ސުޕްރީމް ކޯޓު ޕެރެލައިޒްކޮށްފައި އޮތް ނަމަވެސް ޖުޑިޝަރީއަށް ނުފޫޒު ނުފޯރުވާ ކަމަށް ރައީސް މުއިއްޒު ވިދާޅުވެއްޖެ
ޖުޑިޝަރީގެ ތެރެއިން އެ ހިނގާ ކަންކަމަށް ޖަވާބު ދެމުންދާނީ ޖުޑިޝަރީން
ދިވެހިރާއްޖޭގެ ސުޕްރީމް ކޯޓު
ސުޕްރީމް ކޯޓު ޕެރެލައިޒްކޮށްފައި އޮތް ނަމަވެސް ޖުޑިޝަރީއަށް ނުފޫޒު ނުފޯރުވާ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހޮނިހިރު ދުވަހު ރައީސް އޮފީހުގައި ކުރިއަށް ގެންދާ ނޫސްވެރިންގެ ބައްދަލުވުމުގައި ރާއްޖެޓީވީގެ ނޫސްވެރިޔާ ވަނީ ސުޕްރީމް ކޯޓުގެ ތިން ފަނޑިޔާރުން ސަސްޕެންޑްކޮށް، ދުސްތޫރީ މައްސަލައެއް އެކޯޓަށް ނުބެލޭނެ ގޮތަށް ކޯޓު ޕެރަލައިޒް ކޮށްފައި އޮންނަތާ ގާތްގަނޑަކަށް 60 ދުވަހަށް ވުރެ ގިނަ ދުވަސްވެފައިވާކަން ފާހަގަ ކުރެއްވިއެވެ. ރައްޔިތުން މަޖިލީހުގެ ފުރިހަމަ ކޮންޓްރޯލާއި، ގާނޫނަށް ގެނެސްފައިވާ ބަދަލާއެކު މިނިވަން މުއައްސަސާތަކުގެ ރައީސުންނާއި، ނައިބު ރައީސް އައްޔަން ކުރެއްވުމުގެ ބާރު ވެސް އޮތީ ރައީސް މުއިއްޒުގެ އަތްޕުޅުގައި ކަމަށާއި، ޖޭއެސްސީގެ ކޮންޓްރޯލް އޮތީ ވެސް ރައީސް މުއިއްޒުގެ އަތްޕުޅުގައިކަން ފާހަގަ ކުރެއްވިއެވެ. އެހެންކަމުން މިހާރު ރާއްޖޭގައި އޮތީ ޑިމޮކްރެޓިކް ވެރިކަމެއްތޯ ނޫސްވެރިޔާ ސުވާލު ކުރެއްވިއެވެ.
މި ސުވާލަށް ރައީސް މުއިއްޒު ވިދާޅުވީ ޖޭއެސްސީއަކީ ކޮންޓްރޯލް ކުރާ ތަނެއް ނޫން ކަމަށާއި، ޖުޑިޝަރީގެ ތެރެއިން އެ ހިނގާ ކަންކަމަށް ޖަވާބު ދެމުންދާނީ ޖުޑިޝަރީން ކަމަށެވެ. އޭގައި އެމަނިކުފާނު ޒިންމާ ނަގަންޖެހޭ ކަމެއް ނޯންނާނެ ކަމަށް ވިދާޅުވިއެވެ. އަދި ރައީސްގެ ހައިސިއްޔަތުން އެކަހަލަ ކަމެއް ނުކުރައްވާނެ ކަމުގެ ޔަގީންކަން ރައީސް މުއިއްޒު ދެއްވިއެވެ.
ހުވާ ކުރި ދުވަހު ދެންނެވިން މިއަދުން ފެށިގެން މިހިދުން ފެށިގެން ޖުޑިޝަރީއަށް ސަރުކާރުން ނުފޫޒެއް ނުފޯރުވާނަމޭ. އެއީ ހަގީގަތް. އެގޮތަށް މިއަދާ ހަމައަށް ވެސް އޮތީ. އަދި ކުރިއަށް އޮތް ދުވަސްތަކުގައި ވެސް އޮންނާނީ . ދެން ތިބޭފުޅުންގެ އަމިއްލަ ޖަޖްމަންޓަކަށް ވެދާނެ ތިޔަ ވިދާޅުވި ގޮތަށް އަޅުގަނޑު ހުރިހާ ތަނެއް ކޮންޓްރޯލް ކުރަނީ އޭ. އަޅުގަނޑަށް މިއަދާ ހަމައަށް އައިރު ހަމަ ޔަގީނުން ވެސް އެއްވެސްތާކުން މައުލޫމާތެއް ވެސް ނުދޭ އަދި އަޅުގަނޑު ހޯދާފައި ވެސް ނުވާނެ ކޯޓުތަކުގައި ހިނގާ ކަންކަމެއް. ނޫސްތަކުން ހަމަ އެހެން މީހުންނަށް ވެސް ފެންނަ ގޮތަށް އަޅުގަނޑަށް ފެންނަނީ ކޯޓުތަކުގެ ކަންކަން ތާވަލް ކުރިއަށް ނުކުރިއަސް ކަމެއް ނިންމިއަސް ނުނިންމިއަސް. އަޅުގަނޑުގެ އެއްވެސް ޝައުގުވެރިކަމެއް ހުންނަ ކަމެއް ނޫން ކޯޓެއްގައި ޖުޑިޝަރީގައި ކަމެއް ހިނގާ ގޮތް ހިނގާނެ ގޮތެއް ވަކި ގޮތަކަށް ހިންގަން ބުނުން. ހިންގުވުން. އެހެންވީމަ އެއީ އަޅުގަނޑު ކުރާނެ ވެސް ކަމެއް ނޫން އެނގޭތޯ.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މިއީ ޑިމޮކްރެޓިކް ވެރިކަމެއްކަން ފާހަގަކުރައްވައި ރައީސް މުއިއްޒު ވިދާޅުވީ މި ސަރުކާރުގައި ކަންކަން ކުރަނީ ޑިމޮކްރަސީގެ ނިޒާމުގެ ތެރެއިން ކަމަށެވެ. އަދި އެބައެއްގެ ޒިންމާ އެބަޔަކު އަދާކުރުމުގެ ފުރިހަމަ މިނިވަންކަން އޮތްއިރު، މަގާމުތަކަށް މީހުން އިންތިޚާބުކުރަނީ ވެސް ރައްޔިތުން ކަމަށް އެމަނިކުފާނު ވިދާޅުވިއެވެ.
ހަމަ ޔަަގީނުން ވެސް ޑިމޮކްރެޓިކް ވެރިކަމެއް. އެއީ ރައްޔިތުންގެ ވޯޓަކުން ހުރިހާ އިލެކްޓިވް މަގާމުތަކަށް މީހުން ނަގަނީ ވެސް. ޑިމޮކްރަސީގެ ނިޒާމުގެ ތެރެއިން ފުރިހަމަ ބާރު މިއޮންނަނީ ރައްޔިތުންނަށް ވެސް އަދި މުއައްސަސާތަކަށް ވެސް މިގާނޫނު އަސާސީ ކަނޑައެޅިފައިވާ ބާރުގެ ތެރެއިން ފުރިހަމަ މިނިވަންކަން އެބައޮތް އެބޭފުޅުން ބޭނުންވެލައްވާ ގޮތަށް އެބޭފުޅުންގެ ޒިންމާތައް އަދާކުރުމުގައި. އެއަށް އެއްވެސް ހުރަހެއް ނާޅާނަން. ކުރިއަށް އޮތްތާގައި ވެސް ނާޅާނަން. މިހާތަނަކަށް ވެސް ނާޅަން. އެއީ މިނިވަން މުއައްސަސާއެއް ވިޔަސް އަދި މައިގަނޑު އަނެއް ދެ ބާރު ކަމުގައި ވިޔަސް. އެހެންވީމަ އެއްވެސް ހުރަހެއް ނެތް. އެއްވެސް ކަހަލަ ހިފެހެއްޓުމެއް އަޅުގަނޑުގެ ފަރާތުން ނާންނާނެ. އަޅުގަނޑު ގަބޫލުކުރާ ހަމައެއް ނޫން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒު ވިދާޅުވީ ޑިމޮކްރަސީ އޭގެ ފުރިހަމަ ގޮތުގައި ތަންފީޒު ކުރުމަކީ މިސަރުކާރުގެ ސިޔާސަތު ކަމަށެވެ.
ނަމަވެސް މެންބަރުން ވަކިކުރެވޭނެ ގޮތަށް މަޖިލީހުގެ ސުޕަރމެޖޯރިޓީ ބޭނުންކޮށްގެން ގާނޫނުއާސާސީ އަށް ގެނައި އިސްލާހުގެ މައްސަލަ ސުޕްރީމް ކޯޓުގައި ކުރިއަށްދަނިކޮށް، ރައީސް މުއިއްޒުގެ އެންގެވުމަށް ޖުޑީޝަލް ސަރވިސް ކޮމިޝަނުން ކުއްލި ބައްދަލުވުމެއް ބާއްވާ ސުޕްރީމް ކޯޓުގެ ތިން ފަނޑިޔާރަކު ސަސްޕެންޑް ކުރިއެވެ.
ސުޕްރީމް ކޯޓުގެ ފަނޑިޔާރު އަޒްމިރާލްދާ ޒާހިރާއި ހުސްނުއްސުއޫދާއި މަހާޒް އަލީ ޒާހިރު ސަސްޕެންޑު ކުރީ، މެންބަރުން ވަކިކުރެވޭ މައްސަލައިގައި ވަގުތީ އަމުރެއް ނެރެދިނުމަށް އެ ކޯޓަށް ހުށަހަޅައި މައްސަލައިގެ އަޑުއެހުމެއް ތާވަލުކޮށް ފަނޑިޔާރުން މާލަމުގައި ތިއްބަވަނިކޮށެވެ. ތިން ފަނޑިޔާރުން ސަސްޕެންޑް ކުރީ ޖޭއެސްސީން ކުއްލި ބައްދަލުވުމެއް ބާއްވާ 10 މިނެޓުގެ ތެރޭގައި ގޮތް ނިންމުމަށްފަހު 26 ފެބްރުއަރީ 2025 ގައެވެ.
އޭގެފަހުން 4 މާރޗް 2025 ވަނަ ދުވަހު ރައީސް މުއިއްޒު ގާނޫނު އަސާސީ އާ ޚިލާފުވެއްޖެ ކަމަށް ވިދާޅުވެ، ސުޕްރީމް ކޯޓުގެ ފަނޑިޔާރު ހުސްނުއްސުއޫދު ވަނީ އިސްތިއުފާ ދެއްވާފައެވެ. އަދި ޖޭއެސްސީން މިހާރު ބަލަމުން އަންނަނީ ފަނޑިޔާރު މަހާޒު އަލީ ޒާހިރުގެ އިތުރުން ޑރ. އަޒްމިރަލްދާ ޒާހިރުގެ މައްސަލައެވެ.
ސުޕްރީމް ކޯޓު މިހާރު އޮތްގޮތުން ދުސްތޫރީ މައްސަލައެއް ބެލޭނީ އެ ކޯޓުގެ ހުރިހާ ފަނޑިޔާރުން ހިމެނޭ ބެންޗަކުންނެވެ. އެއީ 7 ފަނޑިޔާރުންގެ ބެންޗުންނެވެ. ހުސްނުއްސުއޫދު އިސްތިއުފާ ދެއްވުމުން އޭނާގެ ބަދަލު އެ މަގާމަށް އަލްއުސްތާޛު ޙުސައިން ޝަހީދު ވަނީ އައްޔަން ކުރައްވާފައެވެ. އެހެންކަމުން މިހާރު ކޯޓުގައި ތިއްބެވީ 5 ފަނޑިޔާރުންނެވެ.
ސުޕްރީމް ކޯޓަށް ހުށަހެޅިފައިވާ ދުސްތޫރީ ބޮޑު މައްސަލައެއް ހުއްޓުވުމަށް ސަރުކާރުން ރާވައިގެން 3 ފަނޑިޔާރަކު ސަސްޕެންޑްކުރި އިރު، ޖޭއެސްސީގައި ހިމެނޭ ބާ ކައުންސިލްގެ މެންބަރު ވޯޓު ދެއްވި ގޮތާއި ގުޅޭގޮތުން ވެސް އެ ކައުންސިލްގައި ހިމެނޭ ގިނަ އަދަދެއްގެ ވަކީލުން ވަނީ ކަންބޮޑުވުން ފާޅުކުރައްވާފައެވެ.
