ޔޫކްރެއިންގެ ސުލްހަ އަށް ޕުޓިން ހުރަސް އަޅުއްވަފި ނަމަ ހަރުކަށި ނަތީޖާ ތަކެއް އޭނާ އަށް ކުރިމަތިވާނެ ކަމަށް ވިދާޅުވެ ޓްރަމްޕް އިންޒާރު ދެއްވައިފި

ރަޝިޔާގެ ވްލަޑިމިއަރ ޕުޓިން ޔޫކްރެއިން ގައި ސުލްހަ ޤާއިމު ކުރުމަށް ހުރަސް އަޅުއްވައިފި ނަމަ، އޭނާ އަށް "ހަރުކަށި ނަތީޖާތަކެއް" ކުރިމަތި ކުރުވާނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވައިފިއެވެ.

އަދި ހަމަ އެއާ އެކު، ބުދަ ދުވަހު ޓްރަމްޕް ވިދާޅުވެފައި ވަނީ އެ ދެބޭފުޅުންގެ ބައްދަލުވުމުގެ ފަހުން، ވަރަށް އަވަހަށް ޔޫކްރެއިންގެ ލީޑަރު ހިމެނޭ ދެވަނަ ބައްދަލުވުމެއް ބޭއްވިދާނެ ކަމަށެވެ.

ޓްރަމްޕް، ޕުޓިން އާ ދެކޮޅަށް އަޅުއްވާނެ ފިޔަވަޅުތައް ބަޔާން ކުރައްވާފައެއް ނުވެއެވެ. ނަމަވެސް، ހުކުރު ދުވަހު އެލާސްކާގައި ޓްރަމްޕް އާއި ރައީސް ޕުޓިންއާ ދެމެދު ބޭއްވޭ ބައްދަލުވުމުން ނަތީޖާއެއް ނުނިކުމެއްޖެ ނަމަ އިޤްތިޞާދީ ފިޔަވަޅުތަކެއް އަޅުއްވާނެ ކަމުގެ އިންޒާރު ދެއްވާފައިވެއެވެ.

ޓްރަމްޕްގެ މި ބަސްފުޅުތަކުގެ އިތުރުން، ޓްރަމްޕް އާއި ޔޫރަޕްގެ ލީޑަރުން އަދި ރައީސް ވުލަޑިމިއަރ ޒެލެންސްކީ ބައިވެރިވެވަޑައިގެންނެވި ވަރޗުއަލް ބައްދަލުވުމަކަށްފަހު އިވުނު އަޑުތަކުން، އެލާސްކާގެ ބައްދަލުވުމުން ޔޫކްރެއިން ވިއްކާލައި އެ ގައުމުގެ ސަރަޙައްދުތައް ބައިބައިކޮށްލާފާނެ ކަމުގެ ބިރުވެރި ކަމަށް، ކީވް އަށް ކޮންމެވެސް ވަރެއްގެ އުންމީދެއް ލިބޭނެ ކަމަށް ބެލެވެއެވެ.

ނަމަވެސް، ޔޫކްރެއިން އާއި ޔޫރަޕްގެ ޑިމާންޑްތަކަށް ރަޝިޔާ އިން ވަރަށް ބޮޑަށް ދެކޮޅު ހަދާނެ ކަމަށް ބެލެވެއެވެ. އަދި ރަޝިޔާ އިން ކުރިން ބުނެފައި ވަނީ 2024 ވަނަ އަހަރުގެ ޖޫން މަހު ޕުޓިން ބަޔާން ކުރެއްވި ގޮތަށް ރަޝިޔާ ގެ ސްޓޭންސް ބަދަލުވެފައެއް ނުވާ ކަމަށެވެ.

ހުކުރު ދުވަހުގެ ބައްދަލުވުމަށްފަހު ހަނގުރާމަ ހުއްޓާލުމަށް ޕުޓިން އެއްބަސް ނުވެއްޖެ ނަމަ ރަޝިޔާ އަށް އެއްވެސް ނަތީޖާއެއް ކުރިމަތިވާނެތޯ އެހުމުން، ޓްރަމްޕް ވިދާޅުވީ "ކުރިމަތިވާނެ" ކަމަށެވެ.

އެ ނަތީޖާތަކަކީ ކޮބާތޯ ސުވާލު ކުރުމުން، ޓްރަމްޕް ނޫސްވެރިންނަށް ވިދާޅުވީ، "ވަރަށް ހަރުކަށި ނަތީޖާތަކެއް ކުރިމަތި ވާނެ" ކަމަށެވެ.

ނަމަވެސް ޓްރަމްޕް އިތުރަށް ވިދާޅުވެފައި ވަނީ އެލާސްކާގައި އެ ދެބޭފުޅުންގެ ބައްދަލުވުމުގެ މަޤްޞަދަކީ އަވަސް ފޮލޯއަޕް ބައްދަލުވުމަކަށް "މޭޒު ތައްޔާރުކުރުން" ކަމަށެވެ. އެ ބައްދަލުވުމުގައި ޒެލެންސްކީ ބައިވެރިވެވަޑައިގަންނަވާނެއެވެ.

"ފުރަތަމަ ބައްދަލުވުން ރަނގަޅަށް ހިނގައިފިނަމަ، އަޅުގަނޑުމެން އަވަހަށް ދެވަނަ ބައްދަލުވުމެއް ބާއްވާނަން," ޓްރަމްޕް ވިދާޅުވިއެވެ.

"އަޅުގަނޑު ބޭނުން ވަނީ އެކަން ހަމަ ވަގުތުން ކުރަން، އަދި އަޅުގަނޑުމެން އަވަސް ދެވަނަ ބައްދަލުވުމެއް ބާއްވާނަން،" ރައީސް ޓްރަމްޕް ވިދާޅުވިއެވެ.

ޓްރަމްޕް ދެވަނަ ބައްދަލުވުމެއް ބޭއްވުމަށް ވަކި މުއްދަތެއް ދެއްވާފައެއް ނުވެއެވެ.