ރައީސް ޑރ. މުހައްމަދު މުއިއްޒު އުފެއްދެވި ޑިވެލޮޕްމަންޓް ބޭންކް އޮފް މޯލްޑިވްސް ހިންގާ އިމާރާތައް ކުލި ނުދައްކާ ކަމަށް އެސްޓީއޯ އިން ބުނެފިއެވެ.

މައުލޫމާތު ހޯދާ ލިބިގަތުމުގެ ހައްގުގެ ގާނޫނުގެ ދަށުން އާއްމު ފަރާތަކުން އެސްޓީއޯ އަށް ހުށަހެޅި ސުވާލެއްގެ ޖަވާބު ދެމުން އެސްޓީއޯ އިން ބުނީ، އެ ބޭންކު ހިންގުމަށްޓަކައި އެލައިޑް ބިލްޑިންގ އިން ދޫކޮށްފައިވާ ތަނުގެ މަހު ކުލީގެ ގޮތުގައި ކަނޑައަޅާފައި ވަނީ 75،892 ރުފިޔާ ކަމަށެވެ.

އެސްޓީއޯ އިން ބުނެފައިވަނީ "މިހާތަނަށް އެއްވެސް މަހެއްގެ ކުލި އެ ކުންފުންޏަށް ލިބިފައި ނުވާ" ކަމަށެވެ.

ސައްތައިން ސައްތަ ދިވެހި ސަރުކާރުގެ ހިއްސާ އޮންނަ ކުންފުންޏެއްގެ ގޮތުގައި ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް ރައީސް ޑރ. މުޙައްމަދު މުޢިއްޒު އިފްތިތާހު ކޮށްދެއްވީ 16 ނޮވެމްބަރު 2024 ގައެވެ.

ދެމެހެއްޓެނިވި އިޤްތިޞާދީ އަދި އިޖްތިމާޢީ ތަރައްޤީ ކުރިއެރުވުމަށް ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތިން އުފެއްދި ކަމަށް ބުނާ މި ބޭންކުގެ މަޤްޞަދަކީ އުމްރާނީ ތަރައްޤީގެ މަޝްރޫޢުތަކަށް ފައިސާ ހޯދުމާއި، ސިންޑިކޭޓެޑް ފައިނޭންސް މެދުވެރިކޮށް ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫޢުތަކުގައި ދިމާވާ ފައިނޭންސިންގ ގޮންޖެހުންތައް ހައްލުކުރުމާއި، އަދި ބޭރު ފައިސާ ޤައުމުގެ ބޭންކިންގ ނިޒާމުގެ ތެރޭގައި ހިފެހެއްޓުން ކަމަށް ސަރުކާރުން ބުނެފައިވެއެވެ.

މި ބޭންކު އިފްތިތާޙު ކުރެވުމާއެކު، އިޤްތިޞާދީ އަދި މާލީ ތަރައްޤީއަށް ދިގު މުއްދަތުގެ ފައިނޭންސިންގ ޚިދުމަތްތައް މިހާރު ދިވެހިރާއްޖޭގައި ލިބެން ހުންނާނެ ކަމަށް ސަރުކާރުން ބުނެފައިވީ ނަމަވެސް މިހާތަނަށް މި ބޭންކުން އެއްވެސް އަމަލީ މަސައްކަތެއް ނުކުރާ ކަމުގެ ފާޑުކިޔުންތައް ވަނީ އަމާޒު ވެފައެވެ.

މޯލްޑިވްސް މަނިޓަރީ އޮތޯރިޓީން ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑަށް ބޭންކިންގ ލައިސަންސް ދޫކޮށްފައި ވަނީ 13 އޮކްޓޯބަރު 2024 ގައެވެ.