ސީޕީ މަގާމުގެ އިންޓަވިއު ކޮށްފި، އީދު ބަންދަށްފަހު އައްޔަން ކުރަނީ

ޕޮލިސް ކޮމިޝަނަރު (ސީޕީ)ގެ މަގާމަށް ކުރިމަތިލީ އެންމެންނާ އިންޓާވިއުކޮށްފިއެވެ.

ޕޮލިސް ކޮމިޝަނަރުގެ މަގާމަށް ކުރިމަތިލާނ ހޯމް މިނިސްޓްރީން ހުޅުވާލި ފުރުސަތުގައި އެ މަގާމަށް ކުރިމަތިލީ އެކްޓިން ކޮމިޝަނަރުގެ މަގާމުުގައި ހުންނެވި އިސްމާއިލް ނަވީން އާއި ކުރީގެ އެކްޓިން ސީޕީ ފަރުހާދު ފިކުރީ އަދި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރު އަހްމަދު ޝަމީމް އެވެ.

މައުލުމާތު ލިބިފައިވާ ގޮތުގައި އެ މަގާމަށް ކުރިމަތިލި ފަރާތްތަކަށް އިންޓަވިއުކޮށް ލިބުނު މާކްސްތައް މިދިޔަ ހަފްތާގައި މިނިސްޓްރީއަށް ވަނީ ފިނުވާފައެވެ. އަދި އީދު ބަންދަށް ފަހު އެ މަގާމަށް ބޭފުޅަކު އައްޔަން ކުރާނެ ކަމުގެ މައުލޫމާތު ވަނީ ލިބިފައެވެ.

ކޮމިޝަނާ އޮފް ޕޮލިސްގެ މަގާމު ހުސްވީ އެ މަގާމުގައި ހުންނެވި އަލީ ސުޖާއު އިސްތިއުފާދެއްވުމުންނެވެ. އެޕްރީލް 26، ގައި އޭނާ އިސްތިއުފާދެއްވީ އާއިލީ ބައެއް ޒިންމާތަކުގެ އިތުރުން އޭޕްރީލް 18، ގެ ފަތިހު ހެންވޭރު އިމާރާތެއްގެ މަތިން ވެއްޓި ބޮޑެތި އަނިޔާއެއް ވި ހައްވާ ޔުމްނު ވެއްޓުނު ހާދިސާގެ ތަހުގީގާ ގުޅިގެން ކުރިމަތިވި ފާޑުކިޔުންތަކާ ގުޅިގެންނެވެ.

ސުޖާއުގެ އިސްތިއުފާއަށްފަހު ފުލުހުންގެ ހިދުމަތް ހިންގެވުން ފުރަތަމަ ހަވާލުކުރެއްވީ ޑެޕިއުޓީ ކޮމިޝަނަރު ފަރުހާދު ފިކުރީއާ އެވެ. ނަމަވެސް އާންމުންގެ ފާޑުކިޔުންތައް އަމާޒުވެ އޭގެ އިރުކޮޅެއް ފަހުން ހޯމް މިނިސްޓްރީން ވަނީ އެ ނިންމުން ބަދަލުކޮށް، ޑެޕިއުޓީ ކޮމިޝަނަރު އިސްމާއިލް ނަވީންއާ މަގާމު ވަގުތީ ގޮތުން ހަވާލުކޮށްފަ އެވެ.