމަލުކުރަމުން އައި ގޭންގް ކުށްތަކާ ބެހޭ ގާނޫނުގައި ހުރި ގާނޫނީ ހުރަސްތަކާ ހެދި އެ ގާނޫނު އުވާލުމަށްފަހު، އަލަށް އެކުލަވާލެވުނު ގާނޫނުގައި ގޭންގްތަކާއި ގޭންގްތަކުން ހިންގާ ކުށްތަކަށް ކުރިއަށްވުރެ ހަރުކަށި އަދަބުތައް ކަނޑައަޅާފައިވެއެވެ.

މީގެ އިތުރުން، އެހެނިހެން ނުރައްކާތެރި ކުށްތަކަށްވެސް ހަރުކަށި ފިޔަވަޅުތައް އެޅޭނެ ގޮތްތައް މި ގާނޫނުގައި ހިމަނާފައިވެއެވެ.

މި އާ ގާނޫނަކީ މުޖުތަމައުގެ ރައްކާތެރިކަމަށް އިތުރު ބާރެއް ލިބިގެންދާނެ ގާނޫނެއްގެ ގޮތުގައި ސަރުކާރުން ފާހަގަކުރާއިރު، ގޭންގް ކުށްތަކާއި މަގުމަތީގެ ކުށްތައް މަދުކުރުމަށް މި ގާނޫނުން އެހީތެރިވެދޭނެ ކަމަށް އުއްމީދުކުރެވެއެވެ.