އިނގިރޭސިވިލާތުގެ ފޮރިން، ކޮމަންވެލްތް އެންޑް ޑިވެލޮޕްމަންޓް އެފެއާޒްގެ ސެކްރެޓަރީ އޮފް ސްޓޭޓް، ޑޭވިޑް ލެމީ ރައީސް ޑޮކްޓަރ މުޙައްމަދު މުޢިއްޒުގެ ބައްދަލުވުމުން އެއްވެސް ނަތީޖާ އެއް ނުނިކުންނަކަން ހާމަވެއްޖެއެވެ.

ރައީސް އޮފީހުން ބުނެފައިވަނީ ޑޭވިޑް ލެމީ މުއިއްޒުގެ އަރިހަށް އިޙްތިރާމްގެ ޒިޔާރަތެއް ކުރައްވައިފި ކަމަށެވެ. އެހެން ނަމެވެސް ބައްދަލުވުން އޮތް ތަނެއް ރައީސް އޮފީހުން ވެސް އަދި ފޮރިން މިނިސްޓްރީ އަކުން ވެސް ހާމަ ކޮށްފައެއް ނުވެއެވެ.

ޑޭވިޑް ލެމީ އާކީ އިނގިރޭސި ޚާރިޖީ ވަޒީރު ކަމަށް ވާއިރު އަދި މުއިއްޒުގެ ސަރުކާރުން ޗަގޯސް ހޯދާނެ ކަމަށާއި، ޗާގޯސް ކަނޑަށް ބައިނަލް އަގްވާމީ ކޯޓުން ކުރި ހުކުމެއްގެ ދަށުން އިތުރުކުރި ބައި ރާއްޖެ އަށް ހޯދާނެ ކަަމަށް ވައުދުވެފައިވާއިރު މި މައްސަލަ ރާއްޖޭގެ ފަރާތުން ނަގަން އެންމެ އެކަށީގެން ވަނީ ޑޭވިޑް ލެމީ އާ އެކު ބާއްވާ ބައްދަލުވުމުގައި ކަން ފާހަގަ ކުރެވެއެވެ. އެހެން ނަމަވެސް މިފަދަ އެއްވެސް ވާހަކަ އެއް އަދި މަޝްވަރާ އެއް ކުރެވުނު ކަމަކަށް ސަރުކާރަކުން ނުބުނެއެވެ.

އޭގެ އިތުރުން ރާއްޖެ އިން އިނގިރޭސިވިލާތައް އިމްޕޯޓު ކުރާ މަހުން ނަގާ ބޮޑު ޑިއުޓީ އާ ބެހޭ ގޮތުން ވެސް ލެމީ އާ އެކު އެއްވެސް ވާހަކަ އެއް ދެކެވުނު ކަން ހާމަ ކޮށްފައެއް ނުވެއެވެ.

ރައީސް އޮފީހުން އާންމު ކުރި ޚަބަރުގައި ހުރީ ވަކި ކަމެއް ދޭހަ ނުވާ ގޮތައް އާންމު ބަހުރުވައިން ގުޅުން ބަދަހި ކުރުމުގެ ވާހަކަތައް ކަން ފާހަގަ ކުރެވެއެވެ. އެ ގޮތުން ރައީސް އޮފީހުގެ ބަޔާނުގައި ބުނީ ބުދަ ދުވަހުގެ މި ބައްދަލުވުމުގައި މައިގަނޑު ގޮތެއްގައި މަޝްވަރާ ކުރެއްވީ، ދިވެހިރާއްޖެ އާއި އިނގިރޭސިވިލާތާ ދެމެދުގައި ދެމެހެއްޓެނިވި ގޮތެއްގައި ގުޅުން ބަދަހިކުރުމާއި އަދި ހަރުދަނާކުރުމާ ބެހޭގޮތުން ކަމަށެވެ.

މީގެ އިތުރުން މަސްވެރިކަމުގެ ދާއިރާއާއި، މޫސުމަށް އަންނަ ބަދަލުތަކަށް އެކަށީގެންވާ ގޮތެއްގައި ހޭނުމުގެ މަސައްކަތްތަކުގައާއި، އިއާދަކުރަނިވި ހަކަތަ އިތުރުކުރުމުގައާއި، ތަޢުލީމާއި ސްކޮލަރޝިޕްގެ ފުރުޞަތުތައް އިތުރުކޮށްދިނުމުގައި، އެއްބާރުލުން އިތުރުކުރުމާ ބެހޭގޮތުން މަޝްވަރާ ކުރެވިފައިވާ ކަމަށެވެ. މިނޫންވެސް މުހިންމު ދާއިރާތަކުން ގުޅުން ބަދަހިކުރުމާ ބެހޭ ގޮތުން ދެބޭފުޅުން ވަނީ ވާހަކަފުޅުދައްކަވާފައި ކަމަށް ރައީސް އޮފީހުން ބުނެފައިވެއެވެ.

މި ބައްދަލުކުރެއްވުން ނިންމަވާލެއްވީ، ރާއްޖެއާއި އިނގިރޭސިވިލާތާ ދެމެދުގައި އޮތް ގާތް ގުޅުން، އިތުރަށް ބަދަހިކުރެއްވުމަށް މަސައްކަތް ކުރައްވަމުން ގެންދަވާނެކަމުގެ ޔަޤީންކަން ދެއްވަމުންނެވެ. އެހެން ނަމަވެސް އެއީ ކޮންކޮން ދާއިރާ ތަކުން ކޮން ކަމެއް ހާސިލު ކޮށްގެން ކަމެއް ބުނެފައެއް ނުވެއެވެ.

ރާއްޖޭގެ ފޮރިން މިނިސްޓްރީންވެސް ކުރި ޕޯސްޓުގައި ވެސް އެއްވެސް މުހިންމު ކަމަކާ މަޝްވަރާ ކުރެވި، އެއްބަސްވުމަކަށް އެއްވެސް ކަމެއްގައިި އާދެވުނު ކަމަކަށް ނުބުނެއެވެ. ވަރަށް ކުރުކޮށް ބުނެފައިވަނީ ދެ ގައުމުން ޝައުގުވެރިވާ ކަންކަމާ ބެހޭ ގޮތުން މަޝްވަރާ ކުރި ކަމަށެވެ. އެއްވެސް ތަފްސީލެއް ދީފައެއް ނުވެއެވެ.

ޖުލައި މަހުގެ 15 ވަނަ ދުވަހު ރައީސް މުއިއްޒު އިނގިރޭސިވިލާތައް ފުރާވަޑައިގަތީ މަތީ ފަންތީގެ ބައްދަލުކުރެއްވުންތަކަކާއި ހަރަކާތްތަކެއްގައި ބައިވެރިވެވަޑައިގަތުމަށް ކަމަށް ރައީސް އޮފީހުން ބުނެފައިވެއެވެ. ރައީސް މުއިއްޒުގެ އަރިހުގައި ސަރުކާރުގެ ގިނަ އަދަދެއްގެ މިނިސްޓަރުން ވެސް ގެންދެވިއެވެ.

މިއީ މުއިއްޒު މި އަހަރުގެ ތެރޭގައި އިނގިރޭސިވިލާތައް ކުރައްވާ ރަސްމީ ދެވަނަ ދަތުރުފުޅެވެ.

ޖުލައި މަހުގެ މެދުތެރޭގައި އިނގިރޭސިވިލާތައް ރަސްމީ ދަތުރުފުޅު ކުރައްވާ އިރު ހުސްވި ޖޫން މަހުގެ 30 އިން ޖުލައި 2 ށް އަނބިކަނބަލުންނާއި ސަރުކާރުގެ ބޮޑު ވަފުދަކާ އެކު ސިންގަޕޫރަށް މުއިއްޒު ވަނީ ރަސްމީ ދަތުރުފުޅެއް ކުރައްވާފައެވެ.

އިނގިރޭސި ވިލާތުގެ ރަސްމީ އަދި އަމިއްލަ އެއްވެސް މީޑިއާ އަކުން އަދި މުއިއްޒުގެ ދަތުރުފުޅާ ބެހޭ އެއްވެސް ވާހަކަ އެއް ހާމަ ކޮށްފައެއް ނުވެއެވެ.