ފަނޑިޔާރުން ވަކިކުރުމުގެ މައްސަލަ ސިއްރުކުރުމުން އެމްޑީޕީން ކޮމެޓީ ދޫކޮށް ނިކުމެއްޖެ
ސްޕްރީމް ކޯޓުގެ ދެ ފަނޑިޔާރުން ވަކިކުރަން ހުށަހަޅާފައި އޮތް މައްސަލާގައި ކޮމެޓީ ދުކޮށް އެމްޑީޕީން ނުކުމެއްޖެ
ޖުޑީޝިއަރީ ކޮމެޓި ބައްދަލުވުން
ސްޕްރީމް ކޯޓުގެ ދެ ފަނޑިޔާރުން ކަމަށްވާ ޑރ.އަޒްމިރަލްދާ ޒާހިރު އާއި މަހާޒް ވަކިކުރަން ހުށަހަޅާފައި އޮތް މައްސަލާގައި ޖުޑީޝިއަލް ސާވިސް ކޮމިޝަނުން ނިންމައި ފޮނުވާފައިވާ ރިޕޯޓް ދިރާސާ ކުރުމުގެ ކޮމެޓީ ދޫކޮށް އެމްޑީޕީން ނިކުމެއްޖެއެވެ.
އެ މައްސަލަ ދިރާސާ ކުރާ ޖުޑިޝަރީ ކޮމިޓީ ސިއްރު ކުރަން ހުށަހެޅުއްވީ ހުޅުދޫ ދާއިރާގެ މެންބަރު، މުހައްމަދު ޝާހިދު އެވެ. އެހުށަހެޅުމަށް އެކޮމެޓިން ވޯޓު ނަގާފައިވާއިރު ކޮމިޓީގައި ހިމެނިވަޑައިގަންނަވާ ޕީއެންސީގެ ހުރިހާ މެންބަރުންގެ ތާއީދުކުރެއްވީ ސިއްރުކުރުމަށެވެ.
އެ ކޮމިޓީ ސިއްރު ކުރުމާ ދެކޮޅު ހެއްދެވީ ޖުޑީޝަރީ ކޮމިޓީގައި ހިމެނިވަޑައިގަންނަވާ އެމްޑީޕީގެ ދެ މެންބަރުން، އިބްރާހިމް ނާޒިލް އާއި މައުރޫފް ޒާކިރު އެވެ. އެ ކޮމިޓީ ސިއްރު ކުރަން ނިންމުމާއެކު އެ ދެ މެންބަރުން ވަނީ ކޮމިޓީ ދޫކޮށް ނުކުމެވަޑައިގެންފަ އެވެ.
ޖުޑީޝަރީ ކޮމިޓީ ސިއްރު ކުރަން ވޯޓަށް އަހަން މުގައްރިރު ހުސްނީ މުބާރަކު ނިންމެވުމާއެކު އެ ކޮމިޓީގައި ހިމެނިވަޑައިގަންނަވާ އެމްޑީޕީގެ މެންބަރުން އެނިންމެވުމާއި ދޭތެރޭ ނުރުހުން ފާޅުކޮށް އެކަމަށް ދެކޮޅުހަދާ ނުރުހުން ފާޅުކޮށްފައިވެއެވެ.
ސަރުކާރު ހިންގާ ޕާޓީގެ މެޖޯރިޓީ އޮންނަ ކޮމެޓީއަށް އެ ހުށަހެޅުން ހުށަހަޅާ ކޮމިޓީގައި ވޯޓު ނެގީ ވެސް އިދިކޮޅު މެންބަރުން ދެކޮޅު ހައްދަވަމުން ގެންދަވަނިކޮށެވެ. ކޮމިޓީ ސިއްރު ކުރުމުގެ ކުރިން އެ ކޮމިޓީގައި ވާހަކަދައްކަވަމުން ޖޭއެސްސީން ތައްޔާރު ކޮށްފައި އޮތް ރިޕޯޓުގައި ހުރި ބައެއް ހަމަނުޖެހޭ ކަންކަން ހިތަދޫ ދެކުނު ދާއިރާގެ މެންބަރު، އިބްރާހިމް ނާޒިލް ފާހަގަ ކުރެއްވި އެވެ.
ކޮމެޓިގައި ވާހަކަދައްކަވަމުން ޖޭއެސްސީން ތައްޔާރުކޮށްފައިވާ ރިޕޯޓާއި ބެހޭގޮތުން ހިތަދޫ ދެކުނު ދާއިރާގެ މެންބަރު އިބްރާހިމް ނަޒީލް ވިދާޅުވީ ފަނޑިޔާރު އަޒްމިރަލްދާގެ ފިރިކަލުން ހައްޔަރު ކުރިއިރު، އޭނާ ހުރީ ބަރަހަނާ ހާލަތުގައި ކަމަށް ޖޭއެސްސީގެ ރިޕޯޓުގައި ބަޔާން ކޮށްފައި އޮތް ނަމަވެސް ފުލުހުންގެ ތަހުގީގުން އެކަން ސާބިތު ނުވާކަމަށެވެ.
މީގެ އިތުރުން ކޮމަންވެލްތް ލޯޔާސް އެސޯސިއެޝަނުން ކަންބޮޑުވުން ފާޅުކޮށް ބަޔާނެއް ނެރެފައިވެއެވެ. އެގޮތުން އެ އެސޯސިއޭޝަނުން ބުނީ ސުޕްރީމް ކޯޓުގެ ފަނޑިޔާރު މަހާޒު އަލީ ޒާހިރު އަދި ފަނޑިޔާރު ޑރ. އަޒްމިރަލްދާ ޒާހިރު ވަކިކުރުމަށް ޖުޑީޝަލް ސާވިސް ކޮމިޝަން އިން ނިންމި ނަމަވެސް އެފަނޑިޔާރުންނަށް ދިފާއުވުމުގެ ފުރުސަތު ނުދޭނަމަ މައްސަލަ ބާތިލް ކުރުމަށް ގޮވާލާކަމަށެވެ.
އާދިއްތަ ދުވަހު ނެރުނު ބަޔާނުގައި އެ އެސޯއިއޭޝަނުން ބުނީ، ރާއްޖޭގެ ބާކައުންސިލާއި، ބައިނަލްއަގުވާމީ ޖަމިއްޔާތަކާއި، ކޮމަންވެލްތު ސެކްރެޓަރީއާއި ޝަރުއީ ދާއިރާގެ ޚާއްސަ ރިޕޯޓަރަކާ ގުޅިގެން އެ ތަނުން ވެސް މި މައްސަލަ ބަލަމުން ގެންދާނެ ކަމަށެވެ. އަދި ފަނޑިޔާރުންގެ ތަހުގީގު ޖޭއެސްސީއިން ކުރިއަށް ގެންދިޔައީ ޑިއު ޕްރޮސެސްއަށް ބެލުމެއް ނެތި ކަމަށް ފަނޑިޔާރުންގެ ފަރާތުން ފާހަގަކޮށްފައިވާ ކަމަށް އެބަޔާނުގައިވެއެވެ. އޭގެ އިތުރުން އެ އެސޯސިއޭޝަނުން ރައްޔިތުންގެ މަޖިލީހަށް ގޮވާލާފައި ވަނީ، ފަނޑިޔާރުންގެ ތަހުގީގުގައި ޑިއު ޕްރޮސެސް ފޮލޯކޮށްފައިނުވާ ނަމަ އަދި ދިފާއުވުމުގެ ފުރުސަތު ދީފައިނުވާ ނަމަ މައްސަލަ ބޭރުކޮށްލުމަށެވެ.
