ހިތަދޫ ނަރުދަމާގެ މައްސަލަ ދިމާވެ، ނަޖިސް ބޭރުވާ މައްސަލަ ބެލުމަކީ މެންޑޭޓްގައި ހިމެނޭ ކަމެއް ނޫން: މިނިސްޓަރު މުއްތަލިބު

އައްޑޫ ސިޓީ ހިތަދޫ ނަރުދަމާގެ މައްސަލަ ދިމާވެ، ރަށު ތެރެއަށް ނަޖިސް ބޭރުވާ މައްސަލަ ބެލުމަކީ މިނިސްޓްރީ އޮފް ކޮސްޓްރަކްޝަން ހައުސިން އެންޑް އިންފްރާސްޓަކްޗަރގެ މެންޑޭޓްގައި ހިމެނޭ ކަމެއް ނޫން ކަމަށް މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ބުދަ ދުވަހު ރައްޔިތުން މަޖިލީހުގެ ޖަލްސާގައި، ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވަނީ އައްޑޫ ސިޓީ ހިތަދޫގައި ގާއިމްކޮށްފައިވާ ނަރުދަމާ ރަނގަޅަށް ނުބެލެހެއްޓުމުގެ ސަބަބުން މައްސަލަ ދިމާވެ، ރަށު ތެރެއަށް ނަޖިސް ބޭރުވާ މައްސަލަ ފާހަގަކުރައްވާފައެވެ. އަދި އެމައްސަލަ ހައްލު ކުރުމަށް މިނިސްޓްރީން މަސައްކަތް ކުރޭތޯއާއި، ރައްޔިތުންނަށް ހައްލު ލިބޭނީ ކިހައި ހިސާބުންތޯ މިނިސްޓަރު މުއްތަލިބުއާ ސުވާލުކުރެއްވިއެވެ.

Advertisement

މިސުވާލުތަކަށް މިނިސްޓަރު މުއްތަލިބު ވިދާޅުވީ މިނިސްޓްރީ އޮފް ކޮސްޓްރަކްޝަން ހައުސިން އެންޑް އިންފްރާސްޓަކްޗަރގެ މެންޑިޑޭޓަކީ ޕްރޮޖެކްޓްތައް ފޯމިއުލޭޓްކޮށްފައި ކުރިއަށް ގެންދިއުން ކަމަށެވެ. އަދި މިކޭސް ބަލައި، ޖަވާބުދާރީވާން ޖެހޭނީ އެންވަޔަރަމެންޓް މިނިސްޓްރީން ކަމަށެވެ.

މިނިސްޓްރީ އޮފް ކޮސްޓްރަކްޝަން ހައުސިން އެންޑް އިންފްރާސްޓަކްޗަރގެ މެންޑިޑޭޓަކީ ޕްރޮޖެކްޓްތައް ފޯމިއުލޭޓްކޮށްފައި ކުރިއަށް ގެންދިއުން. ޕްރޮޖެކްޓްތައް ނިންމާފައި ހަވާލުވުމަށްފަހު އޮޕަރޭޓަރާ އެއްކޮށް ދެން އެކަމާ ގުޅޭ މިނިސްޓްރީތަކުން އެ ބަލަހައްޓަމުން ގެންދަނީ. މިކޭސްގައި އެންވަޔަރަމެންޓް މިނިސްޓްރީން. އެހެންވީމަ އަޅުގަނޑުމެންގެ މިނިސްޓްރީއާ ސީދާ ގުޅުމެއް އޮތް ކަމަކަށްނުވާތީ ތި ވިދާޅުވި ކަންތައްތައް އަޅުގަނޑުމެންނަށް ފާހަގަނުވެފައިނުވޭ. ނަމަވެސް އައު ޕްރޮޖެކްޓެއްގެ ގޮތުގައި ކަމެއް ކުރަންޖެހޭ ކަމަށްވަންޏާ ސަރުކާރުގެ ކަމާގުޅޭ އިދާރާތަކުން އަންގައިފިކަމަށްވަންޏާ ދެން އެކަމަށް ގެންނަންޖެހޭ ހައްލެއް އަޅުގަނޑުމެން ގެނައުމުގެ މަސައްކަތް ކުރާނަން

ކޮންސްޓްރަކްޝަން އެންޑް ހައުސިންގ މިނިސްޓަރު ޑރ. އަބްދުﷲ މުއްތަލިބު

ހިތަދޫގައި ގާއިމްކޮށްފައިވާ ނަރުދަމާގެ މައްސަލަ ދިމާވެ، ނަޖިސް މަގުތަކަށް ބޭރުވާ މައްސަލަ ބޮޑެވެ. މޫސުން ގޯސްވެ، ބޯކޮށް ވާރޭވެހޭނަމަ ވަރަށް ބޮޑަށް މި މައްސަލަ ކުރިމަތިވެއެވެ.

މިކަމުގެ ކަންބޮޑުވުން ރައްޔިތުންފާޅު ކުރި ނަމަވެސް މިމައްސަލައަށް ހައްލު ހޯދައިދިނުމަށް މި ސަރުކާރުން މަސައްކަތް ނުކުރާ ކަމަށް އެރަށުގެ ގިނަ ރައްޔިތުން ދަނީ ބުނަމުންނެވެ.