ފަލަސްތީން ރައްޔިތުން އދ. ގައި ތަމްސީލު ކުރުމަށް ފަލަސްތީނުު ސަރުކާރުގެ ގެ މަންދޫބުން އދ. ގެ ޖެނެރަލް އެސެމްބްލީ އަށް ދިއުމަށް އެމެރިކާ އިން ހުރަސް އަޅައިފިއެވެ.

ޕެލަސްޓީނިއަން އޮތޯރިޓީ (ޕީއޭ) އިން ވަނީ އދ. ގެ އާންމު މަޖިލީހުގައި ބައިވެރިވުމަށް ފަލަސްޠީން ލިބަރޭޝަން އޯގަނައިޒޭޝަން (ޕީއެލްއޯ) އަދި ޕީއޭގެ މެންބަރުންނަށް ވީސާ ދިނުމަށް އެމެރިކާއިން އިންކާރުކޮށް، ވީސާ ބާތިލުކުރަން ނިންމި ނިންމުން ހަރުކަށި އިބާރާތުން ކުށްވެރިކޮށް، މިއީ 1947 ގެ އދ. ގެ ހެޑްކުއާޓަރސް އެއްބަސްވުމާ ޚިލާފު ކަމެއްކަމަށް ބުނެފައެވެ.

"އަޅުގަނޑުމެން މި ނިންމުމާމެދު ވަރަށް ބޮޑަށް ކަންބޮޑުވުން ފާޅުކުރަމެވެ. އަދި މިއީ އދ. ގެ މެންބަރު ޤައުމުތަކުގެ މަންދޫބުން އެމެރިކާ އަށް އެތެރެ ވުމާއި ރައްކާތެރިކަން ކަށަވަރުކޮށްދޭ 1947 ގެ ހެޑްކުއާޓަރސް އެއްބަސްވުމާ ސީދާ ޚިލާފު ކަމެއްކަމުގައި ދެކެމެވެ،" ފަލަސްޠީނުގެ ޚާރިޖީ ވަޒީރުގެ ސިޔާސީ މުޝީރު އަޙްމަދު އަލް-ދީކް ހުކުރު ދުވަހު ވިދާޅުވިއެވެ.

1947 ގައި އދ. އާއި އެމެރިކާ އާ ދެމެދު ސޮއިކުރެވުނު ހެޑްކުއާޓަރސް އެއްބަސްވުމުގެ ދަށުން، ސިޔާސީ ގުޅުންތަކަށް ބެލުމެއްނެތި، އދ. ގެ މެންބަރު ޤައުމުތަކުގެ މަންދޫބުންނާއި، މުވައްޒަފުންނާއި، ތަޖުރިބާކާރުން އެމެރިކާ އަށް އެތެރެވުން ވޮޝިންގްޓަން ޑީސީ އިން ކަށަވަރު ކޮށްދޭން ޖެހެއެވެ.

ފަލަސްތީނުން ވަނީ އދ. ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް އަށާއި މެންބަރު ޤައުމުތަކަށް މި މައްސަލަ ހައްލު ކޮށްދިނުމަށް ގޮވާލާފައެވެ.

އަޙްމަދު އަލް-ދީކް ވިދާޅުވީ ފަލަސްތީން ލީޑަރޝިޕުން އެކުވެރި ޤައުމުތަކާއެކު މަޝްވަރާކޮށް އެކަށީގެންވާ ޑިޕްލޮމެޓިކް ފިޔަވަޅުތައް ކަނޑައަޅާނެ ކަމަށެވެ.

ފަލަސްތީނުގެ އިސް އޮފިޝަލް އިތުރަށް ފާހަގަކުރެއްވީ އެމެރިކާގެ މި ނިންމުމުގެ ސަބަބުން ފަލަސްތީނު ދައުލަތް ބަލައިގަތުމުގެ ރާޅު ނުހުއްޓުވޭނެ ކަމަށެވެ.

މިއާއެކު، ފަލަސްތީނުން އެމެރިކާގެ ނިންމުމާމެދު ވަރަށް ބޮޑަށް ހިތާމަ ކުރާ ކަމަށާއި ކަންބޮޑުވާކަން ފާޅު ކޮށްފައިވެއެވެ.

ޕީއޭ އިން ނެރުނު ބަޔާނުގައި ފާހަގަކޮށްފައި ވަނީ ފަލަސްތީނަށް އދ. ގައި އޮބްޒާވަރ ސްޓޭޓަސް ލިބިފައިވާ ކަމަށާއި، އެމެރިކާގެ ސަރުކާރަށް އެ ނިންމުމާ މެދު އަލުން ވިސްނައި، ނިންމުން ބަދަލު ކުރުމަށް ގޮވާލާ ކަމަށެވެ.

ކުރިން ހުކުރު ދުވަހު، އެމެރިކާގެ ސްޓޭޓް ޑިޕާޓްމަންޓުން ބުނެފައި ވަނީ ޕީއެލްއޯ އަދި ޕީއޭގެ މެންބަރުންނަށް އެމެރިކާ އަށް ދަތުރު ކުރުމަށް ދޫކޮށްފައިވާ ވިސާ ބާތިލުކުރާ ކަމަށެވެ.

އެމެރިކާ އިން ރުޅި އައިސްފައި ވަނީ ފަލަސްތީން އޮތޯރިޓީ އިން އިސްރާއީލުން ހިފާފައިވާ ވެސްޓް ބޭންކުގައާއި ޣައްޒާގައި ހިންގާ ނަސްލު ނައްތާލުމުގެ ހަނގުރާމައިގައި ކުރާ ލާއިންސާނީ އަނިޔާތަކާ ގުޅިގެން އިންޓަނޭޝަނަލް ކްރިމިނަލް ކޯޓު (އައިސީސީ) އަދި އިންޓަނޭޝަނަލް ކޯޓު އޮފް ޖަސްޓިސް (އައިސީޖޭ) އަށް މައްސަލަ ހުށަހަޅައިގެން އުޅޭ ކަމަށް ބުނެއެވެ.

ފްރާންސް، އިނގިރޭސިވިލާތް، ކެނޭޑާ ފަދަ ގިނަ ހުޅަނގުގެ ޤައުމުތަކުން ވަނީ ކުރިއަށް އޮތް އދ. ގެ ބައްދަލުވުމުގައި ފަލަސްތީން ދައުލަތް ބަލައިގަންނާނެކަން އިޢުލާނު ކޮށްފައެވެ.