އީރާނާ އިސްރާއީލާ ދެމެދު ހިނގާ ހަނގުރާމައިގައި އިސްރާއީލަށް އެހީތެރިީތެރިވެދާނެކަމުގެ އިޝާރާތެއް އިނގިރޭސިވިލާތުގެ މާލީ ވަޒީރު ދެއްވައިފިއެވެ.

ހަނގުރާމައިގައި އިސްރާއީލަށް އެހީތެރި ވެވިދާނެ ކަމަށް އޭނާ ވަނީ ވިދާޅުވެފައެވެ. ނަމަވެސް މެދުއިރުމަތީ ސަރަޙައްދަށް އިތުރު ހަނގުރާމަމަތީ ޖެޓް މަތިންދާބޯޓު ފޮނުވުމަށް ނިންމާފައިވަނީ މައިގަނޑު ގޮތެއްގައި އެ ގައުމުގެ އަސްކަރީ މަރުކަޒުތަކާއި މުވައްޒަފުން ރައްކާތެރި ކުރުމަށް ކަމަށް އިނގިރޭސި މާލީ ވަޒީރު ރޭޗެލް ރީވްސް އާދީއްތަ ދުވަހު ވިދާޅުވެފައިވެއެވެ.

އިސްރާއީލާއި އީރާނުން އާދީއްތަ ދުވަހުގެ ފަތިހު ވަނީ އެއްބަޔަކު އަނެއްބަޔަކަށް އަލުން ވަރުގަދަ ހަމަލާތަކެއް ދީފައެވެ.

އިސްރާއީލުން މިހާތަނަށް ދީފައިވާ ހަމަލާތަކަކީ ކުރިއަށް އޮތް ދުވަސްތަކުގައި އީރާނަށް ފެންނާނެ ހަމަލާތަކާ އަޅާބަލާ އިރު އެއްޗެއް ނޫން ކަމަށް ބޮޑުވަޒީރު ބެންޖަމިން ނަތަންޔާހޫ ހާމަ ކޮށްފައިވެއެވެ.

ސްކައި ނިއުސް އަށް ވާހަކަ ދައްކަވަމުން ރީވްސް ވިދާޅުވީ، މި ހަނގުރާމަ ހުއްޓާލުމަށް އިނގިރޭސި ވިލާތުން ގޮވާލާ ކަމަށާއި، އެ ސަރަޙައްދަށް އިތުރު ޖެޓް މަތިންދާބޯޓު ފޮނުވަނީ "ރައްކާތެރިކަމުގެ ގޮތުން އެޅި ފިޔަވަޅެއް" ގެ ގޮތުގައި ކަމަށެވެ.

އިސްރާއީލަށް އެހީތެރިވުމަށް އެދިއްޖެ ނަމަ އިނގިރޭސި ވިލާތުން އެކަން ކުރާނެތޯ ސުވާލު ކުރުމުން ރީވްސް ވިދާޅުވީ، "ކުރީގައި ވެސް އިސްރާއީލަށް މިސައިލް ހަމަލާ އައިސްފައި ވާއިރު އިނގިރޭސި ވިލާތުން އެހީތެރި ވެފައި ވާނެ" ކަމަށެވެ.

އަދި އިތުރަށް ވިދާޅުވީ، އަސްކަރީ އެސެޓްތައް ފޮނުވަނީ "އިނގިރޭސި ވިލާތުގެ މަސްލަހަތު ރައްކާތެރިކުރުމަށާއި އަދި އެކުވެރިންނަށް އެހީތެރިވުމަށް" ކަމަށެވެ.

އިނގިރޭސި ވިލާތުން ވަނީ ފާއިތުވި އަހަރު އީރާނުން އިސްރާއީލަށް ދިން މިސައިލް ހަމަލާތަކުން އިސްރާއީލް ރައްކާތެރިކުރުމުގައި ބައިވެރިވެފައެވެ.

އޭޕްރީލް މަހު އިނގިރޭސިވިލާތުގެ މަތިންދާ ބޯޓުތަކުން ވަނީ އިސްރާއީލަށް ދަތުރު ކުރަމުން ދިޔަ އީރާނުގެ ޑްރޯންތަކެއް ވައްޓާލާފައެވެ. އަދި އޮކްޓޯބަރު މަހު އިނގިރޭސި ވިލާތުން ބުނެފައި ވަނީ އެ ޤައުމުގެ ދެ ޖެޓާއި އެއަރ-ޓު-އެއަރ ރީފިއުލިންގ ޓޭންކަރެއް އީރާނުގެ މިސައިލްތައް ހުއްޓުވުމުގެ މަސައްކަތުގައި ބައިވެރިވެފައިވާ ކަމަށެވެ. ނަމަވެސް މި ޖެޓްތަކުން އެއްވެސް އަމާޒަކަށް ހަމަލާދީފައި ނުވާނެ ކަމަށް ބުނެފައިވެއެވެ.