ޔަމަނުން ހުކުރު ދުވަހު ހެނދުނު އިސްރާއީލަށް މިސައިލް ހަމަލާ އެއް ދީފިއެވެ.

އިސްރާއީލު ސިފައިންގެ ބަޔާނަކުން ކަށަވަރުވެފައިވާ ގޮތުގައި ހުކުރު ދުވަހުގެ ހެނދުނު، ތެލް އަވީވްގައި އާއި ހިފާފައިވާ އެހެން ސަރަހައްދުތަކުގައި ރޮކެޓް ހަމަލާގެ އިންޒާރު ދިނުމަށް އެއަރ ރެއިޑް ސައިރަން ވަނީ އަޅާފައެވެ.

ސިފައިން އިތުރަށް ބުނެފައިވަނީ އެމީހުންގެ އެންޓި-އެއަރ މިސައިލް ސިސްޓަމްތަކުން އެ ޕްރޮޖެކްޓައިލް އިންޓަރސެޕްޓް ކުރެވުނު ކަމަށެވެ.

އިސްރާއީލުގެ މީގަން ޑޭވިޑް އެޑޮމް (އެމްޑީއޭ) އިމަރޖެންސީ ރެސްޕޮންސް ސަރވިސް އިން ބުނެފައިވަނީ ހަމަލާ އާ ގުޅިގެން ގެއްލުމެއްވިކަން އަދި ސާފު ނުވާ ކަމަށެވެ.

ޔަމަނުގެ ހަތިޔާރުއެޅި ބާރުތަކުން ނެރުނު ބަޔާނެއް ގައި ބުނެފައިވަނީ "ހިފާފައިވާ ޔައްފާ ސަރަހައްދުގައިވާ 'ބެން ގުރިއަން' އެއަރޕޯޓަށް އަމާޒުކޮށް ހައިޕަރސޮނިކް ބެލިސްޓިކް މިސައިލެއް ބޭނުންކޮށްގެން ވަކި އަސްކަރީ އޮޕަރޭޝަނެއް ކުރިއަށް ގެންގޮސްފައިވާ" ކަމަށެވެ.

"މި އޮޕަރޭޝަން ވަނީ އޭގެ މަޤްޞަދު ކާމިޔާބުކަމާއެކު ހާސިލުކޮށްފައެވެ. އެގޮތުން ޒަޔަނިސްޓް ބަޔަކު ޝެލްޓަރތަކުގައި ފިލަން މަޖުބޫރުވެ، އެއަރޕޯޓުގެ މަސައްކަތްތައް ހުއްޓިފައިވެއެވެ،" އެ ބަޔާނުގައި ބުނެފައިވެއެވެ.

"އަޅުގަނޑުމެންގެ އޮޕަރޭޝަންތައް ދަނީ ކުރިއަށެވެ. ޣައްޒާއަށް ދެމުންދާ އަނިޔާވެރި ހަމަލާތައް ހުއްޓާލައި، ބްލޮކޭޑް ނިމުމަކަށް އަންނަންދެން މި އޮޕަރޭޝަންތައް ﷲގެ އިރާދަފުޅާއެކު އިތުރަށް ހަރުދަނާވެގެންދާނެއެވެ،" އެ ބަޔާނުގައި ވެއެވެ.