އުތުރު ކޮރެއާ އިން އަނެއްކާ ވެސް ބެލިސްޓިކް މިސައިލްތަކެއް އުދުއްސާލައިފި
އެމެރިކާ އާއި އުތުރު ކޮރެއާގެ ގުޅުން ވަނީ ވަރަށް ގޯސްވެފައި
އުތުރު ކޮރެއާ އިން ބެލިސްޓިލް މިސައިލެއް ޓެސްޓް ކުރަނީ
އުުތުރު ކޮރެއާ އިން ކުރު ރާސްތާގެ ތިން ބެލިސްޓިކް މިސައިލެއް ކަނޑަށް އުދުއްސާލައިފި ކަމަށް އެމެރިކާގެ އަސްކަރިއްޔާ އިން ބުނެފިއެވެ.
އެ މިސައިލްތައް އުުދުއްސާލާފައި ވަނީ އުތުރު ކޮރެއާގެ ޕްރޮވިންސެއް ކަމަށްވާ ގެންގްވޮން އިންނެވެ. އަދި ދެކުނު ކޮރެއާގެ އޮފިޝަލުން ބުނާ ގޮތުން އެ ތިން ބެލިސްޓިކް މިސައިލް ކަނޑަށް ވެއްޓުމުގެ ކުރިން 250 ކިލޯމީޓަރު ދުރަށް އުދުހުނެވެ.
އުތުރު ކޮރެއާ އިން ޖުލައި މަހު ވެސް ވަނީ ބެލިސްޓިކް މިސައިލެއް ޓެސްޓްކޮށްފައެވެ.
އުތުރު ކޮރެއާ އިން ދަނީ އެމެރިކާގެ ސަރަހައްދެއް ކަމަށްވާ ގުއާމް އަށް ހަމަލާ ދޭނެ ކަމަށް ބުނެެ އިންޒާރު ވެސް ދެމުންނެވެ. އަދި ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހިންގާ މިސައިލް ޓެސްޓްތައް ވެސް ކުރަމުންނެވެ. ޕެސިފިކްގައި އޮންނަ އެމެރިކާގެ ސަރަހައްދެއް ކަމަށްވާ ގުއާމް ކަނޑަށް މިސައިލް ހަމަލާ ދިނުމާ ބެހޭ ޕްލޭން އުތުރު ކޮރެއާގެ ލީޑަރު ކިމް ޖޮން-އުން ރިވިއުކޮށްފައިވާ ކަމަށާއި އެހެން ނަަމަވެސް ސީދާ ވަކި ގޮތެއް ނިންމުމުގެ ކުރިން އެމެރިކާގެ އަމަލުތަކަަށް ބަލާނެ ކަމަށް އުތުރު ކޮރެއާ އިން ބުނިތާ މާގިނަ ދުވަހެއް ނުވެއެވެ.
ބައިނަލްއަގްވާމީ ދުނިޔެއިން ތަކުރާރުކޮށް އުުތުރު ކޮރެއާ އަށް އަންގަމުން ދަނީ ނިއުކްލިއާ ހަތިޔާރު ފައްކާކުރުމުގެ ޕްރޮގްރާމް ހުއްޓާލުމަށާއި އަދި މިސައިލް ޓެސްޓްތައް ކުރުން ހުއްޓާލުމަށެވެ. އެހެންނަމަވެސް އުތުރު ކޮރެއާ އިން ބައިނަލްއަގްވާމީ ދުނިޔޭގެ ގޮވުންތަކަށް ދަނީ ބީރުކަންފަތެއް ދެމުންނެވެ. އދ. އިން ދާދިފަހުން ވަނީ އުތުރު ކޮރެއާއާ ދެކޮޅަށް ދަތިކުރުމުގެ ފިޔަވަޅުތައް ވެސް އަޅާފައެވެ.
