ރާޅު ތަކުގެ ތެރެއިން މޫދުން ފޯނު ހޯދި ފަތުރުވެރިޔާގެ ޓިކްޓޮކް ވީޑިއޯ ވައިރަލްވެއްޖެ

ޓިކްޓޮކް ވީޑިއޯއެއް ރެކޯޑުކުރަން އުޅެނިކޮށް ފޯނު މޫދަށް ވެއްޓި، ރާޅުގަނޑުގެ ތެރެއަށް އެރިގެން ފޯނު ހޯދި ފަތުރުވެރިއެއްގެ ވީޑިއޯ މިހާރުވަނީ ސޯޝަލް މީޑިއާގައި ވައިރަލްވެފައެވެ.

ޖުލައި 13 ވަނަ ދުވަހު ޓިކްޓޮކް ޔޫސަރ georginagrigg88@ ޝެއަރކުރި މި ވީޑިއޯ މިހާރުވަނީ 96،000 އަށްވުރެ ގިނަ ފަހަރު ބަލާފައެވެ. މި ވީޑިއޯގައި ދައްކާގޮތުން، އޭނާ ދެ ހަފްތާގެ ޗުއްޓީއެއްގައި ރާއްޖޭގައި ހުރި ވިލާއިން ނުކުތް ކޮންމެ ފަހަރަކު ޓިކްޓޮކަށް ވީޑިއޯ ނަގަމުން ގޮސްފައިވެއެވެ.

"އެ ދުވަހުގެ މެންދުރުފަހު ވިއްސާރަވެ، ވައިގަދަވި ނަމަވެސް، ކުރީ ދުވަސްތަކާ އަޅާބަލާއިރު މާބޮޑު ތަފާތެއް ނެތުމުން އާދައިގެ މަތިން ވީޑިއޯ ނެގުމަށް ނިންމީ،" އޭނާ ބުނެފައިވެއެވެ. "ނަމަވެސް ދޮރު ހުޅުވާލި ވަގުތު ޓްރައިޕޮޑް ވެއްޓި، ފޯނު މޫދަށް ވެއްޓި، ޓްރައިޕޮޑާއި ލައިޓް ރާޅާއެކު ގޮސްފައިވާކަން ފާހަގަ ކުރެވުނު."

ފުރަން އޮތީ ޖެހިގެން އައި ދުވަހު ކަމަށްވެފައި، ގައުމަށް އެނބުރި ގޮސް ޓެކްސީ ޑްރައިވަރާ ގުޅޭނެ ގޮތެއް ނެތުމުންނާއި، މަސައްކަތަށް ނުކުންނަން ޖެހޭތީ، ފޯނު ހޯދުމަކީ ކޮންމެހެން މުހިންމު ކަމެއްގެ ގޮތުގައި އޭނާ ދެކުނެވެ. މޫދު އަޑީގައި ފޯނު އޮތްތަން ފެންނަން އޮތުމާއެކު، ބިކިނީ އަށް ބަދަލު ކޮށްލައި، ލައިފް ޖެކެޓް އަޅައިގެން އޭނާ ނިންމީ މޫދަށް ފުންމާލާށެވެ. ފުންމާލުމަށް ފަހު ބިމުގައި ފައި ކާއްތަނިކޮށް، ފައިގައި ފޯނު ޖެހުނު ކަމަށް އޭނާ ބުންޏެވެ. އޭނާ ފޯނު މައްޗަށް ނެގީ ފައިގެ އިނގިލިތަކުން ހިފައިގެން ކަމަށް ބުނެފައިވެއެވެ.

"ހައިރާންވި ކަމަކީ ފޯނު ނެގިއިރުވެސް މަސައްކަތް ކުރަމުންދިޔަކަން. އިންސްޓަގްރާމް ނޯޓިފިކޭޝަނެއްގެ އަޑު އިވުނު. އެއީ ޙަޤީޤަތުގައިވެސް ވަރަށް ބޮޑު ނަސީބެއް،" އޭނާ ބުނެފައިވެއެވެ.

"އަދިވެސް މި ހާދިސާގެ ޝޮކުން އަރައި ނުގަނެވޭ. އަހަރެންނަށް ފަތަން އެނގޭ ނަމަވެސް، ވިއްސާރައިގެ ސަބަބުން ރާޅު ގަދަވެފައި އޮތުމުން، ރާޅާއެކު ހިނގައިދާނެ ކަމުގެ ބިރު އޮތް،" އޭނާ ވީޑިއޯގެ ކެޕްޝަންގައި ލިޔެފައިވެއެވެ.

ފޯނު ސަލާމަތްކުރުމުގެ އިތުރުން، އިސްތަށިގަނޑާއި މޭކަޕްވެސް ލޮނުން ނުތެމި ސަލާމަތްވިކަން އޭނާ ފާހަގަކޮށްފައިވެއެވެ. އަދި އެރޭ ރީތިކޮށް ހެދުން އަޅައިގެން ޑިނަރ ގޮސް، ރާއްޖޭގައި ހޭދަކުރި އެންމެ ފަހު ރޭ ފުރިހަމަކަމާއެކު ނިންމާލެވުނު ކަމަށް ބުނެފައިވެއެވެ.