ފެނިގެންދަނީ މީގެ 20 އަހަރު ކުރިން ދިވެހީން ކަށަވަރު ކުރި ހައްގުތައް މި ސަރުކާރުން ނިގުޅައިގަންނަމުންދާ މަންޒަރު ކަމަަށް ރައްޔިތުންގެ މަޖިލީހުގެ އުނގޫފާރު ދާއިރާގެ ކުރީގެ މެންބަރު މުޙައްމަދު ވަޙީދު (ވައްޑެ) ވިދާޅުވެއްޖެއެވެ. ހުކުރު ދުވަހުގެރޭ އެމްޑީޕީން ބޭއްވި ކަންމަތީ ޖަލްސާގައި ވާހަކަ ދައްކަވަމުން، އޭނާ ވަނީ މި ސަރުކާރުގެ ސިޔާސަތުތަކަށް ހަރުކަށި ފާޑުކިޔުންތަކެއް އަމާޒުކުރައްވާފައެވެ.

ވައްޑެ ފާހަގަކުރެއްވި ގޮތުގައި، މި ސަރުކާރުން ކުރާ ކޮންމެ ކަމަކީ ރައްޔިތުންނަށް ދަތިކުރުމަށް ކުރާ ކަމެކެވެ. އަދި މަޖިލީހަށް ހުށަހަޅާ ކޮންމެ ބިލަކުން ވެސް، އެމްޑީޕީން މީގެ 20 އަހަރު ކުރިން ވަކާލާތުކޮށްގެން ހޯދައިދިން ހައްގުތައް ނިގުޅައިގަންނަމުން ދާކަމަށް އޭނާ ވިދާޅުވިއެވެ. ޚާއްޞަކޮށް، އެއްވެއުޅުމުގެ މިނިވަންކަމުގެ ހައްގު ބޭނުންކުރުން އެއީ ކުށަކަށް ހަދައި، މީހުން ހައްޔަރުކުރި ސަރުކާރެއް މި ނޫނީ ނުދެކޭކަމަށެވެ.

ލާމަރުކަޒީ ނިޒާމަށް އަމާޒުކޮށް ވާހަކަ ދައްކަވަމުން ވައްޑެ ވިދާޅުވީ، އަތޮޅު ކައުންސިލްތައް އުވާލުމަށް މި ސަރުކާރުން ކުރަމުންދާ މަސައްކަތަކީ ކަންބޮޑުވާންޖެހޭ ކަމެއް ކަމަށެވެ. އޭނާ ވިދާޅުވި ގޮތުގައި، އަތޮޅު ކައުންސިލްތައް އުވާލުމަށްފަހު، އެ މަގާމުތަކަށް ސިޔާސީ ސްޓޭޓް މިނިސްޓަރުން އައްޔަންކުރުމަކީ މިސަރުކާރުގެ ނިންމުމެކެވެ. މީގެއިތުރުން، ކައުންސިލްތަކަށް ގާނޫނުން ލިބިދޭ ބާރުތަކާއި އާމްދަނީ އަތުލުމަށް ސަރުކާރުން މަސައްކަތްކުރަމުންދާކަން އޭނާ ފާހަގަކުރެއްވިއެވެ.

"ދަތުރެއް ފަށާއިރު އެ ދަތުރުގެ އަމާޒު އެނގެންޖެހޭނެ. އެކަމަކު މި ސަރުކާރުގެ އިސްވެރިންނަށް ވެސް ނޭނގޭ މި ސަރުކާރު ދަތުރުކުރާ މިސްރާބަކީ ކޮބައިކަން،" ވައްޑެ ވިދާޅުވިއެވެ. މި ހުރިހާ ސަބަބުތަކަށްޓަކައި، ރައީސް މުޙައްމަދު މުއިއްޒު މިހާރު ވެރިކަމުން ދުރުކުރަން ޖެހިފައިވާ ކަމަށް އޭނާ ވިދާޅުވިއެވެ.

ރައީސް މުއިއްޒަކީ ހުރިހާ ބާރެއް މުށުތެރެޔަށް ލައިގެން، ގޮށްމުށުގެ ވެރިކަން ހިންގަވަން ބޭނުންފުޅުވާ ވެރިޔެއްކަމަށް ގިނަ ބަޔަކު ތުހުމަތު ކުރެއެވެ.