އަތޮޅު ކައުންސިލް އުވާލާ ވާހަކަ ދެއްކެވި އިރު އެކަމުގެ މަޝްވަރާއެއް ކައުންސިލްތަކާއި ނުކުރޭ - ޝުޖާއު
ކައުންސިލްތައް އުވާލާ އިރު އެލްޖީއޭ އަދި މިނިސްޓްރީއަށް ނާންގާ
ވ އަތޮޅު ކައުންސިލްގެ ރައީސް ޝުޖާއު (ވ) އަދި ނ އަތޮޅު ކައުންސިލްގެ ރައީސް ބަޝީރު (ކ)
އަތޮޅު ކައުންސިލް އުވާލަން ގާނޫނުއަސާސީއަށް އިސްލާހެއް ގެންނަން ހުށަހަޅުއްވާނެކަމަށް ރައީސް ވިދާޅުވި އިރު، އެކަމުގެ އެއްވެސް މަޝްވަރާއެއް ކައުންސިލްތަކާއި ނުކުރައްވާ ކަމަށް ވ. އަތޮޅު ކައުންސިލްގެ ރައީސް ޝުޖާއު އަލީ ވިދާޅުވެއްޖެއެވެ.
ދަ ޑިމޮކްރެޓްސް އިން ބޭއްވި ނޫސްވެރިންގެ ބައްދަލުވުމުގައި ވ. އަތޮޅު ކައުންސިލްގެ ރައީސް ޝުޖާއު އަލީ ވިދާޅުވީ ކައުންސިލްތަކަށް ގެންވަން ރައީސް ޑރ. މުހައްމަދު މުއިއްޒު ނިންމަވާފައިވާ ބޮޑެތި ބަދަލުތަކާއި، ހާއްސަކޮށް އަތޮޅު ކައުންސިލްތައް އުވާލާވާހަކައަކީ ކަންބޮޑުވާ މައްސަލައެއް ކަމަށެވެ. އަދި ނިމިގެންދިޔަ ހަފްތާގައި ކައުންސިލްތަކުގެ މުދާ ނަގާނެ އުސޫލެއް ކަމަށް ބުނާ އުސޫލެއް ފާސްކޮށް ކައުންސިލްތަކަށް ހިއްސާކޮށްފައިވާ ކަމަށެވެ. އަދި މިއީ ކަންބޮޑުވާ ކަންތައްތަކެއް ކަމަށްވެސް ޝުޖާއު ވިދާޅުވިއެވެ.
އޭނާ ވިދާޅުވީ ގެންނަ ބޮޑެތި ބަދަލުތައް މީޑިއާއަށް ރައީސް ތިލަކުރެއްވި އިރުގައި މިއިން އެއްވެސް ކަމެއްގައި ކައުންސިލްތަކުގެ ބައިވެރިވުމެއް މަޝްވަރާއެއް ނުހޯދާ ކަމަށެވެ. އަދި ކައުންސިލްތައް ހިންގުމަށް ކަނޑައަޅާފައިވާ މިނިސްޓްރީއާއި ލޯކަލް ގަވަރމަންޓް އޮތޯރިޓީގެ ބައިވެރިވުމެއް ނެތި ބޮޑެތި ބަދަލުތައް ގެންނަވާތީ އެފަރާތްތަކުގެ ކަންބޮޑުވުންތައްވެސް އެބަހުރިކަމަށް ޝުޖާއު ވިދާޅުވިއެވެ.
ރައީސުލްޖުމްހޫރިއްޔާގެ ވާހަކައިން ވަރަށް ބޮޑަށް ސާފުވެގެން ހިނގައްޖެ އަތޮޅު ކައުންސިލްތައް އުވާލައިގެން ގެންނަން ބޭނުންވާ ބަދަލުގެވާހަކަ. މިއީ ރާއްޖޭގެ ތާރީހުގައިވެސް އަދި އުފެދުމުގައިވެސް އޮތް ގުދުރަތީ އުފެދުމާއި ވަރަށް އިދިކީލި ހިންގުމުގެ ވިސްނުމެއްކަން ފާހަގަކުރަން ބޭނުން. އަތޮޅުގެ ރައްޔިތުން އެ އަތޮޅަކަށް ނިސްބަތްކޮށް ވަރަށް ބައިވަރު އިގްތިސާދީ މަސައްކަތްތައްވެސް ކުރެވިފައި ހުރި އިރުގައި މިގޮތަށް ގެންނަ ބަދަލުގެ ސަބަބުން ލިބޭނެ ގެއްލުމާއި ދޭތެރޭގައި ވެސް ވަރަށް ބޮޑަށް ކަންބޮޑުވޭ.ވ. އަތޮޅު ކައުންސިލްގެ ރައީސް ޝުޖާއު އަލީ
ނ. އަތޮޅު ކައުންސިލްގެ ރައީސް މުހައްމަދު ބަޝީރު ވިދާޅުވީ ކައުންސިލްތައް އުވާލުމުގެ އިތުރުން މުދާތައް ނެގުމާއި، މިއިންކަމެއްގެ މަޝްވަރާއެއް ނުކޮށް ބޮޑެތި ބަދަލުތައް ގެނައުމަކީ ކަންބޮޑުވާ ކަމެއް ކަމަށެވެ. މީގެ އިތުރުން ރަށު ކައުންސިލްގެ އަދަދާއި ގުޅޭގޮތުން އެކި ފަހަރު އެކިގޮތަށް ވާހަކަ ދައްކާފައި ހުންނާތި ކަންބޮޑުވާ ކަމަށެވެ.
ވަޒީޒު އާދަމް ޝަރީފް ދައުރުގެ ކުރީކޮޅުގައި އަރބަން ޕްލޭނިންގެ ވާހަކަ މަޖިލީހުގައި އެޖެންޑާކުރި އިރު، މަޖިލީހަށް ވަޑައިގެން ދެއްކެވި ވާހަކަފުޅެއްގައި އަދި އެހެންވެސް ބައެއް ސްޕީޗްތަކުގައި އެބައޮތް ވިދާޅުވެފައި، ލާމަރުކަޒީ ނިޒާމް ރަނގަޅުކުރާ ވާހަކަ ކޮންމެ ސަރުކާރެއްގައި ވެސް ދައްކާއިރުގައި އަބަދުވެސް ކައުންސިލްގެ އަދަދު މަދުކުރާ ވާހަކައާއި ގިނަ ކުރާ ވާހަކަ، މިއީއޭ ނިޒާމާއި ގުޅޭގޮތުން ދައްކާ ވާހަކައަކީ. ވަރަށް މަލާމާތްކޮށްފައި ވާހަކަދެއްކީ. އެކަމަކު މަލާމާތް ރައްދުވަނީ ހަމަ އެބޭފުޅާގެ ސަރުކާރަށް.ނ. އަތޮޅު ކައުންސިލްގެ ރައީސް މުހައްމަދު ބަޝީރު
އަތޮޅު ކައުންސިލްތައް އުވާލަން ގާނޫނުއަސާސީ އިސްލާހުކުރަން މަޖިލީހަށް ހުށަހަޅަން ނިންމާފައިވާކަމަށް ރައީސް ޑރ. މުހައްމަދު މުއިއްޒު ވަނީ ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވެފައެވެ.
ރައީސް ވިދާޅުވީ އަތޮޅު ކައުންސިލްތަކުގެ މީޓިންތައް ބާއްވަނީ އޮންލައިންކޮށް ކަމަށާއި، އެއަށްވުރެ ރަށު ކައުންސިލް ލެވެލުން ހިންގުން މާ ރަނގަޅުކަމަށެވެ. ރައީސް ވިދާޅުވީ ރައްޔިތުންނާ އެންމެ ގާތުން މަސައްކަތްކުރަނީ ރަށު ކައުންސިލްތައް ކަމަށެވެ. އެހެންކަމުން އަތޮޅު ލެވެލްއެއް ބޭނުން ނުވާ ކަމަށް ވިދާޅުވިއެވެ. އަދި އަތޮޅު ކައުންސިލްތައް ފަންކްޝަން ނުކުރާ ކަމަށް ވެސް ރައީސް ވަނީ ވިދާޅުވެފައެވެ.
