އިނގިރޭސި އެފްއޭ ކަޕްގެ ފައިނަލްގައި މެންޗެސްޓަރ ސިޓީ ބަލިކޮށް، ކްރިސްޓަލް ޕެލަސް އިން މުބާރާތް ކާމިޔާބުކޮށް، ތާރީޚީ ކާމިޔާބެއް ހޯދައިފި އެވެ.

އިނގިރޭސި ރަސްމީ ސްޓޭޑިއަމް ވެމްބްލީގައި ހޮނިހިރު ދުވަހުގެ ރޭ ކުޅުނު އެފްއޭ ކަޕްގެ ފައިނަލްގައި ޕެލަސް އިން ވަނީ 1-0 އިން ސިޓީގެ މައްޗަށް ކުރި ހޯދައިފަ އެވެ.

މެޗުގެ ފުރަތަމަ ހާފުގައި ޕެލަސް އިން ވަނީ ލަނޑު ޖަހައި ލީޑު ނަގައިފަ އެވެ. މެޗުގެ ނަތީޖާ ހަމަހަމަ ކުރާނެ ފުރުސަތު ސިޓީ އަށް ލިބި ބޭކާރުވެފައިވާއިރު، ޕެލަސް އަށް ވަނީ ލީޑު ފުޅާ ކުރާނެ ފުރުސަތު ވެސް ލިބިފަ އެވެ.

މެޗު ފަށައިގެން 16 ވަނަ މިނެޓުގައި ޕެލަސް އިން ވަނީ ސިޓީ ކޮޅަށް ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އެބްރެޗީ އެޒޭ އެވެ.

މެޗުގެ ފުރަތަމަ ހާފު ނިމުމުގެ ކުރިން ސިޓީ އަށް ވަނީ ނަތީޖާ ހަމަހަމަ ކުރުމަށް ރަނުގެ ފުރުސަތެއް ލިބިފަ އެވެ. އެ ޓީމަށް ލިބުނު ޕެނަލްޓީއެއް އޮމަރު މާމޫޝް ފޮނުވާލި ނަމަވެސް، ޕެލަސްގެ ގޯލު ކީޕަރު ޑީން ހެންޑަސަން ވަނީ އެ ބޯޅަ މަތަކޮށްފަ އެވެ.

މެޗުގެ ދެ ވަނަ ހާފު ފަށައިގެން ތޭރަ ވަނަ މިނެޓުގައި ޕެލަސް އިން ވަނީ ދެ ވަނަ ލަނޑެއް ވެސް ޖަހައިފަ އެވެ. ޕެލަސްގެ ޑެނިއަލް މުނޯޒް ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ.

މިއީ ޕެލަސް އިން އެ ޓީމުގެ ތާރީޚުގައި ވެސް ކާމިޔާބު ކުރި ފުރަތަމަ ތައްޓެވެ. މީގެ ކުރިން ޕެލަސް އިން ވަނީ ދެ ފަހަރެއްގެ މަތިން އެފްއޭ ކަޕްގެ ފައިނަލްގައި ކުޅެފަ އެވެ. އެ ދެ ފަހަރު ވެސް އެ ޓީމަށް ވަނީ ނާކާމިޔާބުވެފަ އެވެ.

ސިޓީގެ މި ނާކާމިޔާބާ އެކު އެ ޓީމުން މި ސީޒަން ނިންމާލަން ޖެހުނީ އެއްވެސް ތައްޓެއް ކާމިޔާބު ނުކުރެވި އެވެ. ސިޓީގެ ކޯޗުކަމާ އެންމެ ފުރަތަމަ ޕެޕް ގާޑިއޯލާ ހަވާލުވި 2016/2017 ވަނަ ސީޒަންގައި ވެސް އެ ޓީމަށް އެއްވެސް ތައްޓެއް ކާމިޔާބު ނުކުރެވެ އެވެ. މިއީ އޭގެ ފަހުން ސިޓީން ހުސް އަތާ ސީޒަން ނިންމާލަން ޖެހުނު ފުރަތަމަ ފަހަރެވެ.