އެފްއޭއެމްގެ އިންތިޚާބަށް ހުޅުވާލައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ހިންގާ ކޮމެޓީގެ އިންތިާޚާބުގައި ވާދަ ކުރުމުގެ ފުރުސަތު ހުޅުވާލައިފި އެވެ.

އެފްއޭއެމް އިން ވަނީ ހޮނިހިރު ދުވަހު އިންތިޚާބުގައި ވާދަ ކުރުމުގެ ފުރުސަތު ހުޅުވާލައިފަ އެވެ. އިންތިޚާބުގައި ވާދަ ކުރުމަށް ފޯމު ހުށަހެޅުމުގެ މުއްދަތު ހަމަވާނީ ޖުލައި މަހުގެ ހަ ވަނަ ދުވަހު އެވެ.

މީގެ އިތުރުން ކެންޑިޑޭޓުންގެ ކެންޑިޑެންސީ ފޯމުގައި ފުރިހަމަ ނުވެ ހުރި ކަންކަން، ކެންޑިޑޭޓުންނަށް އަންގާނެ ތާރީޚަކީ ޖުލައި ނުވަ ވަނަ ދުވަހެވެ. ފޯމުގައި ފުރިހަމަ ނުވެ ހުރި މައުލޫމާތު އަލުން ހުށަހަޅަން ޖެހޭ ތާރީޚަކީ ޖުލައި 13 ވަނަ ދުވަހެވެ.

އިންތިޚާބަށް ފޯމު ހުށަހަޅާ ކެންޑިޑޭޓުންގެ ފޯމާ މެދު އިލެކްޓޯރަލް ކޮމެޓީ އިން ގޮތެއް ނިންމާނެ އެންމެ ފަހު ތާރީޚަކީ ޖުލައި މަހުގެ 15 ވަނަ ދުވަހެވެ. އިންތިޚާބުގެ ކުރިން ބާއްވާ އެންމެ ފަހުގެ ބައްދަލުވުން ޖުލައި 16 ގައި ބާއްވައި ކެންޑިޑޭޓުންގެ ނަންބަރު ތަރުތީބު ކުރުމަށް ފަހު، ޖުލައި 26 ގައި އިންތިޚާބު އޮންނާނެ އެވެ.

އެފްއޭއެމް އިން ކޮށްފައިވާ އިއުލާންގައި ބުނެފައި ވަނީ އިންތިޚާބު ކުރަނީ ރައީސްގެ އިތުރުން، އެއް ފަސްޓް ނައިބު ރައީސް، ދެ ނައިބު ރައީސުން އަދި ހަތް އޯޑިނަރީ މެމްބަރުންނެވެ.

އެފްއޭއެމްގެ އިންތިޚާބުގައި ވާދަ ކުރާ ފަރާތްތަކުގެ ޝަރުތު ތަކުގެ ތެރޭގައި ކުރިމަތިލާ ފަރާތުގެ އެއްވެސް ޖިނާއީ އަދި މަދަނީ މައްސަލައެއް އޮވެގެން ނުވާނެ އެވެ. އަދި އެފަދަ ޙުކުމެއް އެއްވެސް ޝަރުއީ ކޯޓަކުން ކޮށްފައިވާ މީހަކަށް ވެގެން ނުވާނެ އެވެ.

މީގެ އިތުރުން، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެ މީހެއްގެ އެއްވެސް ކަހަލަ މައްސަލައެއް ބަލަމުން އަންނަ މީހަކަށް ވެސް ވެގެން ނުވާނެ ކަމަށް ޝަރުތު ތަކުގެ ތެރޭގައި ވަނީ ހިމަނައިފަ އެވެ.

އެފްއޭއެމްގެ އިންތިޚާބުގައި ކުރިމަތިލާ ފަރާތަކުން، އެފްއޭއެމްގެ މެމްބަރު ކުލަބު ތަކުގެ ތެރެއިން ފަސް ކުލަބެއްގެ ތާއީދު ސިޓީ ވެސް ހުށަހަޅަން ޖެހެ އެވެ. އޭގެ ތެރޭގައި ފުރަތަމަ ޑިވިޝަންގެ ދެ ކުލަބު ހިމެނެން ޖެހޭނެ އެވެ.

މިހާތަނަށް އެފްއޭއެމްގެ އިންތިޚާބުގައި ވާދަ ކުރާނެކަން ރަސްމީކޮށް އިއުލާން ކޮށްފައި ވަނީ، އެފްއޭއެމްގެ ކުރީގެ ރައީސް އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަޙުމަދު ޠާރިޤް (ޓޮމް) އެކަންޏެވެ.