ބްރޯޑްކާސްޓިން ކޮމިޝަން (ބްރޯޑްކޮމް)ގެ އެންމެ ބޮޑު ޒިންމާއަކީ މީޑިއާތައް މޮނިޓަރ ކުރުން ކަމަށާއި، ނަމަވެސް އެއްވެސް ވަސީލަތެއް ނެތް ކަމަށް އެކޮމިޝަންގެ ރައީސްގެ ރައީސް ސަފާ ޝަފީގު ވިދާޅުވެއްޖެއެވެ.

އާދިއްތަ ދުވަހު ކުރިއަށް ގެންދިޔަ މިނިވަން މުއައްސަސާތަކާ ބެހޭ ކޮމެޓީގައި ބްރޯޑްކޮމްގެ ރައީސް ސަފާ ވަނީ މިހާރު ހުށަހަޅާފައިވާ މީޑިއާ ކޮންޓްރޯލް ކުރާ ބިލާ ގުޅިގެންހުރި ކަންބޮޑުވުންތަކާއި، ބްރޯޑްކޮމްގެ މަސައްކަތްތައް ކުރުމަށް ކުރި ގޮންޖެހުންތައް ހިއްސާ ކުރައްވާފައެވެ.

ސަފާ ވިދާޅުވީ، ހަމައެކަނި ކޮމިޝަންގެ މަސައްކަތްތަކަށް ބަލާއިރު، އެންމެ ބޮޑު ޒިންމާއަކީ މީޑިއާތައް މޮނީޓަރ ކުރުން ކަމަށާއި، ނަމަވެސް މަސައްކަތް އޮތީ ސުމެއްގައި ކަމަށެވެ. މިމަސައްކަތް ނުކުރެވޭތީ ފާއިތުވި ދެ އަހަރު ވެސް މިމައްސަލަ ސަމާލު ކަމަށް ގެނެސް މިވާހަކަތައް ހިއްސާކޮށްފައިވާ ކަމަށް އޭނާ ވިދާޅުވިއެވެ.

މިހާރު ހުށަހަޅާފައިވާ މީޑިއާ ކޮންޓްރޯލް ކުރާ ބިލަށް އިޝާރާތް ކުރައްވައި ސަފާ ވިދާޅުވީ މިބިލުގެ ކަންކަން ތަންފީޒު ކުރެވޭނެ ކަމާމެދު ސުވާލު އުފެދޭ ކަމަށެވެ. އަދި ބްރޯޑްކޮމްއަށް ވެސް މުވައްޒަފުން ނުލިބޭއިރު، މިބިލުގައިވާ ކަންކަން ތަންފީޒު ކުރުމަށް ޒިންމާދާރު މީހުންނާއި، ފެސިލިޓީ ލިބޭނެ ކަމާމެދު ވެސް ސުވާލު އުފެއްދެވިއެވެ.

މީގެ އިތުރުން ސަފާ ވިދާޅުވީ މީޑީއާ ރެގިއުލޭޓް ކުރުމަށް ހުށަހަޅާ ބިލާއެކު، ވަރަށް ގިނަ ގަވާއިދުތަކާއި، އުސޫލުތައް ހަދަންޖެހޭ ކަމަށެވެ. އެއީ ދެދުވަހުން ނުވަތަ ދެތިން މަހުން ކުރެވޭނެ ކަމެއް ނޫން ކަމަށް އޭނާ ވިދާޅުވިއެވެ. ވަރަށް ގިނަ މީޑިއާތައް އެއްކޮށްލައި، ރެގިއުލޭޓް ކުރުމަށް މަސައްކަތް ކުރާއިރު، އެކަށީގެންވާ ވަގުތު ދޭންޖެހޭ ކަމަށް ސަފާ ވިދާޅުވިއެވެ.

މިނިވަން މުއައްސަސާއާ ބެހޭ ކޮމެޓީގައި ބްރޯޑްކޮމްގެ ހުރިހާ މެންބަރުން ވެސް ވަނީ މީޑިއާ ރަނގަޅު ގޮތުގައި ރެގިއުލޭޓް ކުރުމަށް ކުރެވޭނެ ގިނަ ކަންކަން ފާހަގަކުރައްވާފައެވެ. އަދި މިހާރު ދިމާވާ ގޮންޖެހުންތައް ވެސް ހިއްސާކޮށް، ކަންބޮޑުވުން ފާޅު ކުރައްވާފައިވެއެވެ.

ބްރޯޑްކޮމްގެ މެންބަރުން ގިނަ ކަންތައްތަކެއް ފާހަގަކުރެއްވި ނަމަވެސް، ކޮމިޓީގެ އެއްވެސް މެންބަރަކު ކޮމިޝަނުގެ މެންބަރުންނާ ސުވާލެއް ނުކުރައްވާ ކޮމިޓީގެ ބައްދަލުވުން ވަނީ ނިންމާލައިފައެވެ.