ޝަރުއީ ދާއިރާގައި މަސައްކަތްކުރާ މުވައްޒަފުން މޫނު ބުރުގާ އެޅުން ޑީޖޭއޭއިން ހުއްދަ ކޮށްފި
މަސައްކަތުގެ މާހައުލުގައި އެ މުވައްޒަފަކީ ކާކުކަން ކަށަވަރު ކުރަން ބޭނުންވެއްޖެނަމަ ހާލަތެއްގައި އަންހެން މުވައްޒަފަކަށް މޫނު ދައްކަންޖެހޭ
މޫނު ބުރުގާ އަޅައިގެން ތިބި ބައެއް | ޓްވިޓަރ
ޝަރުއީ ދާއިރާގައި މަސައްކަތްކުރާ މުވައްޒަފުން މޫނު ބުރުގާ އެޅުން ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)އިން ހުއްދަ ކޮށްފިއެވެ.
އާދިއްތަ ދުވަހު ނެރުނު ސަރކިއުލަރއެއްގައި ޑީޖީއޭއިން ބުނީ، ޝަރުއީ ދާއިރާގެ މުވައްޒަފުން ގަވާއިދު 2011 ގެ 129 ވަނަ މާއްދާ އިސްލާހުކޮށް އަލުން އެކުލަވާލާފައިވާ ކަމަށެވެ.
މި މާއްދާއަށް އިސްލާހު ގެނައުމުގެ ކުރިން ބުނެފައިވަނީ، ޝަރުއީ ދާއިރާގެ ކޮންމެ ޚިދުމަތަކީ ވެސް ޒިންމާދާރު ކަމާއެކު، ދޭންޖެހޭ އަދި ޖަވާބުދާރީވާންޖެހޭ ޚިދުމަތަކަށްވެފައި، ޚިދުމަތް ލިބިގަންނަން އަންނަ ފަރާތްތަކާ މުއާމަލާތް ކުރާ ފަރާތްތަކަށް އެ މީހަކު ފަހަގަކޮށް އެނގެން ޖެހޭނެތީ މުވައްޒަފުން މަސައްކަތު ގަޑީގައި ހެދުން އަޅާފައި ހުންނަންވާނީ ކާކުކަން ރަނގަޅަށް އެނގޭފަދަ ގޮތެއްގައެވެ.
ނަމަވެސް އެ މާއްދާ އަށް މިހާރު ގެނެސްފައިވާ އިސްލާހުގައި ބުނެފައިވަނީ، ޝަރުއީ ދާއިރާގައި މަސައްކަތް ކުރާ އަންހެން މުވައްޒަފުން މޫނު ބުރުގާ (ލޯ ނުފޮރުވޭ ގޮތަށް) އެޅުން މި މާއްދާގެ (ހ) އިން ހުރަހެއް ނާޅާ ކަމަށެވެ. ނަމަވެސް މަސައްކަތުގެ މާހައުލުގައި އުޅޭ އުޅުމުގެ ތެރެއިން މިފަދައިން ހެދުން އަޅާ މުވައްޒަފަކީ ކާކުކަން ކަށަވަރު ކުރަން ބޭނުންވެއްޖެނަމަ އެފަދަ މުވައްޒަފެއްގެ މޫނު ކޯޓު ނުވަތަ އިދާރާގެ ކަމާބެހޭ އަންހެން މުވައްޒަފަކަށް ދައްކަން ވާނެ ކަމަށެވެ.
ޑީޖޭއޭއިން ވަނީ، އިސްލާހާ އެއްގޮތަށް އާދިއްތަ ދުވަހުން ފެށިގެން ކޯޓުތަކާއި އިދާރާތަކުން އަމަލުކުރުމަށް އަންގާފައެވެ.
ރާއްޖޭގެ ބައެއް އޮފީސްތަކާއި، ސަރުކާރުގެ ބައެއް މިނިސްޓްރީތަކުގައި މޫނު ބުރުގާ އަޅައިގެން މަސައްކަތް ކުރުމަށް ދަތިތައް ކުރިމަތިވެއެވެ. ނަމަވެސް މިއުސޫލު ބަދަލުކޮށް، ގަވާއިދުތައް ބައެއް އިދާރާތަކުން ދަނީ އާއްމު ކުރަމުންނެވެ.
