"މަގުމައްޗަށް ބުޅާ ސީލުމުގެ މައްސަލަ ހައްލު ނުވާނަމަ، ދެން އެ ސީތައް ގެންދާނީ ރައީސް އޮފީސް ކައިރިއަށް"
މާލެ ތެރޭގައި ހުންނަ ބުޅާ މަގުމައްޗަށް ސީލުމުގެ މައްސަލައަށް ހައްލެއް ނުލިބޭނަމަ ރައީސްގެ އޮފީސްކައިރިއަށް ބުޅަލުގެ ސީ ގެންދާނެ ކަމަށް އިކްރާމް ވިދާޅުވި
މާލެ ތެރެއަށް ބުޅާ ސީ ލުމުގެ މައްސަލަ ހައްލު ކޮށްދެއްވުމަށް ރައީސް ޑރ. މުހައްމަދު މުއިއްޒުއަށް ދަންނަވާ ކަމަށް އިކްރާމް ވަނީ ވިދާޅުވެފައި
މާލެ ތެރޭގައި ހުންނަ ބުޅާތައް މަގުމައްޗަށް ސީ ލުމުގެ މައްސަލަ ރައީސް ޑރ.މުހައްމަދު މުއިއްޒު ހައްލުކޮށް ނުދެއްވައިފި ނަމަ ގެ އާއި އޮފީސް ކައިރީގައި ހުންނަ ބުޅަލުގެ ސީ ހިފައިގެން ރައީސް އޮފީސް ކައިރިއަށް ވަޑައިގަންނަވާނެ ކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ވިދާޅުވީ މާލެ ތެރެއަށް ބުޅާ ސީ ލުމުގެ މައްސަލަ ހައްލު ކޮށްދެއްވުމަށް ރައީސް ޑރ. މުހައްމަދު މުއިއްޒުއަށް ވަރަށް އަދަބުވެރިކަމާއި އެކު ދަންނަވާ ކަމަށެވެ. މީގެ ކުރިން ވެސް މިކަމަށް ހައްލު ހޯދާ ދިނުމަށް 3 ފަހަރު އެކިގޮތަށް އެދިވަޑައިގަންނަވާފައި ވާނެ ކަމަށް އިކްރާމް ވިދާޅުވެފައިވެއެވެ.
އެހެންކަމުން މިކަމަށް ހައްލެއް ނައިސްފިނަމަ އިކްރާމްގެ ގެއާއި އޮފީސް ދޮރުމަތީގައި ހުންނަ ބުޅަލުގެ ސީ ރައީސް އޮފީސް ކައިރިއަށް ގެންދަން ފަށްޓަވާނެ ކަމަށް އިކްރާމް ވަނީ ވިދާޅުވެފައވެެ. އަދި މި އުދަނގޫ ވާ އެންމެނަށް އެ ގޮތަށް އަމަލުކުރުމުގައި ބައިވެރިވެލެއްވުމަށް އިކްރާމް ވަނީ އެދިވަޑައިގަންނަވާފައެވެ. އިތުރަށް އިކްރާމް ވިދާޅުވީ މި މައްސަލަ ހައްލުކޮށް ދެއްވައިފިނަމަ އަޅުގަނޑު އެ ވާހަކަ ނުދައްކަވާނެ ކަމަށެވެ.
ރައީސް ޑރ މުއިއްޒުއަށް ވަރަށް އަދަބުވެރިކަމާއި އެކު ދަންނަވަން، މާލެ ތެރެއަށް ބުޅާ ސީ ލުމުގެ މައްސަލަ ހައްލު ކޮއްދެއްވާ. މިކަމަށް 3 ފަހަރު އެކިގޮތަށް އަޅުގަނޑަށް ދެންނެވިއްޖެ. މިކަމަށް ހައްލެއް ނައިސްފިނަމަ އަޅުގަނޑު ގެއާއި އޮފީސް ދޮރު މަށްޗަށްލާ ބުޅަލުގެ ސީ ރައީސް އޮފީސް ކައިރިއަށް ގެންދަން ފަށާނަން. އަދި މި އުދަގޫ ވާ އެންމެނަށް އަޅުގަނޑު ގޮވާލަން މިކަމުގައި އަޅުގަނޑާ ބައިވެރިވެލެއްވުމަށް. މި މައްސަލަ ހައްލުކޮށް ދެއްވައިފިނަމަ އަޅުގަނޑު އިތުރަށް މިވާހަކައެއް ނުދައްކާނަން.ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެމްބަރު އިކްރާމް ހަސަން
ބުޅާ ބެލެހެއްޓުމަށް ތަރައްގީކޮށްފައިވާ "އޮޅުހިޔާ" ކައުންސިލް އަތުން ސަރުކާރުން އަތުލުމަށްފަހު ބުޅާތައް މަގުމަޗަށް މަރުވެ، މަގުތަށް ނަޖިސްކުރަން ދޫކޮށްލާފައިވާ ކަމަށް މާލެސިޓީގެ މޭޔަރު އާދަމް އާޒިމް ވެސް ވަނީ މީގެ ކުރިން ވިދާޅުވެފައެވެ. އެ މަސައްކަތް ސަރުކާރުން އަތުލާފައި ވަނީ އެކަމުގެ ކްރެޑިޓް ނެގުމަށް ކަމަށް ފާޑުކިޔާ ފަރާތްތަކުން ދަނީ ބުނަމުންނެވެ. ރާއްޖެއެމްވީ އަށް މައުލޫމާތުދެއްވަމުން އިކްރާމް ވެސް ވަނީ މި މައްސަލަ ހައްލުކުރުމަށް ސަރުކާރު ނުކުޅެދިފައިވާ ކަމަށް ފާހަގަކުރައްވާފައެވެ.
ބުޅާތައް ގެންދިއުމަށް ކައުންސިލުން ވަރަށް ބުރަ މަސައްކަތްތަކެއް ކުރި ކަމަށް މޭޔަރ ވަނީ ވިދާޅުވެފައެވެ. ބޮޑު އަގުގައި ހަރަދުކޮށްގެން މާލޭ ސިޓީގެ ރައްޔިތުންނަށް ޓަކައި ހެދި ބުޅާ ފެސިލިޓީ ކައުންސިލް އަތުން ސަރުކާރުން އަތުލުމަށްފަހު އަމަލުކުރަމުންދާ ގޮތާއި މެދު އާއްމުން ވެސް ދަނީ ފާޑު ކިޔަމުންނެވެ. އެގޮތުން ގިނަ ބުޅާތައް އެތަނަށް ނުގެން ގޮސް މަގުމައްޗަށް މާރުވާން ދޫކޮށްލާފައިވާ ކަމަށް އާއްމުން ވެސް ދަނީ ބުނަމުންނެވެ. އަދި މަގުތަށް ވެސް ނަޖިސްކުރަން ބުޅާތަށް ދޫކޮށްލާފައިވުމުން އާއްމުންނަށް ގިނަ އުނދަނގޫތަކާއި ދަނީ ކުރިމަތިވަމުންނެވެ.
