ފަހަތުން އަރައި މަހިބަދޫ އިން ނިއު ރޭޑިއަންޓާ އެއްވަރު ކޮށްފި
22 މެއި 2025 | ބުރާސްފަތި 04:10މުބާރާތުގެ ލީގު ބުރުގައި ކުޅުނު ހަތަރު މެޗުން ހަތް ޕޮއިންޓާ އެކު ނިއު ރޭޑިއަންޓް ދިޔައީ ދެ ވަނަ އަށެވެ. ސެމީ ފައިނަލްގައި އެ ޓީމު ނިކުންނަން ޖެހޭނީ ތިން ވަނަ އަށް ދިޔަ އޮޑި ސްޕޯޓްސް ކުލަބާ ދެކޮޅަށެވެ.
އެފްއޭއެމް ލީގު ކަޕްގައި ނިއު ރޭޑިއަންޓް އަދި މަހިބަދޫ ކުޅުނު މެޗުގެ ތެރެއިން
މިހާރު ކުރިއަށްދާ އެފްއޭއެމް ލީގު ކަޕްގައި މަހިބަދޫ ސްޕޯޓްސް ކުލަބާ ދެކޮޅަށް ކުޅުނު މެޗުން، ނިއު ރޭޑިއަންޓް ސްޕޯޓްސް ކުލަބު އެއްވަރުވެއްޖެ އެވެ.
މުބާރާތުގެ ލީގު ބުރުގެ ފުރަތަމަ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވި ނަމަވެސް، ދެ ވަނަ މެޗުގައި ޓީސީ ސްޕޯޓްސް ކުލަބު އަދި ތިން ވަނަ މެޗުގައި އޮޑި ސްޕޯޓްސް ކުލަބު އަތުން ނިއު ރޭޑިއަންޓް ވަނީ މޮޅުވެފަ އެވެ.
މުބާރާތުގައި މަހިބަދޫ އިން ކުރިން ކުޅުނު ތިން މެޗުން ވެސް އެ ޓީމު އޮތީ ބަލިވެފަ އެވެ. ނިއު ރޭޑިއަންޓާ ދެކޮޅަށް ނިކުތްއިރު ވެސް، އެ ޓީމު ވަނީ މުބާރާތުން ކަޓައިފަ އެވެ. ނަމަވެސް މަހިބަދޫ އިން ވަނީ ނިއު ރޭޑިއަންޓް އަތުން ޕޮއިންޓެއް ހޯދައިފަ އެވެ.
ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗުގައި ނިއު ރޭޑިއަންޓުން ވަނީ ދެ ފަހަރެއްގެ މަތިން ލަނޑު ޖަހައި ލީޑު ނަގައިފަ އެވެ. ނަމަވެސް، މަހިބަދޫ އިން ވަނީ ދެ ފަހަރު ވެސް ލަނޑު ޖަހައިގެން މެޗުގެ ނަތީޖާ ހަމަހަމަ ކޮށްފަ އެވެ.
މެޗު ފަށައިގެން 10 ވަނަ މިނެޓުގައި ނިއު ރޭޑިއަންޓުން ވަނީ ލަނޑު ޖަހައި ލީޑު ނަގައިފަ އެވެ. އެ ޓީމަށް ލިބުނު ޕެނަލްޓީ ކާމިޔާބުކޮށް، ލީޑު ނަގައިދިނީ ބިދޭސީ ކުޅުންތެރިޔާ ޠާރިގު ޖެބްރިން އެވެ.
އޭގެ ފަހުން މެޗުގެ ފުރަތަމަ ހާފުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި ޝުއައިދު ސައީދު ޖެހި ލަނޑުންނެވެ. އެއީ މަހިބަދޫ އަށް ލިބުނު ޕެނަލްޓީއެއްގައި އޭނާ ފޮނުވާލި ބޯޅަ، ނިއު ރޭޑިއަންޓުގެ ގޯލު ކީޕަރުގެ އަތުގައި ޖެހި ރީބައުންސަށް އައި ވަގުތު ގޯލަށް ވައްދާލައިގެން ޝުއައިދު ޖެހި ލަނޑެކެވެ.
މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ނިއު ރޭޑިއަންޓުން ވަނީ ދެ ވަނަ ފަހަރަށް ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޔަޝްފާދު ހަބީބު އެވެ.
ދެ ވަނަ ފަހަރަށް މަހިބަދޫ އިން ނަތީޖާ ހަމަހަމަ ކުރީ މެޗުގެ 74 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ ވެސް ޝުއައިދު އެވެ.
މުބާރާތުގެ ލީގު ބުރުގައި ކުޅުނު ހަތަރު މެޗުން ހަތް ޕޮއިންޓާ އެކު ނިއު ރޭޑިއަންޓް ދިޔައީ ދެ ވަނަ އަށެވެ. ސެމީ ފައިނަލްގައި އެ ޓީމު ނިކުންނަން ޖެހޭނީ ތިން ވަނަ އަށް ދިޔަ އޮޑި ސްޕޯޓްސް ކުލަބާ ދެކޮޅަށެވެ.
ނިއު ރޭޑިއަންޓް އަތުން ހޯދި ޕޮއިންޓާ އެކު، ހަތަރު މެޗުން އެއް ޕޮއިންޓާ އެކު މަހިބަދޫ ދިޔައީ ފަސް ވަނަ އަށެވެ.
