ރާއްޖެ އިޝްތިހާރު ކުރަން ލިވަޕޫލާ އެކު އެއްބަސްވުން ހެދިއިރު، ޞަލާޙު ރާއްޖޭގައި ޗުއްޓީ ހޭދަކޮށްފައި ދިޔައިރު ވެސް ނޭނގޭ
ޞަލާޙު ޗުއްޓީ ހޭދަ ކުރުމަށް ރާއްޖެ އައުމަށް ފަހު، އެނބުރި ދިޔަ އިރު ވެސް އެކަން އޮތީ "ސިއްރު"ވެފައި
ލިވަޕޫލްގެ ތަރި ޞަލާޙު ރާއްޖޭގައި ޗުއްޓީ ހޭދަ ކުރި ބައެއް މަންޒަރުތައް
އިނގިރޭސި ފުޓުބޯޅަ ކުލަބު ލިވަޕޫލާ އެކު ރާއްޖެ އިޝްތިހާރު ކުރުމަށް އަގު ބޮޑު ޕާޓްނަރޝިޕެއް ހެދިއިރު، ލިވަޕޫލަށް ކުޅެމުން އަންނަ މިޞްރުގެ ފޯވަރޑް މުޙައްމަދު ޞަލާޙު ރާއްޖެ އައިސް ޗުއްޓީ ހޭދަ ކުރުމަށް ފަހު އެނބުރި ދިޔަ އިރު ވެސް ނޭނގެ އެވެ.
ލިވަޕޫލާ އެކު ރާއްޖެ އިޝްތިހާރު ކުރުމަށް ނިންމައި، އެކަން ހަމަޖައްސާފައިވާ ކަމަށް އިއުލާން ކުރީ މިއަހަރުގެ މާޗު މަހުގެ 13 ވަނަ ދުވަހު އެވެ. އޭގެ ފަހުން، ލިވަޕޫލްގައި ރާއްޖެ އިޝްތިހާރު ކުރުމުގެ ކެމްޕެއިން ފައްޓަވައި ދެއްވުމަށް ކަމަށް ބުނެ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ލިވަޕޫލަށް ވެސް ވަޑައިގެންނެވި އެވެ.
އޭރު ސަރުކާރުން ބުނަމުން ދިޔައީ އެ ސްޕޮންސަރޝިޕްްގެ ދަށުން ރާއްޖެ އަށް އެތައް ފައިދާތަކެއް ވާނެ ކަމަށެވެ. އެގޮތުން ލިވަޕޫލްގެ ވަކި ވަކި ކުޅުންތެރިން މެދުވެރިކޮށް ރާއްޖެ އިޝްތިހާރު ކުރުމުގެ ފުރުސަތު ވެސް ލިބިގެން ދާނެ ކަމަށް ސަރުކާރުން ވަނީ ހާމަކޮށްފަ އެވެ.
އެހެން ނަމަވެސް، ލިވަޕޫލްގައި މިވަގުތު ތިބި ކުޅުންތެރިންގެ ތެރެއިން އެންމެ މުހިންމު އެއް ކުޅުންތެރިޔާ، ޞަލާޙު ޗުއްޓީ ހޭދަ ކުރުމަށް ރާއްޖެ އައުމަށް ފަހު، އެނބުރި ދިޔަ އިރު ވެސް އެކަން އޮތީ "ސިއްރު"ވެފަ އެވެ. ލިވަޕޫލްގެ ބައެއް އޮފިޝަލުން ރާއްޖެ އައިސް އުޅުނުއިރު، މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ވަނީ އެކަން ސޯޝަލް މީޑިއާގައި ވެސް ހިއްސާކޮށްފަ އެވެ.
ނަމަވެސް، ހުސްވި ޖޫން މަހުގެ ތެރޭގައި ޞަލާޙު ރާއްޖެ އައިސް ޗުއްޓީ ހޭދަ ކުރިއިރު، އެމްއެމްޕީއަރުސީ އިން ވެސް، އަދި ސަރުކާރުން ވެސް އެފަދަ ކަމެއް ހާމަކޮށްފައި ނުވެ އެވެ. ޞަލާޙުގެ ސޯޝަލް މީޑިއާގެ އިންސްޓަގްރާމްގައި އޭނާ ވަނީ ރާއްޖޭގައި ޗުއްޓީ ހޭދަ ކުރާ މަންޒަރު ފެންނަ ދެ ފޮޓޯ އެއް ވެސް ހިއްސާކޮށްފަ އެވެ. ނަމަވެސް ޞަލާޙުގެ އެ ޕޯސްޓުގެ ލޮކޭޝަންގައި ރާއްޖެ ނުވަތަ ރާއްޖޭގައި ޗުއްޓީ ހޭދަ ކުރި ކަމެއް ފާހަގަ ކޮށްފައި ނުވެ އެވެ.
ލިވަޕޫލާ އެކު ރާއްޖެ އިން ހަދާފައިވާ އެެއްބަސްވުމުގެ ދަށުން، ރާއްޖެ އިން ލިވަޕޫލަށް ދޭ ފައިސާގެ އަދަދު އެމްއެމްޕީއާރުސީ އިން އަދި ސަރުކާރުން ވެސް ހާމަކޮށްފައި ނުވެ އެވެ.
އެމްއެމްޕީއާރުސީ އިން ބުނެފައި ވަނީ އެއްބަސްވުމުގެ އެއްވެސް މައުލޫމާތެއް ހާމަ ކުރުމަކީ ލިވަޕޫލްގެ ވިޔަފާރީގެ މަސްލަހަތަށް އެކަމުގެ ނުރަނގަޅު އަސަރު ކުރާނެ ކަމެއް ކަމަށެވެ. އެ އެއްބަސްވުމުގައި ސިއްރު މާއްދާއެއް އޮތީ ކަމަށް ބުނެ، އެކަން ހާމަ ކުރުމަށް އެމްއެމްޕީއާރުސީ އިން ވަނީ އޭރު ވެސް ދެކޮޅު ހަދައިފަ އެވެ.
ލިވަޕޫލަށް ރާއްޖެ އިން ދޭ ފައިސާގެ އަދަދު އެމްއެމްޕީއާރުސީ އިން ހާމަކޮށްފައި ނުވި ނަމަވެސް، ރައްޔިތުންގެ މަޖިލީހުގެ ސްޓޭޓް އެންޑް އެންޓަޕްރައިސަސް (އެސްއޯއީ) ކޮމެޓީން އިން ހާމަކޮށްފައިވާ ރިޕޯޓުގައި ބުނެފައިވާ ގޮތުން، 2025 މާޗު 13 އިން ފެށިގެން، 2028 މެއި 31 ވަނަ ދުވަހުގެ ނިޔަލަށް ކުރިއަށް ގެންދާ އެ ކެމްޕެއިންގައި، އެމްއެމްޕީއާރުސީ އިން މިއަހަރު 20 މިލިއަނަނަށް ވުރެ ގިނަ ރުފިޔާ ޚަރަދު ކުރުމަށް ވަނީ ހިމަނައިފަ އެވެ.
