އެންމެ ވައުދެއްވެސް ދޫކޮށްނުލާ ހުރިހާ ވައުދެއް ފުރިހަމަ އަށް ފުއްދަ ދޭނަން ކަމަށާއި މިހާރުވެސް ކުރަމުންދަނީ ވައުދު ލިސްޓު ނަގައިގެން ވައުދު ފުއްދުމުގެ މަސައްކަތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.

ރައީސް މުއިއްޒު މިހެން ވިދާޅުވީ، އަރިއަތޮޅު އުތުރުބުރީގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި، މަތިވެރީ ރައްޔިތުންނާ ބައްދަލުކުރައްވައި އަންގާރަ ދުވަހުގެ ރޭ ދެއްކެވި ވާހަކަފުޅު ގައެވެ.

ރައީސް ވިދާޅުވީ، މިހާރު ރާއްޖޭގޭ ވަރަށް ގިނަ ރަށްތަކުގައި މަސައްކަތްތައް ފެށިއްޖެ ކަމަށާއި ބައެއް ރަށްރަށުގައި މަސައްކަތް ނިމެމުންވެސް ދާކަމަށެވެ. އަދި އެއްވެސް ޝައްކެތް ނެތް މިންވަރަށް ހުރިހާ ވައުދެއް މިދައުރު ތެރޭ ފުއްދާ ނިންމާނަން ކަމަށް ރައީސް މުޢިއްޒު ވިދާޅުވި އެވެ.

ރައީސް މުޢިއްޒު ވިދާޅުވީ، ވީ ކޮންމެ ވައުދެއްވީ ވަރަށް ސީރިޔަސް ކަމާއެކު އަދި ވަރަށް އިޚްލާސްތެރިކަމާއެކު ހެޔޮ ނިޔަތުގައި ކަމަށެވެ. ރައްޔިތުންނަށް ބޭނުންވާ ކަންކަން ކޮށްދިނުން ނޫން އެހެން އެއްވެސް ކަމެއް ނެތް ކަމަށާއި ނަތީޖާ ނެރެދިނުން ނޫން އެހެން އެއްވެސް އިންޓަރެސްޓެއް ވެސް މިސަރުކާރުގެ ނެތް ކަމަށް ރައީސް މުޢިއްޒު ވިދާޅުވި އެވެ.

ކަންކަން ކޮށްދެމުން މިދަނީ ރައްޔިތުންނާއި ގާތުން ރައްޔިތުން އެދޭ އަމާޒަށް ކަމަށައި ކަމާއި ބެހޭ ހުރިހާ ވަޒީރުންނާއި ހުރިހާ ކުންފުނިތަކުގެ ވެރިންނާއެކީގައި ރަށްރަށައް ދަތުރު ކުރަނީ ދިހަ ބާރަ ބައްދަލުވުން ބޭއްވުމުގެ ބަދަލުގައި އެއް ބައްދަލުވުމުން ހުރިހާ ކަމެއް ހާސިލުކުރަން ކަމަށް ރައީސް މުޢިއްޒު ވިދާޅުވި އެވެ.