ބަޔާނުން ދިހަ ލަނޑުގެ މޮޅެއް ހޯދިއިރު، މުސިއާލާ ހެޓްރިކް ހަދައިފި

ފީފާ ކުލަބު ވޯލްޑް ކަޕްގެ ގުރޫޕް ސީގައި އޯކްލޭންޑް ސިޓީއާ ދެކޮޅަށް ކުޅުނު މެޗުން، ޖަރުމަނުގެ ބަޔާން މިއުނިކް ބޮޑު މޮޅެއް ހޯދައިފި އެވެ.

އާދީއްތަ ދުވަހުގެ ރޭ އޯކްލޭންޑާ ދެކޮޅަށް ކުޅުނު މެޗު ބަޔާނުން ކާމިޔާބު ކުރީ 10-0 އިންނެވެ. މެޗުގެ ފުރަތަމަ ހާފުގައި ބަޔާނުން ހަ ލަނޑު ޖެހިއިރު، ދެ ވަނަ ހާފުގައި ވަނީ ހަތަރު ލަނޑު ޖަހައިފަ އެވެ.

މެޗު ފަށައިގެން ހަ ވަނަ މިނެޓުގައި ބަޔާނަށް ލީޑު ނަގައިދިނީ ކިންގްސްލީ ކޯމަން އެވެ. އޭގެ ފަހުން ފުރަތަމަ ހާފުގެ 18 ވަނަ މިނެޓުގައި ބަޔާންގެ ދެ ވަނަ ލަނޑު ޖެހީ ޝާޝާ ބޯއޭ އެވެ. އޭގެ ދެ މިނެޓު ފަހުން މައިކަލް އޮލައިސޭ ވަނީ ބަޔާންގެ ތިން ވަނަ ލަނޑު ޖަހައިފަ އެވެ.

ތިން ވަނަ ލަނޑު ޖެހިތާ މިނެޓެއް ފަހުން ކޯމަން ވަނީ ބަޔާންގެ ހަތަރު ވަނަ ލަނޑު ޖަހައިފަ އެވެ. މެޗުގެ ފުރަތަމަ ހާފުގެ 45 ވަނަ މިނެޓުގައި ބަޔާންގެ ފަސް ވަނަ ލަނޑު ތޯމަސް މުލާ ޖެހިއިރު، ފުރަތަމަ ހާފުގެ އިތުރު ވަގުތުގައި އޮލައިސޭ ވަނީ ބަޔާންގެ ހަ ވަނަ ލަނޑު ޖަހައިފަ އެވެ.

މެޗުގެ ދެ ވަނަ ހާފުގައި ބަޔާނަށް ކުޅެމުން އަންނަ ޖަރުމަނުގެ ޖަމާލް މުސިއާލާ ވަނީ ތިން ލަނޑު ޖަހައި ހެޓްރިކް ހަދައިފަ އެވެ. އެއީ މެޗުގެ 67 ވަނަ މިނެޓާއި، 73 ވަނަ މިނެޓު އަދި 84 ވަނަ މިނެޓުގައި އޭނާ ޖެހި ލަނޑުތަކެވެ. އޭގެ ތެރެއިން އެއް ލަނޑަކީ ބަޔާނަށް ލިބުނު ޕެނަލްޓީއެއް ކާމިޔާބު ކޮށްގެން އޭނާ ޖެހި ލަނޑެކެވެ.

އޭގެ ފަހުން މެޗުގެ ފުރިހަމަ ވަގުތު ހަމަވާން މިނެޓަކަށް ވެފައި ވަނިކޮށް، ބަޔާންގެ ހަ ވަނަ ލަނޑު ޖެހީ މުލާ އެވެ.

މުބާރާތުގައި ބަޔާންގެ ދެ ވަނަ މެޗުގައި ނިކުންނާނީ ބޮކާ ޖޫނިއާސްއާ ދެކޮޅަށެވެ. އޯކްލޭންޑުގެ ދެ ވަނަ މެޗުގައި އެ ޓީމު ނިކުންނާނީ ބެންފީކާއާ ދެކޮޅަށެވެ.