ފްލެކްސާ ބަލިކޮށް ހުރާ އަށް ފުރަތަމަ މޮޅު

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ފްލެކްސާ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ހުރާ ކޮމިއުނިޓީ ކުލަބުން ލީގުގެ ފުރަތަމަ މޮޅު ހޯދައިފި އެވެ.

ލީގުގައި ހުރާ އިން ކުޅުނު ފުރަތަމަ ދެ މެޗުގައި ވަނީ ކުލަބު ވެމްކޯ އަދި ގުޑް ގޭމްސް ސްޕޯޓްސް އެކަޑަމީ އަތުން ބަލިވެފަ އެވެ.

ފްލެކްސާ ވަނީ ފުރަތަމަ މެޗުގައި ޕޮލިސް ކުލަބު އަތުން ބަލިވި ނަމަވެސް، ދެ ވަނަ މެޗުގައި ކުލަބު ވެމްކޯގެ މައްޗަށް ކުރި ހޯދައިފަ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ބުދަ ދުވަހުގެ ރޭ ކުޅުނު މެޗު ހުރާ އިން ކާމިޔާބު ކުރީ ތިން ސެޓު އެއް ސެޓުންނެވެ.

މެޗުގެ ފުރަތަމަ ސެޓު ހުރާ އިން ކާމިޔާބު ކޮށްފައި ވަނީ 25-18 އިންނެވެ. ނަމަވެސް ފްލެކްސާ އިން ވަނީ 22-25 އިން ދެ ވަނަ ސެޓު ކާމިޔާބުކޮށް، ސެޓުގެ ގޮތުން ހަމަހަމަ ކޮށްފަ އެވެ.

ނަމަވެސް، ޖެހިގެން ކުޅުނު ދެ ސެޓު ވެސް ކާމިޔާބުކޮށް، ހުރާ ވަނީ މެޗުން މޮޅުވެފަ އެވެ. މެޗުގެ ތިން ސެޓު ހުރާ އިން ކާމިޔާބު ކުރީ 25-21 އިންނެވެ. އަދި ހަތަރު ވަނަ ސެޓު ކާމިޔާބު ކުރީ 25-18 އިންނެވެ.

މެޗުގެ މޮޅު ކުޅުންތެރިޔަކަށް ހޮވުނީ ހުރާގެ ބިދޭސީ ކުޅުންތެރިޔާ ވެރޮނިކާ ޒުބަރޭވާ އެވެ.

ލީގުގައި ހުރާގެ ހަތަރު ވަނަ މެޗުގައި ނިކުންނާނީ ޕޮލިސް ކުލަބާ ދެކޮޅަށެވެ. އަދ ފްލެކްސާގެ ހަތަރު ވަނަ މެޗުގައި އެ ޓީމު ނިކުންނާނީ ސިޓީ ފްރެންޑްސް ކުލަބާ ދެކޮޅަށެވެ.