އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޣައްޒާގެ އިންސާނީ ހާލަތާ މެދު "އިންކާރު ކުރަމުންދާ" ކަމަށް އޮސްޓްރޭލިއާގެ ބޮޑުވަޒީރު އަލްބަނީސް ވިދާޅުވެއްޖެ

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ޣައްޒާގެ އިންސާނީ ހާލަތާ މެދު "އިންކާރު ކުރަމުންދާ" ކަމަށް އޮސްޓްރޭލިއާގެ ބޮޑުވަޒީރު އެންތަނީ އަލްބަނީސް ވިދާޅުވެއްޖެ އެވެ.

އޮސްޓްރޭލިއާ އިން ވަނީ ފަލަސްތީނުގެ މިނިވަން ދައުލަތެއް ގަބޫލުކުރުމަށް ނިންމާފައިވާކަން އިއުލާނު ކޮށްފައެވެ.އޮސްޓްރޭލިއާ އިން ރަސްމީ ކޮށް ފަލަސްތީނު ދައުލަތް ބަލައިގަންނަކަން އިއުލާނު ކުރާނީ އަންނަ މަހު ބޭއްވުމަށް ހަމަޖެހިފައިވާ އދ. ގެ އާންމު މަޖިލީހުގައެވެ. ފަލަސްތީނު ދައުލަތް ބަލައިގަތުމަށް ފްރާންސް، އިނގިރޭސިވިލާތް އަދި ކެނެޑާ ފަދަ ގައުމުތަކުން ވެސް ނިންމާފައި ވަނިކޮށް އޮސްޓްރޭލިއާ ގެ މި ނިންމުމަކީ، އިސްރާއީލަށް ކުރިމަތިވެފައިވާ ބައިނަލްއަގުވާމީ ފިއްތުންތަކަށް އިތުރުވި ބާރެއް ކަމަށް ރިޕޯޓުތައް ބުނެއެވެ.އަލްބަނީސް ވިދާޅުވި ގޮތުގައި، އިސްރާއީލުގެ ސަރުކާރުން އެގައުމުގެ އެކުވެރިން ބުނާ އެއްޗެއް އަޑުއެހުމަށް ނުކުޅެދުން ވެގެން ދިޔައީ ފަލަސްތީނުގެ ދައުލަތެއް ގަބޫލު ކުރުމަށް އޮސްޓްރޭލިއާ އިން ނިންމި ނިންމުމަށް މަގުފަހިކުރި ކަމެއް ކަމަށެވެ. އޭނާ ވިދާޅުވީ، ޣައްޒާ ގެ މައްސަލައިގައި ނަތަންޔާހޫ އާއެކު ކުރެއްވި ފޯނު ކޯލެއްގައި، ކުށެއް ނެތް އާންމު ރައްޔިތުންނަށް ކުރިމަތިވަމުންދާ ދަތިތައް ފާހަގަ ކުރުމުން އިސްރާއީލުގެ ބޮޑުވަޒީރު އެކަމާ އިންކާރު ކުރި ކަމަށެވެ.އޮސްޓްރޭލިއާ އިން ފަލަސްޠީނުގެ ދައުލަތެއް ގަބޫލު ކުރުމަކީ ފަލަސްޠީނު އޮތޯރިޓީ (ޕީއޭ) އިން ދޭންޖެހޭ ބައެއް ގެރެންޓީ އާ ގުޅިފައިވާ ކަމެކެވެ. މީގެ ތެރޭގައި ކުރިމަގު ގައި ގާއިމު ވާ ސަރުކާރެއްގައި ހަމާސް ޖަމާއަތް ބައިވެރި ނުވާނެ ކަމުގެ ޔަގީންކަން ހިމެނެއެވެ.ޣައްޒާގައި ކުރިމަތިވެފައިވާ ބަނޑުހައިހޫނުކަމާއި ނުރައްކާތެރި އިންސާނީ ހާލަތާއެކު، އޮސްޓްރޭލިއާގެ އާންމު ރައްޔިތުންގެ ހިތްތަކުގައި މިމައްސަލައާ މެދު އުފެދިފައިވާ ކަންބޮޑުވުން އިތުރު ވެފައިވެއެވެ. ފްލިންޑަރސް ޔުނިވަރސިޓީގެ އިންޓަނޭޝަނަލް ރިލޭޝަންސްގެ ސީނިއަރ ލެކްޗަރަރ ޖެސިކާ ޖެނައުއަރ ވިދާޅުވި ގޮތުގައި އޮސްޓްރޭލިއާ ސަރުކާރުގެ މި ނިންމުމަކީ އޮސްޓްރޭލިއާގެ ރައްޔިތުންގެ އާންމު ހިޔާލު ބަދަލުވެފައިވާކަން ދައްކުވައިދޭ ނިންމުމެކެވެ.