މި ސަރުކާރުގައި ތަރައްގީ ކުރާ ހުރިހާ އިންފްރާސްޓްރަކްޗަރގެ ޕްރޮޖެކްޓްތަކާމެދު ވަނީ ސުވާލު އުފެދިފައި: ރިޔާޒު މަންސޫރު
ޕްރޮޖެކްޓްތައް ކުރިއަށް ގެންދިއުމުގައި އަޑި ރަނގަޅެއް ނޫން
ނޫސްވެރިންގެ ބައްދަލުވުމެއްގައި އެމްޑީޕީގެ އެސްއެމްއީ ކޮމިޓީގެ މުގައްރިރު ރިޔާޒު މަންސޫރު ވާހަކަދައްކަވަނީ
ދުނިޔޭގައި ނެތްވަރުގެ ޕްރޮޖެކްޓެއް ރާއްޖޭގައި ހައްދަވާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވުމުން މި ސަރުކާރުގައި ތަރައްގީ ކުރާ ހުރިހާ އިންފްރާސްޓްރަކްޗަރގެ ޕްރޮޖެކްޓްތަކާމެދު ސުވާލު އުފެދިފައިވާ ކަމަށް އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި އެމްޑީޕީގެ ކުދި ވިޔަފާރިއާ ގުޅޭ ކޮމެޓީގެ މުގައްރިރު ރިޔާޒު މަންސޫރު ވިދާޅުވެއްޖެއެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ރިޔާޒު މަންސޫރު ވަނީ ރައީސް މުއިއްޒު ރަސްމާލޭގެ ބިއްލޫރި ޓަނަލް އެޅުއްވުމާ ގުޅޭގޮތުން ދެއްކި ވާހަކަފުޅުތަކަށް އިޝާރާތް ކުރައްވައި ފާޑު ވިދާޅުވެފައެވެ.
ރިޔާޒު މަންސޫރު ވިދާޅުވީ ރައީސް މުއިއްޒަކީ ސިވިލް އިންޖިނިއަރިންއިން ޕީއެޗްޑީ ހާސިލްކުރައްވާފައިވާ ބޭފުޅެއް ކަމަށެވެ. ނަމަވެސް ދުނިޔޭގައި ނެތްވަރުގެ ޕްރޮޖެކްޓެއްގެ ވާހަކަ ދައްކަވައި، ރަސްމާލޭގެ ބިއްލޫރި ޓަނަލެއްގެ ހުވަފެން ދެއްކެވުމުން މިސަރުކާރުގެ އިންފްރާސްޓްރަކްޗަރގެ ޕްރޮޖެކްޓްތަކާ މެދު ސުވާލު އުފެދިފައިވާ ކަމަށެވެ.
މީގެ އިތުރުން ރިޔާޒު މަންސޫރު ވިދާޅުވީ މަޝްރޫއުތަކުގެ ކްރެޑިޓް ނެގުމާއި، ހަގީގަތް ސިއްރުކޮށް، އެއްވެސް ދައްޗެއް ނެތް ކަމަށް ދެއްކުމަށް މި ސަރުކާރުގެ ބޭފުޅުން ވަރަށް މަސައްކަތް ކުރައްވާ ކަމަށެވެ. ޕްރޮޖެކްޓްތައް ކުރިއަށް ގެންދިއުމުގައި އަޑި ރަނގަޅު ނޫން ކަމަށް އޭނާ ވިދާޅުވިއެވެ.
އިންފްރާސްޓްރަކްޗަރގެ ވާހަކަ އަޅުގަނޑުމެން ދައްކާއިރު، އަޅުގަނޑަށް ހީވަނީ މިހިސާބަށް ކަންތައްތައް ގޯސްވެފައި ކަންތައްތައް ބޮއްސުންލާފައި ސަބަބަށް ބަލާއިރު، ތަންކޮޅެއް ކުރިއަށް ޖެހިފައި ބަލާއިރު، ބިއްލޫރި ޓަނަލް ހިސާބަށް އެބަޖެހޭ ދާން ޖެހޭ އެނގޭތޯ. މީގައި އަޅުގަނޑު ވަރަށް ހިތާމަވެސް ކުރަން މިހެން ދަންނަވަންޖެހޭތީ. އެހެން ނަމަވެސް ރައީސް މުއިއްޒަކީ ޕީއެޗްޑީ ހައްދަވައިގެން ހުރި ބޭފުޅެއް ސިވިލް އިންޖިނިއަރިންގެ ދާއިރާއިން. އެހެންނަމަވެސް ސިވިލް އިންޖިނިއަރިން ވަރަށް ބޮޑު ޕްރޮޖެކްޓެއް ދުނިޔޭގައި ނެތްވަރުގެ ޕްރޮޖެކްޓެއް ރާއްޖޭގައި ހައްދަވާނެ ކަމަށް ވިދާޅުވީމަ އިންފްރާސްޓްރަކްޗަރގެ ޕްރޮޖެކްޓެއް ތެދެއްތޯ ސިވިލް އިންޖިނިއަރިން. އެހެންވީމަ އެހިސާބުން އަޅުގަނޑުމެންނަށް ކޮންމެވެސް ވަރެއްގެ ދޭހައެއް ލިބޭ ތަރައްގީގެ މިފަދަ މަޝްރޫއުތައް އިންފްރާސްޓްރަކްޗަރގެ މިފަދަ ޕްރޮޖެކްޓްތައް ދާނީ ރަނގަޅަށް ނޫންކަން.އިކޮނޮމިކް މިނިސްޓްރީގެ ކުރީގެ ޑެޕިއުޓީ މިނިސްޓަރު އަދި އެމްޑީޕީގެ ކުދި ވިޔަފާރިއާ ގުޅޭ ކޮމެޓީގެ މުގައްރިރު ރިޔާޒު މަންސޫރު
ރިޔާޒު މަންސޫރު ވިދާޅުވީ މި ސަރުކާރު ކުރިއަށް ގެންދަނީ ކޮމިއުނިސްޓް ތިއަރީގެ ދަށުން ކަމަށެވެ. މިހާރު އިގްތިސާދު ނުހިނގާ ކަމަށާއި، އަމިއްލަ ވިޔަފާރި ކުރަމުންއައި ގިނަ ބަޔަކަށް ދަތިވުމުން ވިޔަފާރިތައް ހުއްޓިފައިވާ ކަމަށް އޭނާ ވިދާޅުވިއެވެ.
ރިޔާޒު މަންސޫރު ވިދާޅުވީ ސަރުކާރުގެ ސިޔާސަތު ބައްޓަން ކޮށްފައިއޮތީ ރައްޔިތުން ސަރުކާރުގެ ވަޒީފާތަކަށް ބަރޯސާކުރުވުން ކަމަށެވެ. މިއީ ހުއްޓުވަންޖެހޭ ސިޔާސަތެއް ކަމަށް ވެސް ވިދާޅުވިއެވެ.
