މެސީގެ ދެ ލަނޑާ އެކު މިއާމީ އަށް މޮޅެއް

މޭޖާ ލީގު ސޮކާާ (އެމެރިކާ ލީގު) ގައި ކޮލަމްބަސްއާ ދެކޮޅަށް ކުޅުނު މެޗުން އިންޓަރ މިއާމީ މޮޅުވެއްޖެ އެވެ.

އާދީއްތަ ދުވަހުގެ ފަތިހު ކޮލަމްބަސްއާ ދެކޮޅަށް ކުޅުނު މެޗު މިއާމީ އިން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި މިއާމީ އިން ތިން ލަނޑު ޖެހިއިރު، އަނެއް ދެ ލަނޑު ޖެހީ ދެ ވަނަ ހާފުގަ އެވެ. ފަހު ހާފުގައި ކޮލަމްބަސް އިން ވެސް ވަނީ ލަނޑެއް ޖަހައިފަ އެވެ.

މެޗު ފަށައިގެން 13 ވަނަ މިނެޓުގައި މިއާމީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޓަޑެއޯ އަލަންޑޭ އެވެ.

އޭގެ ދެ މިނެޓު ފަހުން މިއާމީ އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އަދި 24 ވަނަ މިނެޓުގައި މެސީ ޖެހި ލަނޑާ އެކު، މިއާމީ އިން ފުރަތަމަ ހާފު ނިންމާލީ ތިން ލަނޑުގެ ލީޑަކުންނެވެ.

ދެ ވަނަ ހާފުގައި، މެޗުގެ 58 ވަނަ މިނެޓުގައި ސެސާ ރުވަލްކަބާ ވަނީ ކޮލަމްބަސްގެ ހަމައެކަނި ލަނޑު ޖަހައިފަ އެވެ. އޭގެ ފަހުން މެޗުގެ 64 ވަނަ މިނެޓުގައި މިއާމީގެ ހަތަރު ވަނަ ލަނޑު ޖެހީ އުރުގުއޭގެ ލުއިސް ސުއަރޭޒް އެވެ. އަދި މެޗުގައި މިއާމީގެ ފަސް ވަނަ ލަނޑު ޖެހީ ފަފާ ޕިކޯލްޓް އެވެ.

މި މެޗުގައި މެސީ ޖެހި ދެ ލަނޑާ އެކު އޭނާ ވެގެން ގޮސްފައި ވަނީ އެމެރިކާ ލީގުގައި އިންޓަރ މިއާމީ އަށް އެންމެ ގިނަ ލަނޑު ޖަހައިދީފައިވާ ކުޅުންތެރިޔާ އަށެވެ.

ކޮލަމްބަސް އަތުން ހޯދި މޮޅާ އެކު މިއާމީ އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ލީގުގައި ކުޅެފައިވާ 16 މެޗުން 29 ޕޮއިންޓާ އެކު އެވެ. އަށް މެޗުން މިއާމީ މޮޅުވެފައިވާއިރު، ފަސް މެޗު އެއްވަރުވެ އަދި ތިން މެޗުން ވަނީ ބަލިވެފަ އެވެ.