ނިޝާން ދިޔަމިގިލީގެ ޝަރަފުގެ ޢިއްޒަތް އުތީމު އާދަމްބެއަށް
24 އޯގަސްޓު 2025 | އާދީއްތަ 10:09އުތީމު އާދަމްބެ ހއ އަތޮޅުގެ އަތޮޅުވެރިކަން ތިން ފަހަރެއްގެ މަތިން 11 އަހަރަށްވުރެ ދިގު މުއްދަތަކަށް އަދާކުރެއްވި
ހއ. އުތީމު، އަލިމަސްގެ، އާދަމް އަބްދުއްރަހްމާން (އުތީމު އާދަމްބެ) އަށް ނިޝާން ދިޔަމިގިލި ޝަރަފުގެ އިއްޒަތް އަރުވަނީ
ދިވެހި ދައުލަތަށް 42 އަހަރަށްވުރެ ދިގު މުއްދަތެއްގައި އަގުހުރި ޚިދުމަތްތަކެއް ކޮށްދެއްވާފައިވާ ހއ. އުތީމު އަލިމަސްގެ، އާދަމް ޢަބްދުއްރަޙްމާނަށް ނިޝާން ދިޔަމިގިލީގެ ޝަރަފުގެ ޢިއްޒަތް (ނ.ދ.ޝ.ޢ.) ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އަރުވައިފިއެވެ.
މި ޢިއްޒަތް އެރުވީ، މި އަހަރުގެ ޤައުމީ ދުވަސް ފާހަގަކުރެއްވުމަށް ހއ. އުތީމުގައި މިއަދު ހެނދުނު ބޭއްވެވި ރަސްމީ ޖަލްސާގައެވެ.
މަޝްހޫރު ނަމުން "އުތީމު އާދަމްބެ" ގެ ގޮތުގައި ފާހަގަކުރެވޭ އާދަމް ޢަބްދުއްރަޙްމާނު ދައުލަތަށް ޚިދުމަތް ކުރައްވަން ފެއްޓެވީ 1965 ވަނަ އަހަރުގެ އޮގަސްޓު 26 ވަނަ ދުވަހު ހއ. އުތީމު ކަތީބުކަމުގެ މަގާމުންނެވެ. 15 އަހަރަށްވުރެ ދިގު މުއްދަތަކަށް ކަތީބުކަމުގެ މަޤާމު އަދާކުރެއްވުމަށްފަހު، ހއ. އަތޮޅު އަތޮޅުވެރިޔާގެ އެހީތެރިޔާގެ މަގާމަށް ބަދަލުވެވަޑައިގަތެވެ.
އާދަމް ޢަބްދުއްރަޙްމާނުގެ ޚިދުމަތުގެ ތެރޭގައި އެންމެ ފާހަގަކޮށްލެވޭ އެއް ކަމަކީ 1970 ގެ އަހަރުތަކުގައި ރާއްޖޭގެ އަތޮޅުތަކަށް ދިމާވި ކާޑުގެ ދަތިކަން ހައްލުކުރުމަށް އެޅުއްވި ފިޔަވަޅުތަކެވެ. އޭނާގެ ހަރުދަނާ މަސައްކަތްޕުޅުގެ ސަބަބުން އުތީމުން އެއްވެސް މީހަކު ބަނޑަށް މަރުނުވެ ސަލާމަތްވިކަން ޚާއްޞަ ގޮތެއްގައި ފާހަގަކުރެވެއެވެ.
ރާއްޖެތެރެ ތަރައްޤީކުރުމުގެ މަޝްރޫޢުތަކުގައި އާދަމް ޢަބްދުއްރަޙްމާނުގެ އެންމެ ބޮޑު އެއް ހިއްސާއަކީ ކޮންޓްރެކްޓް އުސޫލުން މަސައްކަތްކުރުމުގެ ނިޒާމު ތަޢާރަފުކުރެއްވުމެވެ. މި ބަދަލާއެކު، ތަރައްޤީގެ މަޝްރޫޢުތައް ހިންގުމުގައި ފާހަގަކުރެވޭ ކުރިއެރުންތަކެއް ލިބިގެން ދިޔައެވެ.
ހއ. އަތޮޅުގެ އަތޮޅުވެރިކަން ތިން ފަހަރެއްގެ މަތިން، 11 އަހަރަށްވުރެ ދިގު މުއްދަތަކަށް އާދަމްއަބްދުއްރަހްމާން އަދާކުރެއްވިއެވެ. އަދި ބޮޑުތަކުރުފާނުގެ ހަނދާނީ މަރުކަޒުގެ މުދީރުކަން ތިން އަހަރަށްވުރެ ގިނަ ދުވަހު ކުރެއްވިއެވެ.
އާދަމް ޢަބްދުއްރަޙްމާނަކީ ދިވެހިބަހާއި އަދަބިއްޔާތުގެ ދާއިރާއިން ވެސް ފާހަގަކޮށްލެވޭ ބޭފުޅެކެވެ. ޚާއްޞަކޮށް ޅެންވެރިކަމުގެ ދާއިރާއިން އޭނާގެ ހުނަރުވެރިކަން ވަނީ ސާބިތުކޮށްދެއްވާފައެވެ. މި ގޮތުން 2004 ވަނަ އަހަރު ޢާންމު ޚިދުމަތުގެ ހިތްވަރު ދިނުމުގެ އިނާމާއި، 2016 ވަނަ އަހަރު ދިވެހިބަހާއި އަދަބިއްޔާތުގެ ދާއިރާއިން ޝަރަފުވެރިކަމުގެ ޤައުމީ އިނާމު ވަނީ ހާސިލުކުރައްވާފައެވެ.
