ފަހަތުން އަރައި އާޖެންޓީނާ އިން ކޮލަމްބިއާ އާއި އެއްވަރު ކޮށްފި

ފީފާ ވާރލްޑް ކަޕް ކޮލިފިކޭޝަންގެ ދެކުނު އެމެރިކާ ސަރަހައްދުގެ ކޮލިފިކޭޝަންގައި ކޮލަމްބިއާ އާއި ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން އާޖެންޓީނާ އެއްވަރުވެއްޖެ އެވެ.

ބުދަ ދުވަހުގެ ފަތިހު ކޮލަމްބިއާ އާއި ދެކޮޅަށް ނިކުތްއިރު ވެސް، މި ސަރަހައްދުގެ އެއް ވަަނައިގައި އޮތީ އާޖެންޓީނާ އެވެ. ކޮލަމްބިއާ އޮތީ މި ސަރަހައްދުގެ ހަ ވަނައިގަ އެވެ.

ކޮލަމްބިއާ އާއި ދެކޮޅަށް ކުޅުނު މެޗުގެ ފުރަތަމަ 11 ގައި އާޖެންޓީނާގެ ކެޕްޓަން ލިއޮނަލް މެސީ ވަނީ ހިމަނައިފަ އެވެ. އޭގެ ކުރިން ޗިލީއާ ދެކޮޅަށް ކުޅެ އާޖެންޓީނާ މޮޅުވި މެޗުގައި މެސީ ކުޅުނީ ބަދަލު ކުޅުންތެރިޔެއްގެ ގޮތުގަ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ވެސް ކޮލަމްބިއާ އިންނެވެ. ފުރަތަމަ ހާފުގައި އެ ޓީމުން ލީޑު ނެގިއިރު، މެޗުގެ ފަހު ވަގުތުގެ ތެރޭގައި އާޖެންޓީނާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ.

މެޗުގެ ފުރަތަމަ ހާފުގެ 24 ވަނަ މިނެޓުގައި ކޮލަމްބިއާ އަށް ލީޑު ނަގައިދިނީ ލުއިސް ޑިއާޒް އެވެ. އެ ލަނޑު އޭނާ ޖެހީ ކެވިން ކަސްޓަނޯ ތަނަވަސްކޮށްދިން ފުރުސަތެއްގަ އެވެ.

މެޗުގެ ދެ ވަނަ ހާފުގައި، ފުރިހަމަ ވަގުުތު ހަމަވާން ނުވަ މިނެޓަށް ވެފައި ވަނިކޮށް އާޖެންޓީނާ އިން ވަނީ ލަނޑު ޖަހައި ނަތީޖާ ހަމަހަމަ ކޮށްފަ އެވެ. އެ ލަނޑު އާޖެންޓީނާ އަށް ޖަހައިދިނީ ތިއާގޯ އަލްމަޑާ އެވެ. އެއީ އެކްސިކުއެލް ޕަލަސިއޯސް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މޮޅާއެކު އާޖެންޓީނާ އަށް ވަނީ އެއް ވަނައިގައި 10 ޕޮއިންޓުގެ ލީޑެއް ލިބިފަ އެވެ. ކޮލިފިކޭޝަންގައި އާޖެންޓީނާ އިން ކުޅުނު 16 މެޗުން އެ ޓީމަށް ލިބެނީ 35 ޕޮއިންޓެވެ. ހަމަ އެ އަދަދަށް މެޗު ކުޅެގެން ދެ ވަނައިގައި އޮތް އެކުއެޑޯ އަށް ލިބެނީ 25 ޕޮއިންޓެވެ.

އާޖެންޓީނާ އަތުން ހޯދި ޕޮއިންޓާ އެކު ކޮލަމްބިއާ ހަ ވަނައިގައި އޮތީ 16 މެޗުން 22 ޕޮއިންޓާ އެކު އެވެ.