އޮޅިވަޑައި ނުގަންނަވާ، ބާރުވެރި ކަމަކީ ވަގުތީ ކަމެއް!

އަޅުގަނޑުމެންގެ ރާއްޖޭގެ ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ އަމަލުތައް މިހާރު ހުންނަ ގޮތުން، އެމަނިކުފާނަށް ވެރިކަން ލިބިގެން އުޅެނީ އުމުރު ދުވަހަށްބާއޭ ހިތަށް އަރަ އެވެ. އެ ވަގުތެއްގައި ބޭނުންވި ކަމެއް، ހިތްޕުޅަށް އަރައި ވަޑައިގެންނެވި ކަމެއް އެ ކުރައްވަނީ، ފިކުރެއް ޚިޔާލެއް ނެތި އެވެ.

އެ ދުވަހެއްގައި، އެ ވަގުތެއްގައި ދައްކަވަން ބޭނުންވި ކޮންމެ ވާހަކައެއް ދައްކަވަމުން އެ ގެންދަވަނީ، މާޒީގައި ކަންތައްވެފައި ހުރި ގޮތަށް ބަލާލުމެއް ވެސް ނެތި އެވެ. ދުނިޔޭގެ ޙަޔާތުގައި މާޒީ އިން ޢިބުރަތް ޙާސިލު ކުރާށޭ ބުނެފައި އޮތަސް، އެކަން ކުރަނީ އަޅުގަނޑުމެން ނިކަމެތި ރައްޔިތުންނެވެ. ރައީސް މުޢިއްޒު ކަހަލަ، ނަމުގެ ކުރިއަށް ޑޮކްޓަރާއި، ދެން ވެސް ހުރި ލަޤަބުތައް ޖައްސަވައިގެން އުޅުއްވާ ބޭފުޅުން އެކަމާ މެދު ފިކުރު ނުކުރަނީ ބާ އެވެ؟

މީގެ ދޮޅު އަހަރެއް ކުރިން ރައީސް މުޢިއްޒު ވެރިކަމަށް ވަޑައިގެންނެވި ގޮތަށް، އެންމެ ފުރަތަމަ ވެސް ކުރެއްވި ކަމަކީ، ނިކަން ރީތިކޮށް އަތުރާލާފައި އޮތް މި ނިޒާމު ގަޑުބަޑު ކުރުމެވެ. ފެހި ޤާނޫނު އަސާސީގެ ދަށުން ތިން ބާރު ވަކިވެ، އެއް ބާރު އަނެއް ބާރަށް ފާރަވެރިވެވޭ ގޮތަށް އޮތް އޮތުން އޮޅާލެއްވީ އެވެ. ތިން ބާރުގެ ހުރިހާ ބާރެއް އަމިއްލަ އަތް ޕުޅަށް ނެންގެވީ، މިއީ އެމަނިކުފާނުގެ އަމިއްލަ މުދަލެއް ކަމަށް ދެކިގެންހެން ހީވާ ކަހަލަ އެވެ.

ރައްޔިތުންގެ މަޖިލީހުގެ މެމްބަރުންގެ ބާރުވެރިކަމާއި، އެ މެމްބަރުންގެ މަސްއޫލިއްޔަތު އޮޅާލައްވައި، އެއީ ރައީސް މުޢިއްޒު އަށް އަޅުދާސްތު ވެގެން ތިބޭ ބަޔަކަށް ހައްދަވައިފި އެވެ. އިމްތިޔާޒުތަކާއި، ބާރުތަކާއި، ޢިއްޒަތް ލިބިގެން ތިބި މެމްބަރުންނަކީ، ރައީސް މުޢިއްޒުގެ އަތްޕުޅުގައި އޮންނަ ރިމޯޓަކުން ކޮންޓްރޯލް ކުރާ ބަޔަކަށް ހައްދަވައިފި އެވެ. އެކަން ކުރީ ވެސް، ރައީސް މުޢިއްޒުގެ ވަފާތެރި ނޫނަސް، އިތުރު ގޮތެއް ނެތް މެމްބަރުން ބޭނުން ކޮށްގެންނެވެ.

އެއަށްފަހު ދެން ކުރެއްވި ކަމަކީ، މިނިވަން ޖުޑިޝަރީ ނުވަތަ ފަނޑިޔާރު ގެޔަށް ހަތަރެސް ފައި ބޭނުމެވެ. ދިވެހި ރާއްޖޭގެ ޝަރުއީ ނިޒާމުގައި ރައީސް މުޢިއްޒުގެ ފައިތައް ހިއްޕާލީ ބޯވާއެއް ހެންނެވެ. ފަނޑިޔާރުންނަށް ހިތު ހުރި ގޮތެއް ހައްދަވައި، މުޅި ނިޒާމުގައި ވަކި އަޅުވާލީ، ޖަންގަލީގައި ސިންގާއަކު ކަންބަޅިއެއް ގައިގައި ވަކި ހިއްޕާލާ ބީދައިންނެވެ. އެ ހުރިހާ ކަމެއް ކުރައްވައިގެން ރައީސް މުޢިއްޒު ހުންނެވީ، ބާރުވެރިކަމުގަ އެވެ.

އެވަރުން ވެސް ނުފުދުނެވެ. ހިތްޕުޅާ ވެސް ނުވި އެވެ. ރޭގަނޑު ނިދި ކުރެއްވޭ ގޮތެއް ވެސް ނުވި އެވެ. މިހާރު ދިމާ ކުރައްވައިގެން އެ އުޅުއްވަނީ މިނިވަން ނޫސްވެރިކަން ވެސް ނިގުޅައި ގަތުމަށެވެ. ސަރުކާރުން ހިންގާ ވައްކަންތަކާއި ކޮރަޕްޝަނާއި، ޤާނޫނު އަސާސީއާ ޚިލާފަށް ރައީސް މުޢިއްޒު އާއި ސަރުކާރުގެ ވެރިން ކުރައްވަމުން ގެންދަވާ ކަންކަމުގެ ވާހަކަ ދައްކައި، ލިޔެ ހަދައި ނޫސްވެރިންގެ އަނގަ ބަންދުކޮށް، ގަލަމުގައި ދޯރި ޖެއްސެވުމަށެވެ.

މިނިވަން މީޑިއާތައް ނައްތާލުމަށް ރައްޔިތުންގެ މަޖިލީހަށް ހުށަހަޅާފައި އޮތް ބިލަކީ، ސަރުކާރުން ބޭނުން ވެެގެން، ސީދާ ރައީސް މުޢިއްޒުގެ ވިސްނުންފުޅާއި، ޙިކުމަތުގެ ދަށުން ކޮށްގެން އުޅޭ ކަމެއްކަން ސާފުވީ ޤައުމީ ދުވަހު ރައީސް މުޢިއްޒު ދެއްކެވި ވާހަކަ އިންނެވެ. ކޯފާވެ ހުންނަވައި، އަޑަށް ބާރު ލައްވައި، ހަށިކޮޅުން ތުރު ތުރު ލައްވާފައި ނޫސްވެރިން އަދި ލިޔާ މީހުންނަށް ނިސްބަތްކޮށް ދެއްކެވި ވާހަކަ އިންނެވެ. އެއަށް އިތުރު ބާރުވެރި ކަމެއް ދެނީ ރައީސް މުޢިއްޒުގެ އޯޑަރަށް މަސައްކަތް ކުރަން ޖެހޭ މަޖިލިސް މެމްބަރުން ދައްކަވާ ވާހަކަ އެވެ.

ފަހަރުގައި ރައީސް މުޢިއްޒު އަށް ހީވެދާނެ އެވެ. ވެރިކަމަށް އާދެވިފައި މި ހުރީ އުމުރު ދުވަހަށެވެ. އެމަނިކުފާނު ބޭނުންވާހާ ގޮތަކަށް މި ޤައުމުގެ ކަންކަން ކުރިއަށް ގެންދެވިދާނެ ކަމަށެވެ. އެމަނިކުފާނު ޖައްސަވާ ބެރަކާއި، ކިޔުއްވާ ލަވަޔަކަށް ރައްޔިތުންނާއި ނޫސްވެރިން ނަށައި ފާނެ ކަަމަށެވެ. އެހެން ވެއްޖެ ނަމަ، އެއީ ވަރަށް ބޮޑު އޮޅުމެކެވެ. ކުށް ހީ އެކެވެ.

ރައީސް މުޢިއްޒު އެވެ. މާޒީ އަށް ބަައްލަވާށެވެ. ތާރީޚުގައި ކަންކަން ހިނގާފައިވާ ގޮތް ދަސް ކުރައްވާށެވެ. ތިޔަހެން ބާރުވެރިކަމާއި، އަނިޔާވެރިކަމާއި، މުށްބާރުކަން ދައްކަވައިގެން، ރައްޔިތުން އަޅުދާސް ކުރުމަށް މަސައްކަތް ކުރެއްވި ވެރިންނަށް، ލީޑަރުންނަށް އާޚިރުގައި ވީ ކިހިނެއް ހެއްޔެވެ؟ އެޑޮލްފް ހިޓްލަރު އަދި ރޮބާޓް މުގާބޭގެ މިސާލު ރައީސް މުޢިއްޒު އަށް އެނގެން ވާނެ އެވެ.

ރައީސް މުޢިއްޒު އެވެ. އޮޅިވަޑައި ނުގަންނަވާށެވެ. ބާރުވެރިކަން އަބަދަކު ނޯންނާނެ އެވެ. ތިޔަ ބާރުވެރިކަން ނިމިދާނެ ދުވަހެއް ވެސް އަންނާނެ އެވެ. ތާ އުމުރު ވެރިކަމުގައި ވެސް ނުހުންނެވޭނެ އެވެ. ހުރެވިދާނެ ކަމަށް ޤަބޫލު ކުރުމަކީ ވެސް މޮޔަ ކަމެކެެވެ. އެންމެނެއް ބިރެއް ވެސް ނުގަންނާނެ އެވެ. ޖެހިލުމެއް ވެސް ނުވާނެ އެވެ. ތިޔަ އުޅުއްވަނީ ކާކަށް ބާރުވެރިކަން ދައްކަން ހެއްޔެވެ؟

ރައީސް މުޢިއްޒު އެވެ. އެއްކަމެއް ނުކުރެއްވި ނަމަވެސް، މި ބުނާ ބަސް ހަނދާން ކުރައްޗެވެ. އަތް ވެއްޓޭނީ ކަކޫ މައްޗަށެވެ.