ލާމަރުކަޒީ ނިޒާމް އަލިފުން ޔާއަށް އިނގޭ - ރައީސް މުއިއްޒު
13 އޯގަސްޓު 2025 | ބުދަ 18:54ލާމަރުކަޒީ ނިޒާމް އަމަލީގޮތުން ހިންގުމުގައި އުޅުއްވި ކަމަށް މުއިއްޒު ވިދާޅުވި
ރައީސް ޑރ. މުހައްމަދު މުއިއްޒު ބ. ދަރަވަންދޫގައި ރައްޔިތުންނާއި ބައްދަލުކުރައްވާ ވާހަކަފުޅުދައްކަވަނީ
ލާމަރުކަޒީ ނިޒާމް އަލިފުން ޔާއަށް އެނގިވަޑައިގަންނަވާ ކަމަށާއި ރައްޔިތުންނަށްޓަކައި ނިޒާމަށް ގެންނަ އިސްލާހުތައް ލޭބަލް ކުރަމުން ދަނީ ރައްޔިތުންނަށް ކޮށްދޭކަމެއް ނޫން ކަމެއްގެ ގޮތުގައި ކަމަށް ރައީސް ޑރ. މުހައްމަދު މުހައްމަދު މުއިއްޒު ވިދާޅުވެއްޖެއެވެ.
ބ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ބ. ދަރަވަންދޫ އަށް ވަޑައިގެން ވާހަކަފުޅުދައްކަވަމުން ރައީސް ވިދާޅުވީ ބޭނުންފުޅުވަނީ ސަރުކާރުން ރައްޔިތުންނަށް ފުރިހަމައަށް ކަންކަން ކޮށްދެވޭނެ ގޮތަށް ކަންކަން ކުރެއްވުމަށް ކަމަށެވެ. ރައީސް މުއިއްޒު ވިދާޅުވީ ލާމަރުކަޒީ ނިޒާމަކީ އެމަނިކުފާނު ފުރިހަމައަށް ގަބޫލު ކުރައްވާ އަދި އަމަލީގޮތުން އެ ނިޒާމް ހިންގުމުގައި އުޅުއްވި ބޭފުޅެއް ކަމަށެވެ.
ރައީސް މުއިއްޒު ވިދާޅުވީ މާލޭގައި ލާމަރުކަޒީ ނިޒާމް ގިނގަ ގޮންޖެހުން ތަކާއެކީގައި ހިންގަން މަސައްކަތް ކުރެއްވި ކަމަށާއި، ލާމަރުކަޒީ ނިޒަމް އަލިފުން ޔާ އަށް އެނގިވަޑައިގަންނަވާ ކަމަށެވެ. ރައީސް މުއިއްޒު ވިދާޅުވީ ސަރުކާރުން ރައްޔިތުންގެ ފަޅީގައި އޮވެ ލާމަރުކަޒީ ނިޒާމަށް ގެންނަވާ އިސްލާހުތައް އެއީ ރައްޔިތުންނަށް ކޮށްދޭކަމެއް ނޫން ގޮތަށް ލޭބަލް ކުރަމުންދާ ކަމަށެވެ.
އަޅުގަނޑު ދަންނަވާލަން ބޭނުންވަނީ މިފަދަ ޖަލްސާއެއް ބޭއްވިގެން ދާއިރުގައި އެ ކަންކަން އޮތީ އެހެން ނޫންކަން. ކައުންސިލްތައް ހިންގަން ޖެހޭނީ ރައްޔިތުންނަށް ފައިދާވާ ގޮތަށް. ރައްޔިތުން ބާރުވެރިކުރާ ގޮތަށް. އަޅުގަނޑުމެން އެންމެ ފަހުން ސަރުކާރުގެ ފަރާތުން ހުށަހަޅައިގެން މަޖިލީހުން ފާސްކޮށްފައި އޮތް އިސްލާހުގައި ތެރޭގައި ހިމެނެނީ މުޅިންވެސް މިކަން. އެއް އިސްލާހަކީ މިހާރު ބައެއް ކައުންސިލްތަކުން އުފައްދާފައި ހުރި ކުންފުނިތަކުން އެބަ ހިންގާ އާންމު ފަރުދުން ހިންގާ ކުދިކުދި ވިޔަފާރިތައް. އެހެން ހެދީމާ ރަށުގެ އާންމު ރައްޔިތުންގެ މުއްސަނދިކަމަށް ހުރަސް އެޅޭނެ.ރައީސް ޑރ. މުހައްމަދު މުހައްމަދު މުއިއްޒު
ކައުންސިލްތައް ހިންގުމަށް އުދަނގުވާ ގޮތައް ލާމަރުކަޒީ ގާނޫނަށް ގެނެސްފައިވާ ބޮޑެތި ބަދަލުތަކުގެ ވާހަކަ ފާހަގަ ނުކުރައްވާ ރައީސް ވިދާޅުވީ ނިޒާމަށް ގެންނަ ދެވަނަ އިސްލާހަކީ އާންމު ހިދުމަތްދޭ ތަންތަން ހިންގާ ބިންތަކުން ބޮޑު ކުލި ނަގާތީ ގެނެސްފައިވާ އިސްލާހެއް ކަމަށެވެ. އަދި މިއާއެކު ކަރަންޓާއި ފެނާއި ނަރުދަމާ އަދި ރައްޔިތުންނާއި ގުޅުންހުރި ހިދުމަތްތަކުން ނަގާ އަގު ހެޔޮވެގެންދާނެ ކަމަށް ރައީސް ވިދާޅުވިއެވެ.
ރައީސް ވިދާޅުވީ ކައުންސިލްތަކުން ހޯދާ އާމްދަނީ އިން ޓެކްސް ނުދައްކާ ކަމަށާއި، އެހެންކަމުން ޓެކްސް ދައްކަން މަޖުބޫރުކުރާ އިސްލާހެއް ހިމަނާފައިވާނެ ކަމަށެވެ. އަދި މިއީ ރައްޔިތުންނަށް ކަންކަން ކޮށްދެއްވަން ގެނައި އިސްލާހެއް ކަމަށެވެ. އަދި ކައުންސިލްތަކުގެ އާމްދަނީ ހާމަ ނުކުރާ ކަމަށާއި، އިސްލާހު ގެނެސްފައިވަނީ އެ ހާމަކުރުމަށް ކަމަށެވެ. އަދި މި އިސްލާހު ގެނައީ ޗެކްއެންޑް ބެލެންސް ގާއިމް ކުރެއްވުމަށް ކަމަށް ރައީސް ވިދާޅުވިއެވެ.
މަޖިލީހުން ފާސް ކުރި ބިލުން ކައުންސިލުތަކަށް ކުރިމަތި ކުރުވާ ހުރަސްތަކުގެ ތެރޭގައި ވިޔަފާރި ކުރަން ކުރިމަތި ކުރުވާ ހުރަސްތަކާއި އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުމާއި ތަންތަން ކުއްޔަށް ދިނުމަށް ހުރަސްތައް ކުރިމަތި ކުރުވުން ހިމެނެ އެވެ.
އަދި މީގެ އިތުރުން އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުމާއި މާލީ ކަންކަމަށް ނުފޫޒު ފޯރުވުންފަދަ ކަންކަން މި ބިލުގައި ހިމެނެއެެވެ.
ރާއްޖޭގެ އެކި ހިސާބުތަކުން 80 ށް ވުރެ ގިނަ ކައުންސިލުން، އެ އިސްލާހްތައް ތަސްދީގު ނުކުރުމަށް ރައީސް އަށް ގޮވާލައި ބަޔާންތައް ނެރެފައިވާއިރު، ލާމަރުކަޒީ ގާނޫނަށް ގެންނަން ހުށަހަޅާފައިވާ އިސްލާހުތަކާއި ގުޅޭގޮތުން މިނިސްޓަރ އޮފް ލޯކަލް ގަވަރންމަންޓް އެންޑް ސިޓީސް އާދަމް ޝަރީފް ވިދާޅުވީ، ސަރުކާރުން މަސައްކަތް ކުރަނީ ކައުންސިލުތަކުގެ މާލީ ބާރުވެރިކަން އިތުރުކުރަން ކަމަށެވެ. އަދި މާލީ ބާރުވެރިކަމުގެ ބޭނުން ކައުންސިލްތަކުން ކުރަނީ ޒިންމާދާރު ކަމާއެކުގައި ކަން ކަށަވަރު ކުރުމަށް ކަމަށް ވެސް އޭނާ ވިދާޅުވި އެވެ.
