އިނގިރޭސި ޕްރިމިއަރ ލީގުގައި މެންޗެސްޓަރ ސިޓީ އިން ކުޅުނު ދެ ވަނަ މެޗުގައި، ޓޮޓެންހަމް އަތުން ބަލިވެއްޖެ އެވެ.

ސިޓީގެ އަމިއްލަ ދަނޑު، އިއްތިހާދު ސްޓޭޑިއަމްގައި ހޮނިހިރު ދުވަހުގެ ރޭ ކުޅުނު މެޗުގައި ޓޮޓެންހަމް އިން ވަނީ 2-0 އިން ސިޓީގެ މައްޗަށް ކުރި ހޯދައިފަ އެވެ. މެޗުގައި ޓޮޓެންހަމް އިން އެ ޓީމުގެ ދެ ލަނޑު ވެސް ޖެހީ ފުރަތަމަ ހާފުގަ އެވެ.

މެޗުގައި ސިޓީ އިން ވަނީ ލަނޑު ޖަހާނެ ފުރުސަތު ތަކެއް ތަނަވަސްކޮށްފަ އެވެ. އެގޮތުން ސިޓީގެ އޮމަރް މާމޫޝް ފޮނުވާލި ބޯޅަ ދިޔައީ ގޯލާ އަމާޒު ނުވެ އެވެ. އޭގެ ފަހުން މާމޫޝް ފޮނުވާލި ބާރު ހަމަލާ ޓޮޓެންހަމްގެ ގޯލު ކީޕަރު ވަނީ މަތަކޮށްފަ އެވެ.

އޭގެ ފަހުން ސިޓީ އަށް ކުޅެމުން އަންނަ ނޯވޭގެ ފޯވާޑު އާލިން ހާލަންޑް ތަނަވަސްކޮށްދިން ފުރުސަތެއްގައި މާމޫޝް ފޮނުވާލި ބޯޅަ ވެސް، ޓޮޓެންހަމްގެ ގޯލު ކީޕަރު ވަނީ މަތަކޮށްފަ އެވެ.

މެޗުގައި ޓޮޓެންހަމް އިން ލަނޑު ޖަހައި ލީޑު ނެގީ މެޗުގެ 35 ވަނަ މިނެޓުގަ އެވެ. އެއީ ސިޓީގެ އޭރިޔާ ބޭރުން ލިބުނު ފުރުސަތެއްގައި ރިޗާލިސަން ހުރަސްކޮށްދިން ބޯޅަ ގޯލަށް ވައްދާލައިގެން ބްރެނަން ޖޯންސަން ޖެހި ލަނޑެކެވެ. މި ލަނޑު ބަލައި ގަންނަން ރެފްރީ ނިންމީ، ވީޑިއޯ އެސިސްޓެންޓް ރެފްރީ (ވީއޭއާރު) ވެސް ބެލުމަށް ފަހު އެވެ.

އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ޓޮޓެންހަމް އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެއީ ސިޓީގެ ގޯލު ބަހަލައްޓަން ހުރި ޖޭމްސް ޓްރެފޯޑް އަށް ހެދުނު ގޯހެއްގައި ލިބުނު ބޯޅަށް ތިރި ތިރިން ގޯލަށް ފޮނުވާލައިގެން ޔާއޯ ޕަލީނިއާ ޖެހި ލަނޑެކެވެ.

އޭގެ ފަހުން ވެސް ސިޓީ އަށް ވަނީ މެޗުގައި ލަނޑު ޖަހާނެ ފުުރުސަތު ލިބިފަ އެވެ. ޓޮޓެންހަމްގެ އޭރިޔާ ބޭރުން ސިޓީގެ ރަޔާން ޗާކީ ހުރަސްކޮށްދިން ބޯޅަ ހާލަންޑް ބޮލުން ފޮނުވާލި ނަމަވެސް، އެ ބޯޅަ ދިޔައީ ހުރަސް ދަނޑި މަތިން ބޭރަށެވެ.

ލީގުަގައި ސިޓީ އިން ކުޅުނު ފުރަތަމަ މެޗުގައި އެ ޓީމުން ވަނީ ވުލްވްސްގެ މައްޗަށް ކުރި ހޯދައިފަ އެވެ. ޓޮޓެންހަމްގެ ފުރަތަމަ މެޗުގައި އެ ޓީމުން ވަނީ ބާންލީގެ މައްޗަށް ކުރި ހޯދައިފަ އެވެ.

ލީގުގައި ސިޓީ އަށް ދެން އޮންނާނީ ރަށުން ބޭރުގައި ބްރައިޓަންއާ ދެކޮޅަށް ކުޅޭ މެޗެވެ. އަދި ޓޮޓެންހަމް އަށް އޮންނާނީ އަމިއްލަ ދަނޑުގައި ބޯންމައުތާ ދެކޮޅަށް ކުޅޭ މެޗެވެ.