ޣައްޒާގެ ހަނގުރާމައިގައި ޝަހީދުވި މީހުންގެ އަދަދު 60،000 އަށް ވުރެ މައްޗަށް އަރައިފި
ޣައްޒާގެ ހަނގުރާމައިގައި އަންގާރަ ދުވަހު އިންސާނީ އެހީ ފޯރުކޮށްދިނުމަށް ކަމަށް ބުނެ ހަނގުރާމަ މެދުކަނޑާލި ވަގުތުކޮޅުގައިވެސް، އެހީ ހޯދަން އުޅުނު 19 މީހުންނާއެކު 62 މީހުން ވަނީ ޝަހީދު ވެފައެވެ.
ޣައްޒާގެ ޚާން ޔޫނިސްގައި އޮކްޓޯބަރު 16، 2023 ވަނަ ދުވަހު އިސްރާއީލުން އާންމު މީހެއްގެ ގެއަށް ބޮން އެޅުމުން ގޭގެ ވެރިމީހާ ކަރުނަ އަޅަނީ
ޣައްޒާގެ ހަނގުރާމައިގައި ޝަހީދުވި މީހުންގެ އަދަދު 60،000 އަށްވުރެ މައްޗަށް އަރައިފިއެވެ.ގައްޒާގެ ސިއްހީ ވުޒާރާއިން އަންގާރަ ދުވަހު ހާމަކުރި ގޮތުގައި 2023 ވަނަ އަހަރުގެ އޮކްޓޯބަރ މަހުން ފެށިގެން އިސްރާއީލުގެ ހަމަލާތަކުގައި ޝަހީދުވި ފަލަސްތީނުގެ ރައްޔިތުންގެ އަދަދު 60،034 އަށް އަރައިފިއެވެ.އަންގާރަ ދުވަހު އިންސާނީ އެހީ ފޯރުކޮށްދިނުމަށް ހަނގުރާމަ މެދުކަނޑާލާފައި ވަނިކޮށް، މެޑިކަލް ވަޞީލަތްތަކުން އަލްޖަޒީރާ އަށް ހާމަކުރި ގޮތުގައި، އެހީ ހޯދަން އުޅުނު 19 މީހުންނާއެކު މުޅި ޖުމްލަ 62 ފަލަސްތީނު ރައްޔިތުން ވަނީ ޝަހީދުވެފައެވެ.ޣައްޒާގެ މެދުތެރޭ ސަރަހައްދުގައިވާ ދީރުލް-ބަލާހުން އަލްޖަޒީރާގެ ނޫސްވެރިޔާ ތާރިޤް އަބޫ އައްޒޫމް ރިޕޯޓުކުރި ގޮތުގައި، އެ ސަރަހައްދުގެ ރައްޔިތުން ބުނެފައިވަނީ އަންގާރަވިލޭރެ އަކީ މި ފާއިތުވި ހަފްތާ ތަކުގެ ތެރޭގައި އެންމެ ލޭއޮހޮރުވުން ބޮޑު ރެއެވެ. އެގޮތުން އެމީހުން ބުނާ ގޮތުގައި އިސްރާއީލުން ވަނީ ބޫބީ-ޓްރެޕް ރޮބޮޓުތަކާއި، ޓޭންކުތަކާއި، ޑްރޯން ބޭނުންކޮށްގެން ހަމަލާ ދީފައެވެ.މި ހަނގުރާމައިގެ ސަބަބުން އެތައް ހާސް ކުޑަކުދިންނާއި އަންހެނުން ވަނީ ޝަހީދުވެފައެވެ. އަދި މިލިއަނަކަށްވުރެ ގިނަ މީހުން ވަނީ ނިކަމެތި ހާލަތަކަށް ވެއްޓި، އިންސާނީ އެހީ އަށް ޖެހިފައެވެ. ބައިނަލްއަޤްވާމީ މުޖުތަމައުއިން މި ހަނގުރާމަ ހުއްޓުވުމަށް ގޮވާލަމުންދާއިރު، ޣައްޒާ ގެ ހާލަތު ދަނީ ދުވަހެއް ދުވަހަކަށް ދަށްވަމުންނެވެ.
