މުސާރަ މައްސަލާގައި ކަންބޮޑުވުން ފާޅު ކުރާ މުވައްޒަފުންނަށް ޗީފް ޖުޑީޝަލް އެޑްމިނިސްޓްރޭޓަރ އަމްޖަދު ނުފޫޒު ފޯރުވައި ބިރު ދައްކަމުންދާ ކަމުގެ ތުހުމަތު

ޝަރުއީ ދާއިރާގެ މުސާރަ މައްސަލާގައި ކަންބޮޑުވުން ފާޅު ކުރާ މުވައްޒަފުންނަށް ޗީފް ޖުޑީޝަލް އެޑްމިނިސްޓްރޭޓަރ އަލްއުސްތާޛު އަމްޖަދު މުސްތަފާ ނުފޫޒު ފޯރުވައި ބިރު ދައްކަމުންދާ ކަމަށް ތުހުމަތުކޮށްފި އެވެ.

އިތުބާރުހުރި ފަރާތަކުން ރާއްޖެއެމްވީއަށް ވިދާޅުވީ، މި ސަރުކާރުން މުސާރައިގެ އޮނިގަނޑަށް ގެނައި ބަދަލާއެކު، އިދާރީ މުވައްޒަފުންނާއި ލީގަލް އޮފިސަރުންގެ ގެ މުސާރަ ވަރަށް ބޮޑަށް ކުޑަ ވެފައިވާ ކަމަށެވެ.

އެ ކަންބޮޑުވުންތައް ހިއްސާ ކުރަމުންދާތީ އެކަން ކޮންޓްރޯލް ކުރުމަށް އަމްޖަދު އިސްވެ ހުންނަވާ ވަރަށް ބޮޑަށް ނުފޫޒު ފޯރުވަމުންދާ ކަމަށާއި، އޭނާގެ ޓީމުން ވެސް އެ ގޮތަށް މަސައްކަތް ކުރާ ކަމަށް އޭނާ ވިދާޅުވި އެވެ. އަދި ވިދާޅުވީ އަމްޖަދަކީ ރައީސް ޑރ.މުހައްމަދު މުއިއްޒުގެ އަރިސް ބޭފުޅެއް ކަމަށް ވިދާޅުވެ، މުވައްޒަފުންނަށް ބިރު ދައްކަމުންދާ ކަމަށާއި، މުސާރައިގެ ޝަކުވާ ނުކުރަން އަންގައިވާ ކަމަށެވެ.

މުވައްޒަފުންގެ ހައްގުގައި އިސްކޮށް ތެދުވި ފަރާތްތަކަށް ނުފޫޒު ފޯރުވަން މަސައްކަތް ކުރިކަން ފާހަގަކުރައްވައި އޭނާ ވިދާޅުވީ އޭގެތެރެއިން ބައެއް މުވައްޒަފުންނަށް ރަގަޅު އޮފަރތަކެއް ހުށަހެޅި ކަމަށާއި، މާލޭ ކޯޓްތަކުގެ ރަނގަޅު މަގާމުތައް ހުށަހެޅި ކަމަށެވެ. ޗީފް އެޑްމިނިސްޓްރޭޓަރުންނަށް ވެސް އެ ބޭފުޅުންގެ ބެލުމުގެ ދަށުގައި ތިބޭ މުވައްޒަފުން ކޮންޓްރޯލް ކުރުމަށް އަންގާފައިވާ ކަމަށް ވެސް ވިދާޅުވި އެވެ.

މީގެ އިތުރުން މުސާރާގެ މައްސަލާގައި ޕެޓިޝަން ހުށަހެޅުމަށް ތައްޔާރުވަމުން ދިޔައިރު، އެކަން ހުއްޓުވުމުގެ ގޮތުން ކޯޓްތަކުގެ އިދާރީ މުވައްޒަފުންނަށް މުސާރަ ލިބޭވަރު ކަމަށް ބަޔާކޮށްފައިވާ އެކްސެލް ޝީޓެއް ކޯޓްތަކަށް ފޮނުވި ކަމަށާއި، މި ޝީޓްތަކުގައިވާ މުސާރައިގެ އަދަދު މުވައްޒަފުންނާއި ހިއްސާކުރުމަށް އެންގި ކަމަށެވެ. ނަމަވެސް އެ ޝީޓުން މުވައްޒަފުންނަށް މުސާރައިގައި ވާނުވާ ނޭނގޭ ކަމަށް އޭނާ ވިދާޅުވި އެވެ. މުސާރަ ކުޑަވި ނަމަވެސް އެއީ ބޮޑު މުސާރައެއް ކަމަށާއި، އެކަން އޮޅުވާލުމަށް ވަރަށް މަސައްކަތް ކުރާ ކަމަށް ވެސް ވިދާޅުވި އެވެ.

ޗީފް ޖުޑީޝަލް އެޑްމިނިސްޓްރޭޓަރ އަމްޖަދު މުވައްޒަފުންނަށް ނުފޫޒު ފޯރުވަމުންދާ ކަމަށް ކުރި ތުހުމަތާ ގުޅިގެން އޭނާގެ ބަހެއް ހޯދުމަށް ރާއްޖެއެމްވީން ގުޅައި މެސެޖް ކުރި ނަމަވެސް ޖަވާބެއް ދެއްވާފައިނުވެ އެވެ.

ރައީސް ޑރ.މުހައްމަދު މުއިއްޒުގެ ސަރުކާރުން ބޮޑު ކުރި މުސާރައާއެކު ޝަރުއީ ދާއިރާގައި މަސައްކަތް ކުރާ އިދާރީ ގިނަ މުވައްޒަފުންގެ މުސާރަ ވަނީ ވަރަށް ބޮޑަށް ކުޑަ ވެފަ އެވެ. ޝަރުއީ ދާއިރާގެ މުސާރައިގެ އޮނިގަނޑަށް ގެނައި ބަދަލާއި ގުޅިގެން ހުރި ކަންބޮޑުވުންތައް އިތުރުވެ، 600 އަށް ވުރެ ގިނަ މުވައްޒަފުންގެ ސޮޔާއި އެކު ޕެޓިޝަން އެއް ހުށަހަޅާފަވެ އެވެ. އަދި 24 ނޮވެންބަރު ގައި މުވައްޒަފުން އޮފީހަށް ވެސް ނުކުމެވެފައިވަނީ ކަޅު ހެދުމުގަ އެވެ. މީގެ އިތުރުން ލީގަލް އޮފިސަރުން ވެސް 81 މުވައްޒަފުންގެ ސޮޔާއެކު ޕެޓިޝަނެއް ހުށަހަޅާފައިވެ އެވެ. ލީގަލް އޮފިސަރުން މީގެ ކުރިން ގެއަށް ގެންދިއުމަށް ލިބޭ މުސާރަ އިން ގާތްގަނޑަކަށް 7000 ރުފިޔާ އާއި 5000 ރުފިޔާ މަދުވެފައިވާ ކަމަށް އެ އޮފިސަރުން ބުނެ އެވެ.