ކަނބުލޮ ފިލްމްގެ ޓްރެއިލަރ ނެރެފި: "އަހަރެން އިރާދަކުރެއްވިއްޔާ، ދުވަހަކު ވެސް ފާފައެއް ނުކުރާނަން"
31 އޮގަސްޓް 2025ގައި އޮލިމްޕަސް ސިނަމާގައި އަޅުވަން ތައްޔާރުވަމުންދާ ފިލްމުގެ ޓްރެއިލަރ ބަލާލުމާއި އެކު، ފިލްމް ބަލާލަން އޮތް ޝައުގުވެރިކަން ވީ އިތުރެވެ.
ކަނބުލޮ ފިލްމްގެ ތްރެއިލަރގެ ބައެއް މަންޒަރުތައް
ގިނަ ބަޔަކު އިންތިޒާރު ކުރަމުންދާ ދިވެހި ފިލްމް ކަނބުލޮ ފިލްމްގެ ޓްރެއިލަރ ރިލީޒްކޮށްފިއެވެ. 31 އޮގަސްޓް 2025ގައި އޮލިމްޕަސް ސިނަމާގައި އަޅުވަން ތައްޔާރުވަމުންދާ ފިލްމުގެ ޓްރެއިލަރ ބަލާލުމާއި އެކު، ފިލްމް ބަލާލަން އޮތް ޝައުގުވެރިކަން ވީ އިތުރެވެ.
އަލީ ޝާނީޒް މުހައްމަދު ޕްރޮޑިއުސްކޮށް ހުސައިން މުނައްވަރު ކޯ ޕްރޮޑިއުސްކުރާ މި ފިލްމުގެ ޓްރެއިލާ އިން ފެނިގެން ދަނީ ޖަޒުބާތީ މަންޒަރުތަކެކެވެ. ހުސައިން މުނައްވަރު ޑައިރެކްޓް ކުރާ މި ފިލްމަކީ ހިތްދަތި އެހެނަސް ތަދު، ތެދުގެ ވާހަކަ އެ ފިލްމަކުން ވަރަށް ރަނގަޅަށް ތަސައްވުރު ވެގެންދާނެ ފިލްމެކެވެ. މުޅި ޓްރެއިލަރގެ އުސްއަލިއަކަށްވީ އަސަރާއި އެކު އައްޒަ "އަހަރެން އިރާދަކުރެއްވިއްޔާ، ދުވަހަކު ވެސް ފާފައެއް ނުކުރާނަން" މިހެން ބުނެލާ މަންޒަރެވެ.
ކިޑް ޕްރޮޑަކްޝަން އަދި ސެޓާން ސްޓޫޑިއޯ އިން ގެނެސްދޭ މި ފިލްމަކީ ދިވެހިންގެ މެދުގައި ބޮޑު މަޤްބޫލުކަމެއް ހޯދި "ކަމަނަ" ފިލްމްގެ ޓީމުން އާއްމުންނާއި ހަމައަށް ގެނެސްދޭ އުފެއްދުމެކެވެ.
އިސްމާއިލް ރަޝީދު (ކޮޕީ އިއްސެ)، މަރިޔަމް އައްޒަ، ޝީލާ ނަޖީބު ފަދަ ކުޅަދާނަ ފަންނާނުން ފެނިގެންދާ މި ފިލްމްގެ މުހިންމު އެހެން ރޯލުތަކުން ފެންނަ ތަރިންގެ ތެރޭގައި އަހުމަދު ނިމާލް، އަހުމަދު އީސަ، ވާޝިއާ މުހައްމަދުގެ އިތުރުން ޝަކީލާ އާދަމް ފާހަގަކޮށްލެވެއެވެ. ފިލްމްގެ ޓްރެއިލަ އިން ފެނުނީ އެންމެންގެ ވެސް މޮޅު އެކްޓިންގެ މަލަމައްޗެވެ. ޚާއްސަކޮށް ޝީލާ، އައްޒަ އަދި ކޮޕީ އިއްސެގެ ފެނިލުންތައް ފެނުނު އިރު ނޭވާ ހިފަހައްޓާލަން ޖެހޭ ފަދަ މަންޒަރުތައް މި ޓްރެއިލާ އިން ފެނިގެން ދިޔައެވެ.
އިބްރާހިމް ވިޝާންގެ ކުޅަދާނަ ސިނެމެޓޮގްރަފީ ފެނިގެންދާ މި ފިލްމްގައި ފެނިގެންދާ މޭކަޕް އަކީ ހުސައިން ހާޒިމް (ސޭންޑީ) އަދި ރިޝްފާ އަބްދުއް ސަމަދުގެ މޭކަޕެވެ. ހިތްގައިމު ލަވަތަކެއް ފެނިގެންދާ މި ފިލްމްގެ ލަވަތަކުގެ ޅެންތައް ހަދާފައި ވަނީ މުހައްމަދު އަބްދުލް ޢަނީއެވެ. ފިލްމްގެ ސްކްރީންޕްލޭ އަކީ ދިވެހިންގެ މެދުގައި އިތުރު ތައާރަފަކަށް ބެނުން ނުވާނެ މަހްދީ އަހުމަދުގެ ސްކްރީންޕްލޭއެކެވެ. ފިލްމުގެ އެޑިޓިންގެ މަސައްކަތް ކޮށްފައި ވަނީ އަހުމަދު ނިމާލް އަދި އަބްދުﷲ މުއާޒްއެވެ.
