އިސްރާއީލަށް ހަމަލާ ދިނުމުގައި އިސްރާއީލުގެ ވައިގެ ސަރަހައްދުގެ ފުރިހަމަ ކޮންޓްރޯލް އީރާނަށް ލިބިފައިވާ ކަމަށް އީރާނުގެ އަސްކަރިއްޔާ އިން ބުނެފިއެވެ.

އީރާނުގެ ރިވޮލިއުޝަން ގާޑް ކޯޕްސް (އައި.އާރް.ޖީ.ސީ) އިން އިސްރާއީލާ ދެކޮޅަށް އެންމެ ފަހުން ދިން ހަމަލާތަކާ ގުޅޭގޮތުން ވަނީ ބަޔާނެއް ނެރެފައެވެ.

އީރާނުގެ ނިއުސް އެޖެންސީތަކުން ގެނެސްދިން އެ ބަޔާނުގައި، އައި.އާރް.ޖީ.ސީ އިން ބުނެފައިވަނީ އެމީހުންގެ "ވަރުގަދަ" ފަތަޙް މިސައިލްތައް އިސްރާއީލުގެ މިސައިލް ދިފާޢީ ނިޒާމު ފޫއަޅުވާލުމަށް ފަހު ވަދެ، "އީރާނުގެ ބާރުގަދަ މެސެޖެއް" އަދާވާތްތެރިންނަށް ދީފައިވާ ކަމަށެެވެ.

އެ ބަޔާނުގައި ބުނެފައިވަނީ މި މިސައިލް ހަމަލާއިން "ދައްކުވައި ދިނީ އީރާނަށް އިސްރާއީލުގެ ސަރަހައްދަށް ވައިގެ މަގުން ހަމަލާ ދިނުމަށް މުޅިން ކޮންޓްރޯލް ލިބިފައިވާ ކަމާއި އަދި އެތަނުގެ ރައްޔިތުން އީރާނުގެ ހަމަލާ ތަކުން ދިފާޢު ވެފައި ނުވާ" ކަމަށެވެ.

އިސްރާއީލުގެ މީޑިއާތަކުން ބުނާގޮތުގައި، އެންމެ ފަހުގެ ހަމަލާ އިން ތެލް އަވީވުގެ ސަރަހައްދުން ގޮވުންތަކެއް އިވި، އަދި ޕާކިންގ ސަރަހައްދެއްގައި އަލިފާން ރޯވިއެވެ.

އިސްރާއީލުން ސްޓްރެޓެޖިކް ސައިޓްތަކަށް އަރާ ހަމަލާތައް ވަރަށް ބޮޑަށް ސެންސަރު ކުރަމުން ގެންދާތީ އީރާނުގެ ހަމަލާތަކުގެ ހަގީގީ ގެއްލުމާ ބެހޭ ސައްހަ މައުލޫމާތު ސާފު ނުވާ ކަމަށް އަލް ޖަޒީރާ އިން ބުނެފައިވެއެވެ.

އައި.އާރް.ޖީ.ސީ އިން އިސްރާއީލުގެ ވައިގެ ސަރަހައްދުގެ ކޮންޓްރޯލް އީރާނަށް ލިބިފައިވާ ކަމަށް ބުނުމުގެ ކުރިން އެމެރިކާގެ ރައީސް ޓްރަމްޕް ވަނީ އީރާނުގެ ވައިގެ ސަރަހައްދުގެ މުޅި ކޮންޓްރޯލް ލިބިފައިވާކަމަށް ވިދާޅުވެ، އެއްވެސް ޝަރުތަކާ ނުލާ ހަމަލާތައް ހުއްޓާލުމަށް އީރާނަށް ގޮވާލައްފައެވެ.

އީރާނާ ދެކޮޅަށް އިސްރާއީލުގެ ވެރިކަމުން ހުކުރު ދުވަހުގެ ރޭ ފެށި އަނިޔާވެރި ހަމަލާތަކަށް ޖަވާބުދާރީ ވުމުގެ ގޮތުން އީރާނުން ހިންގަމުންދާ އަސްކަރީ އޮޕަރޭޝަންގެ އެގާރަ ވަނަ ބުރު ފެށުނީ އީރާނުގެ ގަޑިން ބުދަ ވިލޭރޭ ގާތްގަނޑަކަށް ދަންވަރު 1:30 ގައެވެ.

އިސްރާއީލުގެ ސަރުކާރުން މީޑިއާ ސެންސަރު ކުރުމަށް އަޅާފައިވާ ހަރުކަށި ފިޔަވަޅުތަކާ އެކުވެސް، އީރާނުގެ އެޑްވާންސްޑް މިސައިލްތައް އިސްރާއީލުގެ ތިން ލެވެލް އެއްގައި ހަރަކާތްތެރިވާ ދިފާއީ ނިޒާމު ފޫއަޅުވާލުަމަށް ފަހު ތެލް އަވީވް ގެ ސަރަހައްދަށް ވަނުމާއެކު އުޑުމަތި ވިދުވަރެއްހެން އަލިވެގެން ދިޔަ މަންޒަރު ދައްކުވައިދޭ ގިނަ ވީޑިއޯތަކެއް ސޯޝަލް މީޑިއާގައި ފެތުރިފައިވެއެވެ.

މިސައިލްތަކުގެ ތެރެއިން ބައެއް މިސައިލް ތަކަކީ ފުރަތަމަ ފަހަރަށް ބޭނުން ކުރެވުނު މިސައިލްތަކެއް ކަމަށް އީރާނުގެ މީޑިއާ ރިޕޯޓުތައް ބުނެއެވެ. އެ މިސައިލްތައް އަމާޒު ކުރެވުނު ތަންތަނަށް ވަރަށް ސީދާކޮށް ޖެހުނު ކަމަށާއި، އޭގެ ތެރޭގައި އަސްކަރީ އަދި އިންޓެލިޖެންސް ތަންތަން ހިމެނޭ ކަމަށް ބުނެފައިވެއެވެ.

އީރާނުގެ އަސްކަރީ ބާރުތަކުގެ ޗީފް އޮފް ސްޓާފްގެ މަޤާމަށް އަލަށް އައްޔަނު ކުރި މޭޖަރ ޖެނެރަލް ސައްޔިދު އަބްދުލްރަހީމް މޫސަވީ، ޓީވީން ދެއްކި މެސެޖެއްގައި ވިދާޅުވެފައިވަނީ ހުކުރު ދުވަހުން ފެށިގެން މިހާތަނަށް ކުރިއަށް ގެންދެވުނު އޮޕަރޭޝަންތަކަކީ ހަނގުރާމައިން ދުރުހެލިވުމަށް އިސްރާއީލަށް ދެވުނު އިންޒާރެއްގެ ގޮތުގައި ކަމަށާއި، އަސްލު އަދަބު ދިނުމުގެ އޮޕަރޭޝަންތައް ނިކަން އަވަހަށް ކުރިއަށް ގެންދެވޭނެ ކަމަށެވެ.

"އީރާނުގެ މަތިވެރި ޤައުމު، ތާރީޚުން ދައްކުވައިދޭ ފަދައިން، އެއްވެސް އަނިޔާވެރި ޢަމަލަކަށް ބޯނުލަނބާ، މި އަނިޔާވެރި ޢަމަލާ ދެކޮޅަޮޅަށް ސާބިތުކަމާއެކު ތެދުވެ، އިރާދަކުރެއްވިއްޔާ ޒަޔަނިސްޓް ވެރިކަމުގެ ކުށްތަކަށް އަދަބު ދޭނެ" ކަމަށް އޭނާ ވިދާޅުވިއެވެ.

މި ހަމަލާތަކަކީ އޮޕަރޭޝަން ޓްރޫ ޕްރޮމިސް III ގެ ނަމުގައި ދެމުންދާ ހަމަލާތަކެކެވެ. މި އޮޕަރޭޝަން ފެށުނީ ހުކުރު ދުވަހުގެ ރޭގެ ވަގުތެއްގައި، އީރާނާ ދެކޮޅަށް އިސްރާއީލުން ދިން ހަމަލާއަށް ބަދަލު ހިފުމުގެ ގޮތުންނެވެ. އެ ހަމަލާގައި ގިނަ އަދަދެއްގެ ސިފައިންގެ އިސް ވެރިންނާއި، ނިއުކްލިއަރ ސައިންޓިސްޓުންނާއި، އާންމު ރައްޔިތުން މަރުވެފައިވެއެވެ.