ފަހު ވަގުތު އެޓްލަސް އަތުން މިއާމީ މޮޅުވެއްޖެ

ލީގްސް ކަޕްގައި އެޓްލަސްއާ ދެކޮޅަށް ކުޅުނު މެޗުން ފަހު ވަގުތު އިންޓަރ މިއާމީ މޮޅުވެއްޖެ އެވެ.

ބުރާސްފަތި ދުވަހުގެ ފަތިހު ކުޅުނު މެޗު މިއާމީ އިން ކާމިޔާބު ކުރީ 2-1 އިންނެވެ. މެޗުގައި މިއާމީ އިން ލަނޑު ޖަހައި ކުރި ހޯދާފައި ވަނިކޮށް، އެޓްލަސް އިން ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތުގައި ލަނޑު ޖަހައިގެން މިއާމީ ވަނީ މެޗުން މޮޅުވެފަ އެވެ. މެޗުގައި ދެ ޓީމުން ވެސް ލަނޑުތައް ޖެހީ ދެ ވަނަ ހާފުގަ އެވެ.

އެޓްލަސްއާ ދެކޮޅަށް ކުޅުނު މެޗުގައި ވަނީ، ދާދި ފަހުން އެތުލެޓިކޯ މެޑްރިޑް އިން މިއާމީ އަށް ބަދަލުވި އާޖެންޓީނާގެ ރޮޑްރީގޯ ޑި ޕައުލް ވެސް ކުޅެފަ އެވެ. މިއީ މިއާމީ އަށް އޭނާ ކުޅެދިން ފުރަތަމަ މެޗެވެ.

މެޗުގެ ފުރަތަމަ ހާފުގައި ވެސް މިއާމީ އިން ވަނީ ލަނޑު ޖަހަން ފުރުސަތު ތަކެއް ތަނަވަސްކޮށްފަ އެވެ. އެޓްލަސްގެ ގޯލު ކުރިމަތިން ލިބުނު ފުރުސަތެއްގައި ޓެލަސްކޯ ސެގޯވިއާ ފޮނުވާލި ބޯޅަ ދިޔައީ ގޯލުގެ ހުރަސް ދަނޑި މަތިން ބޭރަށެވެ.

އޭގެ ފަހުން މިއާމީގެ ކެޕްޓަން ލިއޮނަލް މެސީ ދިން ފުރުސަތެއްގައި އެ ޓީމުގެ ޓެޑެއޯ އެލެންޑޭ ފޮނުވާލި ބޯޅަ އެޓްލަސްގެ ގޯލު ކީޕަރު ވަނީ މަތަކޮށްފަ އެވެ. މެޗުގެ ފުރަތަމަ ހާފުގެ ފަހު ވަގުތުގައި ލަނޑު ޖެހުމަސް އެޓަލްސް އިން ފުރުސަތު ތަކެއް ތަނަވަސް ކުރި ނަމަވެސް، މިއާމީގެ ގޯލު ކީޕަރު ރޮކޯ ރިއޮސް ނޮވޯ ވަނީ މަތަކޮށްފަ އެވެ.

މެޗުގެ ފުރަތަމަ ހާފުގެ ފަހު ވަގުތުގެ ތެރޭގައި، އެޓްލަސްގެ އޭރިޔާ ތެރެއިން ލިބުނު ފުރުސަތެއްގައި މިއާމީގެ ލުއިސް ސުއަރޭޒް ފޮނުވާލި ބާރު ހަމަލާ އަމާޒުވީ ގޯލުގެ ހުރަސް ދަނޑިއާ އެވެ.

މެޗުގެ ދެ ވަނަ ހާފު ފަށައިގެން ކުރީ ކޮޅު މިއާމީ އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން ދެ ވަނަ ހާފު ފަށައިގެން 13 ވަނަ މިނެޓުގައި މިއާމީ އަށް ލީޑު ނަަގައިދިނީ ސެގޯވިއާ އެވެ.

އޭގެ ފަހުން މެޗުގެ 80 ވަނަ މިނެޓުގައި އެޓްލަސް އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ޓީމަށް ނަތީޖާ ހަމަހަމަ ކޮށްދިނީ ޖޯސް ލޮޒާނޯ އެވެ.

މެޗުގައި ދެ ވަނަ ލަނޑެއް ޖަހައި ލީޑު ނެގުމަށް މިއާމީ އިން ކުރި މަސައްކަތް އެ ޓީމަށް ކާމިޔާބު ކުރެވުނީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ. މިއާމީގެ ކެޕްޓަން މެސީ ތަނަވަސްކޮށްދިން ފުރުސަތެއްގައި އެ ލަނޑު ޖެހީ މާސެލޯ ވެއިގަންޓް އެވެ.

ލީގްސް ކަޕްގައި ދެން މިއާމީ ކުޅޭނީ ނެކަޒާއާ ދެކޮޅަށެވެ.