އެމެރިކާ އާ އެކު ކުރިއަށް ގެންދާ ނިއުކްލިއަރ ވާހަކަ ތަކުގައި އަދި އެބަސްވުމަކާ ހަމަ އަށް އާދެވުނުކަން އެނގިވަޑައި ނުގަންނަވާ ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ވިދާޅުވެއްޖެއެވެ.

އަރަގްޗީ މިހެން ވިދާޅުވީ ބުރާސްފަތި ދުވަހު އެކްސް ގައި ކުރެއްވި ޕޯސްޓެއްގައެވެ.

އަރަގްޗީ މިހެން ވިދާޅުވި އިރު ތެހެރާން އާއި ވޮޝިންގޓަނާ ދެމެދު އެއްބަސްވުމަކަށް އާދެވިފައިވާ ކަމަށް މީޑިއާގައި ވާހަކަތައް ދެކެވެމުން ދާކަން ފާހަގަ ކުރެވެއެވެ.

"މީޑިއާގައި އީރާނާއި އެމެރިކާ އާ ދެމެދު އެއްބަސްވުމެއް ވާން އުޅޭ ކަމަށް ވާހަކަ ދެކެވެމުން އެބަދެއެވެ. އަޅުގަނޑުމެންނަށް އަދި އެހިސާބަށް ވާސިލު ވެވުނު ކަން ޔަގީނެއް ނޫނެވެ. އީރާނުން ބޭނުން ވަނީ ހުރިހާ ފަރާތްތަކެއްގެ މަސްލަހަތު ހިމާޔަތް ކުރެވޭނެ ޑިޕްލޮމެޓިކް ހައްލެކެވެ. އެހެން ނަމަވެސް އެކަމަށް ވާސިލުވުމަށް ބޭނުން ވަނީ ދަތި ކުރުމުގެ ހުރިހާ ފިޔަވަޅުތަކެއް އުވާލުމާއި، އީރާނުގެ ނިއުކްލިއަރ ހައްޤުތައް - އޭގެ ތެރޭގައި ޔުރޭނިއަމް މުއްސަނދި ކުރުން ހިމެނޭ ގޮތަށް -ޔަގީން ކޮށްދިނުމެވެ،" އޭނާ ވިދާޅުވިއެވެ.

ފޮކްސް ނިއުސްގެ ރިޕޯޓަކަށް އިޝާރާތް ކުރައްވާ އަރަގްޗީ ވިދާޅުވީ، ކުރިއެރުން ހާސިލު ކުރެވޭނީ މަޝްވަރާތަކުން ކަމަށާއި، މީޑިއާ ގައި ދެކެވޭ ވާހަކަތަކުން ނޫން ކަމުގައެވެ.

ފޮކްސް ނިއުސްގެ ރިޕޯޓުގައި ބުނެފައި ވަނީ އީރާނުން ދަނީ އެ ޤައުމުގެ ނިއުކްލިއަރ ހަތިޔާރުގެ ޕްރޮގްރާމް ކުރިއަށް ގެންދަމުން ކަމަށާއި މި ޕްރޮގްރާމްގެ ތެރެއިން ދުރު ރާސްތާ މިސައިލް އުފެއްދުން އެކަށީގެންވާ ކަމުގެ ކަމުގެ ޖަސޫސީ މައުލޫމާތު ލިބިފައިވާ ކަމަށެވެ.

އެހެން ނަމަވެސް، ފޮކްސް ނިއުސް އިން ބުނެފައި ވަނީ މި އައު އިންޓެލިޖެންސް މައުލޫމާތަކީ އެމެރިކާގެ ނެޝަނަލް އިންޓެލިޖެންސް ޑައިރެކްޓަރ ޓުލްސީ ގަބާޑު މާރޗް މަހު ސެނެޓް އިންޓެލިޖެންސް ކޮމިޓީއަށް ދެއްވި ބަޔާނާ ފުށުއަރާ އެއްޗެއް ކަމަށެވެ. އޭނާ އެ ކޮމިޓީ އަށް ވިދާޅުވެފައި ވަނީ "އެމެރިކާގެ އިންޓެލިޖެންސް ކޮމިއުނިޓީން ދެކޭ ގޮތުގައި އީރާނުން ނިއުކްލިއަރ ހަތިޔާރެއް އުފައްދަމުން ނުދެއެވެ."

އަރަގްޗީ ވިދާޅުވީ މަޝްވަރާތަކަށް ހުރަސް އެޅުމަށް ފަތުރާ ދޮގު ވާހަކަތައް ކުށްވެރި ކުރައްވާ ކަމަށެވެ. އަރަގްޗީ ތުހުމަތު ކުރައްވާ ގޮތުގައި މިއީ މަޝްވަރާތަކަަށް ހުރަސް އެޅުމަށް އިސްރާއީލުން ފަތުރާ ދޮގު ވާހަކަތަކެވެ. މިފަދަ ޢަމަލުތަކަކީ އިސްރާއީލުގެ މިންގަނޑުން ވެސް ދަށް ފެންވަރުގެ ކަންކަން ކަމުގައި ވިދާޅުވިއެވެ.

އެމެރިކާ އާއި އީރާނުން ވަނީ އޭޕްރިލް 12 އިން ފެށިގެން ނިއުކްލިއަރ މަޝްވަރާތަކުގެ ފަސް ބުރެއް ބާއްވާފައެވެ. އަދި އައު އެއްބަސްވުމަކަށް ވާސިލުވުމަށް އަމާޒު ކޮށްގެން އަނެއްކާ ވެސް ބައްދަލުވާނެ ކަމަށް ބެލެވެއެވެ. މި ދެ ޤައުމުގެ މެދުގައި ދެބަސްވުން އުފެދިފައިވަނީ ޔުރޭނިއަމް މުއްސަނދިކުރުމުގެ މިންވަރާ ބެހޭ ގޮތުންނެވެ.

މަޝްވަރާތަކަށް ހުރަސް ނޭޅުއްވުމަށް އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަށް އިންޒާރު ދެއްވާފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވިއެވެ.