ޣައްޒާ ހިފުމުގެ އޮނިގަނޑު ފާސް ކޮށްފި ކަމަށް އިސްރާއީލު ސިފައިން ބުނެފި

ޣައްޒާގެ ޣައްޒަ ސިޓީ ހިފުަމަށް އިސްރާއީލުގެ ސަލާމަތީ ކެބިނެޓުން ނިންމި ނިންމުމާ އެއް ގޮތައް، އެ އޮޕަރޭޝަން ހިންގާނެ ގޮތުގެ "އޮނިގަނޑު" ފާސްކޮށްފައިވާ ކަމަށް އިސްރާއީލުގެ އަސްކަރިއްޔާ އިން ބަޔާނެއްގައި ބުދަ ދުވަހު ބުނެފިއެވެ.

ސިފައިންގެ ބަޔާނެއްގައި ބުނެފައިވަނީ، ސިފައިންގެ އެންމެ އިސް ވެރިޔާ ލެފްޓިނަންޓް ޖެނެރަލް އެެޔާލް ޒަމީރު "އައިޑީއެފްގެ ޣައްޒާ ސަރަޙައްދުގެ އޮޕަރޭޝަނަލް ޕްލޭންގެ މައިގަނޑު އޮނިގަނޑު" ފާސްކޮށްފައިވާ ކަމަށެވެ.

ބޮޑުވަޒީރު ބެންޖަމިން ނަތަންޔާހޫގެ ސަރުކާރުން އިސްރާއީލުގެ ސިފައިން ޣައްޒާ ގެ އެންމެ ބޮޑު ސިޓީއަށް ވަންނާނެ ވަކި ތާރީޚެއް ހާމަކޮށްފައެއް ނުވެއެވެ. ޣައްޒާ ސިޓީ އަކީ ހަނގުރާމައިގެ ނުރައްކަލުން ކޮންމެވެސް ވަރެއްގެ ރައްކާތެރި ކަމެއް ހޯދުމަށް ފަލަސްތީނުގެ އެތައް ހާސް ރައްޔިތުން ޖަމާވެފައިވާ ސިޓީ އެކެވެ.

ޣައްޒާގެ ސިވިލް ޑިފެންސް އޭޖެންސީން ބުނެފައިވަނީ، މި ފަހުގެ ދުވަސްތަކުގައި ޣައްޒާ ސިޓީއަށް އިސްރާއީލުން ދޭ ވައިގެ ހަމަލާތައް އިތުރުވެފައިވާ ކަމަށާއި، ޒައިތޫން އަދި ސަބްރާގެ އާންމުން ދިރިއުޅޭ ސަރަޙައްދުތަކަށް "ވަރަށް ބޮޑެތި ވައިގެ ހަމަލާތައް ދީފައިވާ ކަމަށެވެ. އެއީ އާންމު ރައްޔިތުންގެ ގެތަކަށް އަމާޒުކޮށްގެން ދިން ހަމަލާތަކެއް ކަމަށާއި، އޭގެ ތެރޭގައި އުސް އިމާރާތްތައް ވެސް ހިމެނޭ ކަމަށް ބެލެވެއެވެ."

ސިފައިންގެ ޕްލޭން ފާސްކުރި ޚަބަރު އައިސްފައި ވަނީ، ހަމާސް ގެ އިސް ވަފުދެއް ގާހިރާ އަށް ދަތުރުކޮށް، ހަނގުރާމަ ވަގުތީ ގޮތުން ހުއްޓާލުމާ ގުޅޭ ގޮތުން މިސްރުގެ މެދުވެރިންނާ އެކު މަޝްވަރާތައް ކުރަމުންދާ ކަމަށް ހާމަ ކޮށްފައިވާ ދަނޑިވަޅެއް ގައެވެ.

22 މަސް ދުވަހަށްވުރެ ގިނަ ދުވަސް ވެފައިވާ ހަނގުރާމަ އިތުރަށް ފުޅާ ކުރުމަށް ނަތަންޔާހޫ ގެ ސަރުކާރުން ނިންމި ނިންމުމަށް މުޅި ދުނިޔޭން ދަނީ ދެކޮޅު ހަދާ ނުރުހުން ފާޅު ކުރަމުންނެވެ. މި ރޭވުންތަކާ ދެކޮޅަށް ބައިނަލްއަޤްވާމީ ފެންވަރުގައި އަދި އިސްރާއީލުގައި ވެސް އިހުތިޖާޖުތައް ދަނީ ކުރަމުންނެވެ.