އިސްރާއީލުގެ ހަމަލާތަކުން އާދިއްތަ ދުވަހު ޣައްޒާ ގައި 31 މީހުން ޝަހީދު ވެއްޖެ
އާދިއްތަ ދުވަހު ޝަހީދު ވި މީހުންނަކީ ދެކުނު ޣައްޒާގައި ބަނޑުހައިހޫނުކަމުގެ ސަބަބުން އެހީއަށް އެދި އުޅުނު ފަލަސްތީނު ބައެއްގެ ތެރެއަށް އިސްރާއީލު ސިފައިން ބަޑިޖެހުމުގެ ސަބަބުން ޝަހީދުވި ބައެކެވެ.
އީދު ދުވަހު ބައިތު ލަހިޔާ ސަރަހައްދަށް އިސްރާއީލު ސިފައިން ދިން ހަމަލާ އެއްގައި ޝަހީދުވި ބައެއްގެ ޖަނާޒާގައި ބައިވެރިވި ފަލަސްތީނުގެ ދެކުދިން ހިތާމަ ކުރަނީ
އިސްރާއީލުގެ ހަމަލާތަކުން އާދިއްތަ ދުވަހު ޣައްޒާ ގައި 31 މީހުން ޝަހީދު ވެއްޖެ އެވެ.
އަނެއް ކޮޅުން ޣައްޒާގެ ސިއްހީ އޮފިޝަލުން ގެންދަނީ ހޮސްޕިޓަލު ތަކުގައި ޖަނަރޭޓަރު ހިންގުމަށް ތެލަށް އާދޭސް ކުރަމުންނެވެ.
ޣައްޒާގެ ސިއްހީ ވުޒާރާގެ ޑިރެކްޓަރު އިންޒާރު ދެއްވާފައި ވަނީ ޖަނަރޭޓަރުތައް ހިންގުމަށް ތެޔޮ ނުލިބިއްޖެ ނަމަ 48 ގަޑިއިރު ތެރޭގައި ހޮސްޕިޓަލްތައް "ގަބުރުސްތާނަކަށް" ވެދާނެ ކަމަށެވެ.
އާދިއްތަ ދުވަހު ޝަހީދު ވި މީހުންނަކީ ދެކުނު ޣައްޒާގައި ބަނޑުހައިހޫނުކަމުގެ ސަބަބުން އެހީ އަށް އެދި އުޅުނު ފަލަސްތީނު ބައެއްގެ ތެރެއަށް އިސްރާއީލު ސިފައިން ބަޑިޖެހުމުގެ ސަބަބުން ޝަހީދުވި ބައެކެވެ.
މި ހާދިސާގައި މަދުވެގެން 14 މީހުން ޝަހީދު ވިއިރު، 100 އަށްވުރެ ގިނަ މީހުން ޒަޚަމްވެފައިވެއެވެ.
ޣައްޒާ އަށް ކޮންމެހެން ބޭނުންވާ ކާބޯތަކެތި ފޯރުކޮށް ދިނުމުގެ މަސައްކަތް ކުރާ ޣައްޒާ ހިއުމެނިޓޭރިއަން ފައުންޑޭޝަނުން އިސްރާއީލުގެ އަނިޔާވެރި ކަމުގެ ސަބަބުން އިހްތިޖާޖު ކުރުމަށް އިއްޔެ މަސައްކަތް ހުއްޓާލައިގެން ތިބުމަށްފަހު މިއަދު ވަގުތީ ގޮތުން އެހީގެ ދެ މަރުކަޒެއް ހުޅުވާލިއެވެ.
މޭ 27 އިން ފެށިގެން އެތަނުގެ މަރުކަޒުތަކުން އެހީ ހޯދަން އުޅުނު މީހުންގެ ތެރެއިން 100 ށް ވުރެ ގިނަ މީހުން އިސްރާއީލުގެ ހަމަލާތަކުން ޝަހީދުވެފައި ވެއެވެ.
ޣައްޒާގެ ސިއްހީ ވުޒާރާގެ ބަޔާނުގައިވާ ގޮތުން، ޣައްޒާއާ ދެކޮޅަށް އިސްރާއީލުން ކުރަމުންދާ ހަނގުރާމައިގައި މަދުވެގެން 54,880 ފަލަސްތީނު މީހުން ޝަހީދުވެ، 126,227 މީހުން ޒަޚަމްވެފައިވެއެވެ.
