ހދ. މަކުނުދޫ ނަރުދަމާގެ ނިޒާމް ހުރީ ނިމިފައި ކަމާއި މި ސަރުކާރަށް އޮތީ އެ މަޝްރޫޢުގެ ވެސް ރިބަންކެނޑުން އެކަނިކަން ހާމަވެއްޖެއެވެ.

މަކުނުދޫގައި ފެނާއި ނަރުދަމާ ޤާއިމުކުރުމުގެ މަސައްކަތް ފެށީ 2023 ވަނަ އަހަރުގެ ތެރޭގައެވެ. އެއީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައެވެ. ރާއްޖެއެމްވީ އަށް ދެއްވި ބަސްތީގަތުމެއްގައި ކައުންސިލް ރައީސް އައުޒަމް އާދަމް ވިދާޅުވީ އެތަން މިހާރު ހުރީ ހުޅުވަން ތައްޔާރުވެފައި ކަމަށެވެ.

"ހދ. މަކުނުދޫ ނަރުދަމާގެ ނިޒާމް ވަނީ ނިމި، ޓެސްޓްކުރުމުގެ މަރުހަލާވެސް ނިންމާފަ އޮތީ. އެ މަސައްކަތް ފެށީ ކުރީ ސަރުކާރުން. ދެން އޮތީ ކޮމިޝަންކުރުން." އޭނާ ވިދާޅުވިއެވެ.

މަކުނުދޫގައި ފެނާއި ނަރުދަމާ ޤާއިމުކުރުމުގެ މަސައްކަތުގެ ތެރެއިން ނަރުދަމާގެ 4 ޕަންޕު ސްޓޭޝަންވެސް ޤާއިމުކޮށްފައިވެއެވެ. މީގެ އިތުރުން، 15 ކިލޯމީޓަރަށް ވުރެ ދިގު ފެނާއި ނަރުދަމާގެ ނެޓްވަރކްތައް ވަނީ އަޅާފައެވެ.

މަކުނުދޫގައި ފެނާއި ނަރުދަމާ ޤާއިމުކުރުމުގެ މަސައްކަތް ހަވާލުކޮށްފައި ވަނީ އަލްޓެކް މޯލްޑިވްސް ޕްރައިވެޓް ލިމިޓެޑާއި ރަޝީދު ކާޕެންޓްރީ އެންޑް ކޮންސްޓްރަކްޝަން އާރުސީސީ ކުންފުނިންނެވެ. މި މަސައްކަތަށް 64 މިލިޔަން ރުފިޔާ ޚަރަދުކުރައްވައެވެ.

ފަހަކަށް އައިސް ރަށްރަށަށް ކުރައްވާ ދަތުރުފުޅުތަކުގައި ރައީސް ގެންދަވަނީ ކުރީ ސަރުކާރުން ނިންމާފައި ނުވަތަ ބޮޑު ބައި ނިންމާފައިވާ މަސައްކަތްތަކުގެ ރިބަން ކަނޑާ ދެއްވާ، އެ މަޝްރޫޢުތަކުގެ ކްރެޑިޓް ނެންގެވުމަށް މަސައްކަތްކުރަމުންނެވެ.