ކަރަންޓު ކެނޑުނު މައްސަލަ އާއްމު ރައްޔިތުންނަށް ގަބޫލުކުރެވޭ ގޮތަށް ތަހުގީގު ކުރިއަށް ގެންދިއުމަށް މެންބަރު މީކާއިލް...

ރާއްޖެ ދުނިޔެ ކުޅިވަރު ވިޔަފާރި/އިގްތިސާދު ސިއްހަތު ރިޕޯޓު ލައިފް ސްޓައިލް ލުއިޚަބަރު ވާހަކަ ފޮޓޯ

ކ. މާލެ

2 ޖޫން 2025 | ހޯމަ 13:40

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަދައްކަވަނީ

މަޖިލިސް

މާލެއިން ކަރަންޓު ކެނޑުނު މައްސަލަ

ކަރަންޓު ކެނޑުނު މައްސަލަ އާއްމު ރައްޔިތުންނަށް ގަބޫލުކުރެވޭ ގޮތަށް ތަހުގީގު ކުރިއަށް ގެންދިއުމަށް މެންބަރު މީކާއިލް ގޮވާލައްވައިފި

ބައިނަލްއަގުވާމީ ވައިގެ ބަނދަރަކަށް އެންމެ މުހިންމު ސިގްނަލްއަކީ ކަރަންޓުގެ ޚިދުމަތް

މި މައްސަލާގައި ސަރުކާރަށް އަދިވެސް އެއްޗެއް ބުނެވިފައިނުވާއިރު، މިއީ ކަންބޮޑުވާ މައްސަލައެއް

މި ސަރުކާރަށް އަދި ކަމާބެހޭ އިދާރާތަކުން ކުރިއަށް ގެންދާ ތަހުގީގުތަކަށް ރައްޔިތުންގެ އިތުބާރެއް ނެތް

އަމްނާ އިމާދު

2,241

މާލެ، ހުޅުމާލެއިން ކަރަންޓު ކެނޑުނު މައްސަލަ އާއްމު ރައްޔިތުންނަށް ގަބޫލުކުރެވޭ ގޮތަށް މިނިވަން ތަހުގީގެއް ކުރިއަށް ގެންގޮސް ދިނުމަށް އާދޭހާއެކު ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ގޮވާލައްވައިފިއެވެ.

ހޯމަ ދުވަހު ކުރިއަށް ގެންދިޔަ ރައްޔިތުން މަޖިލީހުގެ ޖަލްސާގައި މޯލްޑިވްސް ސިވިލް އޭވިއޭޝަން އޮތޯރިޓީގެ ގާނޫނަށް އިސްލާހު ގެނައުމުގެ ބިލުގެ އިބްތިދާއީ ބަހުސްގައި މެންބަރު މީކާއިލް ވިދާޅުވީ ގަބޫލުކުރެވޭ ގޮތުގައި ބައިނަލްއަގުވާމީ ވައިގެ ބަނދަރަކަށް އެންމެ މުހިންމު ސިގްނަލްއަކީ ކަރަންޓުގެ ޚިދުމަތް ކަމަށެވެ.

ނަމަވެސް އާދިއްތަ ދުވަހު ދިވެހިރާއްޖޭގެ ކެޕިޓަލް ސިޓީ އަދި ބައިނަލްއަގުވާމީ ވައިގެ ބަނދަރު އޮތީ ކަރަންޓާ ނުލާ ކަމަށެވެ. އަދި ވައިގެ ބަނދަރުގައި ދެގަޑިއިރު ކަރަންޓު ނެތް ކަމަށް މެންބަރު މީކާއިލް ވިދާޅުވިއެވެ.

މެންބަރު މީކާއިލް ވިދާޅުވީ މިއީ އާދައިގެ މައްސަލައެއް ނޫން ކަމަށާއި، މިނިވަން ތަހުގީގެއް ކުރިއަށް ގެންދަންޖެހޭ ކަމަށެވެ. މި މައްސަލާގައި ސަރުކާރަށް އަދިވެސް އެއްޗެއް ބުނެވިފައިނުވާއިރު، މިއީ ކަންބޮޑުވާ މައްސަލައެއް ކަމަށް މެންބަރު މީކާއިލް ވިދާޅުވިއެވެ.

ހާދިސާއަށް 24 ގަޑިއިރު ވެގެންދަނީ އިއްޒަތްތެރި ރައީސް އަދި ދިވެހި ސަރުކާރަކުން ދިވެހިރާއްޖޭގެ ޕްރޮފެޝަނަލްއަކަށް ވިދާޅުދެވިފައިނެތް ކިހިނެތް ހިނގި ހާދިސާއެއްތޯ. އިއްޒަތްތެރި ރައީސް ވެގެން މިއުޅެނީ ކިހިނެތް ކަމެއް. ވެގެން މިއުޅެނީ ކުޑަ ކަމެއް ނޫން. މިއީ ބޮޑު ކަމެއް. އިއްޒަތްތެރި ރައީސް. ދިވެހިރާއްޖޭގެ ކެޕިޓަލް ސިޓީ މާލެ ފަސް ހަ ގަޑިއިރު ވަންދަން ކަރަންޓާ ނުލާ ހޭދަކުރަން ޖެހުނީމަ އެއީ ބޮޑު ކަމެއް. އެއީ ރައްޔިތުންގެ މަޖިލީހަށް ބަލައިގަންނަންޖެހޭނެ ސީރިއަސް މައްސަލައެއް. އިއްޒަތްތެރި ރައީސް ދިވެހިރާއްޖޭގެ އިންޓަނޭޝަނަލް އެއަރޕޯޓު. އިއްޒަތްތެރި ރައީސް ވެލާނާ އިންޓަރނޭޝަލް އެއަރޕޯޓު ދެގަޑިއިރު ވަންދެން ކަރަންޓު ނެތި ހޭދަކުރަން ޖެހުނީމަ އިއްޒަތްތެރި ރައީސް މިއީ ލަތުވެތި ކަމެއް. އިއްޒަތްތެރި ރައީސް މިއީ މިސަރުކާރުގެ ފެއިލިއަރއެއް.

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް

މި ސަރުކާރަށް އަދި ކަމާބެހޭ އިދާރާތަކުން ކުރިއަށް ގެންދާ ތަހުގީގުތަކަށް ރައްޔިތުންގެ އިތުބާރު ނެތްކަން ފާހަގަކުރައްވައި މެންބަރު މީކާއިލް ވިދާޅުވީ ބޭންކް އޮފް މޯލްޑިވްސް (ބީއެމްއެލް)އިން ބަގާވާތް ކުރުމަށް މަސައްކަތް ކުރި ކަމަށް ބުނެ ތަހުގީގެއް ކުރިއަށް ގެންދިޔަ ކަމަށެވެ. އަދި މެޑިކަލް މާފިޔާއެއް އޮތް ވެސް ހާމަކުރީ ސަރުކާރުން ކަމަށާއި، އެ މައްސަލާގެ ވެސް ތަހުގީގު ފެށި ކަމަށެވެ. ނަމަވެސް މިއިން އެއްވެސް ތަހުގީގަށް ވާނުވާ ނޭނގޭ ކަމަށް މެންބަރު މީކާއިލް ވިދާޅުވިއެވެ.

ރައީީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވަރުގަދަ އިރުޝާދުފުޅެއްގެ ދަށުން ފަށާ ތަހުގީގުތަކުގައި ވާނުވާ އެނގެން ރައްޔިތުން ބޭނުންވާނެ ކަމަށާއި، ކަރަންޓު ކެނޑުނު މައްސަލާގައި އިތުބާރު ކުރެވޭ ފަދަ ގޮތަކަށް ތަހުގީގު ކުރިއަށް ގެންގޮސްދިނުމަށް މެންބަރު މީކާއީލް ގޮވާލެއްވިއެވެ.

އަޅުގަނޑު ގޮވާލަން މިނިވަން އާއްމުންނަށް ގަބޫލުކުރެވޭނެ ކްރެޑިބިލިޓީ ހުންނަ ތަހުގީގެއް މިފަހަރު ކޮށްދެއްވާށޭ. އިއްޒަތްތެރި ރައީސް. އާދޭސްކޮށްފައި މިދަންނަވަނީ މިއީ މުއިއްޒުގެ ވާހަކައެއް ނޫން. މިއީ ޕީއެންސީގެ ވާހަކައެއް ނޫން. މިއީ އަދުގެ ސަރުކާރުގެ ވާހަކައެއް ނޫން. މިދައްކަނީ ދައުލަތެއްގެ ވާހަކަ. އިއްޒަތްތެރި ރައީސް ފަތުރުވެރިންނެއް ނާންނާނެ. މިހާލަތުގައި އޮތް ގައުމަކަށް ފަތުރުވެރިންނެއް ނާންނާނެ އިއްޒަތްތެރި ރައީސް. އާދޭސްކޮށްފައި މިދަންނަވަނީ ތަންކޮޅެއް ރަނގަޅަށް ދަސްކޮށްގެން ކަންކަން ދަސްކޮށްގެން ވައްޓަފާޅި ދަސްކޮށްގެން ސަރުކާރު ހިންގަވާށޭ.

ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމް

މެންބަރު މީކާއިލް ވިދާޅުވީ ދައުލަތް ހިންގަންޖެހޭނީ އުސޫލުގެ ތެރެއިން ކަމަށެވެ. އަދި އެހެން ގައުމުތަކުގައި ކަންކަން ކުރާގޮތް ބަލައި، ދަސްކޮށް ގައުމަށް ދެރަގޮތް ނުވާނެ ގޮތަކަށް ކަންކަން ކުރުމަށް މެންބަރު މީކާއިލް ގޮވާލެއްވިއެވެ.