ތަފާތު ބޮޑުކޮށް އިންޓަރ މިލާން ބަލިކޮށް، ޕީއެސްޖީން ޗެމްޕިއަންސް ލީގު ކާމިޔާބު ކޮށްފި

ޔުއެފާ ޗެމްޕިއަންސް ލީގުގެ ފައިނަލްގައި ތަފާތު ބޮޑު ނަތީޖާ އަކުން އިންޓަރ މިލާން ބަލިކޮށް، ޕެރިސް ސެއިންޓް ޖާމަން (ޕީއެސްޖީ) އިން ޔުއެފާ ޗެމްޕިއަންސް ލީގު ކާމިޔާބު ކޮށްފި އެވެ.

ބަޔާން މިއުނިކްގެ އަލިއާންޒް އެރީނާގައި ހޮނިހިރު ދުވަހުގެ ރޭ ކުޅުނު މެޗު ޕީއެސްޖީ އިން ކާމިޔާބު ކުރީ 5-0 ގެ ނަތީޖާ އަކުންނެވެ. މެޗުގެ ފުރަތަމަ ހާފުގައި ޕީއެސްޖީ އިން ދެ ލަނޑު ޖެހިއިރު، ދެ ވަނަ ހާފުގައި ވަނީ ތިން ލަނޑު ޖަހައިފަ އެވެ.

މެޗު ފަށައިގެން 12 ވަނަ މިނެޓުގައި ޕީއެސްޖީ އަށް ލީޑު ނަގައިދިނީ މޮރޮކޯގެ ޑިފެންޑަރު އަޝްރަފް ހަކީމީ އެވެ. އެ ލަނޑު އޭނާ ޖެހީ ޑިސެއާ ޑޫއޯ ތަނަވަސްކޮށްދިން ފުރުސަތެއްގަ އެވެ.

އޭގެ އަަށް މިނެޓު ފަހުން ޑޫއޯ ވަނީ ޕީއެސްޖީގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ. އެއީ ފްރާންސްގެ އޮސްމާން ޑެމްބެލޭ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެެވެ.

ދެ ވަނަ ހާފުގައި އިންޓަރ މިލާނުން ލަނޑު ޖަހަން މަސައްކަތް ކުރަމުން ދަނިކޮށް، ޕީއެސްޖީ އިން ވަނީ ތިން ވަނަ ލަނޑެއް ވެސް ޖަހައިފަ އެވެ. މެޗުގެ 63 ވަނަ މިނެޓުގައި އެ ލަނޑު ޖެހީ ޑޫއޯ އެވެ.

އޭގެ ދިހަ މިނެޓު ފަހުން، މެޗުގެ 73 ވަނަ މިނެޓުގައި ޕީއެސްޖީގެ ހަތަރު ވަނަ ލަނޑު ޖަހައި އިތުރަށް ލީޑު ފުޅާކޮށްދިނީ ކްވިޗާ ކްވަރެޝްކޭލިއާ އެވެ. އަދި މެޗުގައި ޕީއެސްޖީގެ ފަަސް ވަނަ ލަނޑު، 86 ވަނަ މިނެޓުގައި ޖެހީ ސެނީ މާޔޫލޫ އެވެ.

މިއީ ޕީއެސްޖީ އިން އެ ކުލަބުގެ ތާރީޚުގައި ވެސް ޗެމްޕިއަންސް ލީގު ކާމިޔާބު ކުރި ފުރަަތަމަ ފަހަރެވެ. މީގެ ކުރިން ޗެމްޕިއަންސް ލީގުގެ ފައިނަލްގައި ޕީއެސްޖީ ކުޅުނު ނަމަވެސް، އެ ފަހަރުގެ ފައިނަލްގައި ވަނީ ބަޔާން އަތުންް ބަލިވެފަ އެވެ.

އަނެއްކޮޅުން މިއީ މި ސީޒަންގައި ޕީއެސްޖީ އިން ކާމިޔާބު ކުރި ހަތަރު ވަނަ ތައްޓެވެ. އެއީ ފްރާންސް ލީގު، ފްރާންސް ކަޕް، ފްރާންސް ސުޕަ ކަޕް އަދި ޔުއެފާ ޗެމްޕިއަންސް ލީގެވެ.