ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އައު ހިންގާ ކޮމެޓީ އިންތިޚާބު ކުރުމަށް ބާއްވާ އިންތިޚާބު، ޖުލައި މަހުގެ 26 ވަނަ ދުވަހު ބާއްވަން ނިންމައިފި އެވެ.

އެ ތާރީޚުގައި އެފްއޭއެމްގެ އިންތިޚާބު ބާއްވަން ނިންމީ ހުކުރު ދުވަހު ކުރިއަށް ދިޔަ އެފްއޭއެމްގެ އޯޑިނަރީ ކޮންގްރެސްގަ އެވެ. އެއީ އަންނަ ޖުލައި މަހުގެ ނިޔަލަށް، އެފްއޭއެމް ނޯމަލައިޒިން ކޮމެޓީގެ ދައުރު ވެސް ހަމަވާނެތީ އެވެ.

އެގޮތުން ނޯމަލައިޒިން ކޮމެޓީ އިން ވަނީ އެފްއޭއެމް އިންތިޚާބުގެ ޓައިމްލައިން ވެސް އެކުލަވާލައިފަ އެވެ. އިންތިޚާބުގައި ވާދަ ކުރުމުގެ ފުރުސަތު ހޮނިހިރު ދުވަހު ހުޅުވާލާނެ އެވެ. އަދި އެ މުއްދަތު ހަމަވާނީ ޖުލައި މަހުގެ ހަ ވަނަ ދުވަހު އެވެ.

މީގެ އިތުރުން ކެންޑިޑޭޓުންގެ ކެންޑިޑެންސީ ފޯމުގައި ފުރިހަމަ ނުވެ ހުރި ކަންކަން، ކެންޑިޑޭޓުންނަށް އަންގާނެ ތާރީޚަކީ ޖުލައި ނުވަ ވަނަ ދުވަހެވެ. ފޯމުގައި ފުރިހަމަ ނުވެ ހުރި މައުލޫމާތު އަލުން ހުށަހަޅަން ޖެހޭ ތާރީޚަކީ ޖުލައި 13 ވަނަ ދުވަހެވެ.

އިންތިޚާބަށް ފޯމު ހުށަހަޅާ ކެންޑިޑޭޓުންގެ ފޯމާ މެދު އިލެކްޓޯރަލް ކޮމެޓީ އިން ގޮތެއް ނިންމާނެ އެންމެ ފަހު ތާރީޚަކީ ޖުލައި މަހުގެ 15 ވަނަ ދުވަހެވެ. އިންތިޚާބުގެ ކުރިން ބާއްވާ އެންމެ ފަހުގެ ބައްދަލުވުން ޖުލައި 16 ގައި ބާއްވައި ކެންޑިޑޭޓުންގެ ނަންބަރު ތަރުތީބު ކުރުމަށް ފަހު، ޖުލައި 26 ގައި އިންތިޚާބު އޮންނާނެ އެވެ.

ހުކުރު ދުވަހު ކުރިއަށް ދިޔަ އެފްއޭއެމްގެ އޯޑިނަރީ ކޮންގްރެސް އަށް ފަހު ޓޮމް ވިދާޅުވީ އިންތިޚާބުގައި ވާދަ ކުރައްވާނެ ކަމަށެވެ. އަދި އިންތިޚާބުގައި ވާދަ ކުރުމުގެ ފުރުސަތު ހުޅުވާލުމާ އެކު، ފޯމު ހުށަހަޅުއްވާނެ ކަމަށް ވެސް ޓޮމް ވަނީ ވިދާޅުވެފަ އެވެ.

މީގެ ކުރިން ވެސް އެފްއޭއެމްގެ ރައީސްކަން ކުރައްވާފައިވާ ޓޮމް ވަނީ، އެންމެ ފަހުން ބާއްވަން މަސައްކަތް ކުރި ދެ އިންތިޚާބުގައި ވާދަ ކުރުމަށް ވެސް ފޯމު ހުށަހަޅުއްވައިފަ އެވެ. ނަަމަވެސް، ފަހުން އެފްއޭއެމް އިން ވަނީ އިންތިޚާބު ކެންސަލް ކޮށްފަ އެވެ.