ޖޯޖިއާގައި މިހާރު ކުރިއަށް ދިޔަ، ބަޓޫމީ ކަޕް - ޔޫތު އިންޓަރނޭޝަނަލް ބެޑްމިންޓަން މުބާރާތުގައި ވާދަކޮށް ރާއްޖޭގެ ޒުވާން ބެޑްމިންޓަން ކުޅުންތެރިޔާ ލައިބާ އަޙުމަދު މަޚްލޫފް (އެލީ) މުބާރާތުން ތިން މެޑަލް ހޯދައިފި އެވެ.

ޖޯޖިއާގެ ބަޓޫމީ ސިޓީގައި މި މުބާރާތް ކުރިއަށް ގެންގޮސްފައި ވަނީ ހުކުރު ދުވަހުން ފެށިގެން އާދީއްތަ ދުވަހުގެ ނިޔަލަށެވެ. މި މުބާރާތުގައި ލައިބާ ވަނީ ސިންގަލްސް އިވެންޓުގެ އިތުރުން، ޑަބަލްސް އަދި މިކްސް ޑަބަލްސް އިވެންޓުގައި ވާދަކޮށްފަ އެވެ.

ލައިބާ ވަނީ މުބާރާތުގެ ޑަބަލްސް އިވެންޓުގެ ރިހި މެޑަލް ހޯދައިފަ އެވެ. މީގެ އިތުރުން ސިންގަލްސް އަދި މިކްސް ޑަބަލްސް އިވެންޓުގައި ލައިބާ ވަނީ ލޯ މެޑަލް ހޯދައިފަ އެވެ. މުބާރާތުން ތިން މެޑަލް ހޯދިއިރު، ލައިބާ ވަނީ ރަނގަޅު ވާދައެއް ކޮށްފަ އެވެ.

ސިންގަލްސް އިވެންޓުގެ ކުއާޓާ ފައިނަލްގައި ވާދަކޮށް ލައިބާ ވަނީ، އަޒަރުބައިޖާންގެ 13 އަހަރުން ދަށުގެ ރޭންކިންގެ އެއް ވަނަ ކުޅުންތެރިޔާ އަޙުމަދްލީ ޑަނީޒްގެ މައްޗަށް ކުރި ހޯދައިފަ އެވެ. އެ މެޗު ލައިބާ ކާމިޔާބު ކޮށްފައި ވަނީ ސީދާ ދެ ސެޓުންނެވެ.

މި އިވެންޓުގެ ސެމީ ފައިނަލްގައި ލައިބާ ވާދަކޮށްފައި ވަނީ ކަޒަކިސްތާންގެ 13 އަހަރުން ދަށުގެ ރޭންކިންގެ އެއް ވަނަ ކުޅުންތެރިޔާ، ލެނޯވާ ސޯފިއާއާ އެވެ. މި މެޗުގައި ލައިބާ ވަނީ ސޯފިއާ އަތުން ސީދާ ދެ ސެޓުން ބަލިވެފަ އެވެ. މެޗުގެ ސެޓުތައް ސޯފިއާ ކާމިޔާބު ކޮށްފައި ވަނީ 15-10 އަދި 15-12 އިންނެވެ. މި މެޗުގައި ލައިބާ ވަނީ ރަނގަޅު ކުޅުމެއް ދައްކައިފަ އެވެ.

މުބާރާތުގެ މިކްސް ޑަބަލްސް އިވެންޓުގައި ލައިބާ އަދި ޕެއާ ޕާޓްނަރު އާމޭނިއާގެ މަނުކްޔަން ނާރެކް ވަނީ ސެމީ ފައިނަލްގައި ވާދަކޮށްފަ އެވެ. ނަމަވެސް ސެމީ ފައިނަލް މެޗުގައި ވަނީ ތުރުކީގެ ޕެއާ އަތުން ބަލިވެފަ އެވެ.

މީގެ އިތުރުން ޑަބަލްސް އިވެންޓުގައި ލައިބާ އަދި ޕެއާ ޕާޓްނަރު ޖޯޖިއާގެ ޝަޚްބަޒިއަން މަގްދާ ވަނީ ފައިނަލްގައި ބަލިވެފަ އެވެ. ކަޒަކިސްތާންގެ ޕެއާ އަތުން ބަލިވި ނަމަވެސް، ޑަބަލްސް އިވެންޓުގައި ވެސް ލައިބާގެ ޕެއާ އިން ވަނީ ރަނގަޅު ވާދައެއް ކޮށްފަ އެވެ.

ބައިނަލްއަޤުވާމީ ގިނަ މުބާރާތްތަކުގައި ވާދަކުރަމުން އަންނަ ލައިބާ ވަނީ މިހާތަނަށް ގިނަ ކާމިޔާބީތަކެއް ހޯދައިފަ އެވެ. އެގޮތުން މިއަހަރު އާމޭނިއާގައި ކުރިއަށް ދިޔަ މުބާރާތުގައި ވާދަކޮށް ލައިބާ ވަނީ ތިން ރަން މެޑަލް ހޯދައިފަ އެވެ. މިއީ ބެޑްމިންޓަންގައި ލައިބާ ހޯދި ތާރީޚީ ކާމިޔާބެކެވެ.

މިދިޔަ އަހަރު ވެސް ލައިބާ ވަނީ ބައިނަލްއަޤުވާމީ މުބާރާތްތަކުގައި ވާދަކޮށް ރަނގަޅު ކާމިޔާބީތަކެއް ހޯދައިފަ އެވެ. ޤައުމީ ފެންވަރުގައި ވެސް ލައިބާ ރަނގަޅު ކާމިޔާބީތަކެއް ހޯދާފައިވާއިރު، އެންމެ ފަހުން އޮތް ޤައުމީ ބެޑްމިންޓަން ޓީމަށް ކުޅުންތެރިން ހޮވުމުގެ ސެލެކްޝަންގައި ވާދަކޮށް، ލައިބާ ވަނީ އުމުރުން 12 އަހަރުގައި ޤައުމީ ޓީމުން ޖާގަ ހޯދައިފަ އެވެ.