އިއުތިރާފުގެ އެއްބަސްވުމަކާއެކު ލައްސާނަށް ލުއި އަދަބެއް
އަހްމަދު ލައްސާނު އިއުތިރާފުގެ އެއްބަސްވުމުގައި ސޮއިކުރުމުން ޖަލު ހުކުމަކާއި ޖޫރިމަނާ ކަނޑައަޅައި މައްސަލަ ވަނީ ނިންމާލާފައި
ނާޖާއިޒު ފައިދާ ނެގި ކަމަށް ތުހުމަތު ކުރެވޭ މީހުން: އެމީހުންނަށް ދައުވާކުރުމަށް މިހާރުވަނީ ޕީޖީ އޮފީހަށް ފޮނުވާފަ
ބިދޭސީއެއްގެ އަތުން ރިޝްވަތު ނެގި ކަމުގެ ތުހުމަތުގައި ކުރީގެ ކޮންޓްރޯލާ އޮފް އިމިގްރޭޝަން މުހައްމަދު ޝަމްއާން ވަހީދާއެކު ހައްޔަރުކުރި މ. ހަޒާރީވިލާ އަހްމަދު ލައްސާނު އަށް ލުއި އަދަބެއްދީ އޭނާގެ މައްސަލަ ނިންމާލައިފިއެވެ.
ޝަމްއާން ހިމެނޭހެން މި މައްސަލައާ ގުޅިގެން ފަސް މީހަކު ވަނީ ހައްޔަރު ކޮށްފައެވެ. ހައްޔަރު ކުރި ފަސްމީހުންނަކީ އުމުރުން 36 އަހަރުގެ މުޙައްމަދު ޝަމްއާން ވަހީދު، ގ. ލިޓޯނިޔާ އުމުރުން 21 އަހަރުގެ މުޙައްމަދު އަލްސަން އިސްމާއިލް، ތ. ބުރުނި އާއި އުމުުރުން 37 އަހަރުގެ އިބްރާހިމް އަޙްމަދު، ގ. ހެޕީސައިޑް އާއި އުމުރުން 47 އަހަރުގެ ހަސަން ސަހެޝާން، ގ. ހެޕީސައިޑްގެ އިތުރުން އުމުރުން 40 އަހަރުގެ އަހްމަދު ލައްސާނު، މ. ހަޒާރީވިލާ އެވެ.
މި ފަސް މީހުންގެ މައްޗަށް ދައުވާކޮށްދިނުމަށް އެދި ފޮނުވީ 11 މެއި 2025 ގައެވެ. މި 5 މީހުންގެ މައްޗަށް ކޮށްފައިވަނީ ރިޝްވަތު ދިނުމާއި، ކޮރަޕްޝަނާއި މަނީ ލޯންޑަރިންގެ ކުށުގެ ތުހުމަތެވެ. ލައްސާނުގެ މައްޗަށް އުފުލީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއަކާއި ފޭރުމުގެ ކުށުގެ ދައުވާއެކެވެ.
މި މައްސަލައިގައި ތަފްސީލު ފުލުހުން ހާމަކޮށްފައިވާއިރު ފުލުހުން ބުނެފައިވަނީ ޝަމްއާން ދިރިއުޅޭ ގެ މ. ސިލްވަރ ލައިން ކައިރީގައި ސައިކަލު ޕާކްކުރުމަށްފަހު ޝަމްއާން ދިރިއުޅޭ ގެއަށްވަދެ، އޭނާ ދިރިއުޅޭ އެޕާޓްމަންޓަށް ފައިސާ ކޮތަޅު ހިފައިގެން ވަދެފައިވަނީ ލައްސާނުއާއި އިބްރާހިމް އަހުމަދު ހިމެނެއެވެ. އިމިގްރޭޝަންގެ އޮޕަރޭޝަން ހިންގި އިރު އެ އޮޕަރޭޝަނުގައި އިމިގްރޭޝަންގެ ބެލުމުގެ ދަށަށް ގެންދިޔަ ބިދޭސީއަކު ދޫކޮށްލުމަށް ފަހު، އެ އިދާރާގެ މުވައްޒަފުންތަކަކާ ގުޅިގެން އެ މީހާގެ އަތުން 500،000 އަށް ވުރެ ގިނަ ރުފިޔާ ހޯދި ކަމަށް ފުލުހުންބުނެއެވެ.
ލައްސާން އިއުތިރާފުގެ އެއްބަސްވުމުގައި ސޮއިކުރުމުން ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ކުށް ސާބިތުވިކަމަށް ނިންމާ އޭނާގެ މައްޗަށް އިއްވީ 2 މަހާއި 12 ދުވަހުގެ ޖަލު ހުކުމަކާއެކު 14400 ރުފިޔާގެ ޖޫރިމަނާއެކުއެވެ. މީގެ އިތުރުން ފޭރުމުގެ ކުށް ސާބިތުވެ 7 މަހާއި 6 ދުވޗަހުގެ ޖަލު ހުކުމަކާއެކު 14400 ރުފިޔާގެ ޖޫރިމަނާއެއް ވަނީ ކަނޑައަޅާފައެވެ.
ޝައްމާންގެ އިތުރުން 4 މީހެއްގެ މައްޗަށް ދައުވާ އުފުލި އިރު، މި 4 މީހުންގެ ތެރެއިން އިއުތިރާފުގެ އެއްބަސްވުމެއް ހެދީ ލައްސާން އެކަންޏެވެ. އަދި އިސްކޮށް އުޅުނުކަމަށް ފުލުހުން ބުނާ ކުރީގެ ކޮންޓްރޯލަރ ޝައްމާން މުހައްމަދު ވަހީދު ހުރީ ޝަރީއަތް ނިމެންދެން ބަންދުކޮށްފައެވެ.
