މުޅި ރާއްޖެ ޝާމިލު ކުރުމަށް އެފްއޭއެމްގެ އަސާސީ ޤަވައިދަށް އިސްލާހު ހުށަހަޅައިފި
ޓީސީ އިސްވެ އޮވެ އެ އިސްލާހުތައް ހުށަހެޅިއިރު، އެފްއޭއެމްގެ މިހާރު މެމްބަރު 17 ކުލަބުގެ ތެރެއިން 10 ކުލަބަކުން ސޮއި ކޮށްފައިވާ ކަމަށް ވެސް ޓޮމް ވަނީ ވިދާޅުވެފަ އެވެ.
ގޯލްޑް ކަޕް ފުޓުބޯޅަ މުބާރާތުގައި ކުޅުނު މެޗެއްގެ ތެރެއިން
މުޅި ރާއްޖެ ޝާމިލުވާ ގޮތަށް ލީގު އުސޫލު ބަދަލު ކުރުމަށް، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ އަސާސީ ޤަވައިދަށް އިސްލާހު ހުށަހަޅައިފި އެވެ.
މެއި މަހުގެ ތެރޭގައި އޮންނަ އެފްއޭއެމްގެ ކޮންގްރެސްއާ ދިމާކޮށް، އެފްއޭއެމްގެ އަަސާސީ ޤަވާއިދަށް އިސްލާޙު ގެނައުމަށް ހުށަހެޅީ ޓީސީ ސްޕޯޓްސް ކުލަބުންނެވެ.
އެކަން ހާމަ ކުރަމުން އެފްއޭއެމްގެ ކުރީގެ ރައީސް އަޙުމަދު ޠާރިޤު (ޓޮމް) ވިދާޅުވީ، ރާއްޖޭގެ ހަތަރު ސަރަހައްދެއްގައި ރީޖަނަލް އެސޯސިއޭޝަންތައް ޤާއިމު ކުރުމާއި، އެ ހަތަރު ސަރަަހައްދުގެ ކުލަބުތަކުން ރާއްޖޭގެ ފުޓުބޯޅައިގެ ކަންކަން ނިންމުމުގައި ބަސް ބުނެ، އަދި ވޯޓު ލެވޭނެ ޙައްޤު ކަށަވަރު ކުރުމުގެ ގޮތުން އެފްއޭއެމްގެ އަސާސީ ޤަވާއިދަށް އިސްލާހު ހުށަހަޅާފައިވާ ކަމަށެވެ.
ޓީސީ އިސްވެ އޮވެ އެ އިސްލާހުތައް ހުށަހެޅިއިރު، އެފްއޭއެމްގެ މިހާރު މެމްބަރު 17 ކުލަބުގެ ތެރެއިން 10 ކުލަބަކުން ސޮއި ކޮށްފައިވާ ކަމަށް ވެސް ޓޮމް ވަނީ ވިދާޅުވެފަ އެވެ.
އަސާސީ ޤަވާއިދަށް ހުށަހަޅާފައިވާ އިސްލާހުގެ ދަށުން ޤާއިމު ކުރަން ހުށަހަޅާފައި ަވަނީ ހަތަރު ރީޖަނަލް އެސޯސިއޭޝަން އެކެވެ.
އެއީ،
- ނޯތު ރީޖަނަލް ފުޓްބޯޅަ އެސޯސިއޭޝަން އޮފް މޯލްޑިވްސް (ހއ، ހދ، ށ، ނ، ރ، ބ، ޅ، ކުޅުދުއްދުށި ސިޓީ)
- ސެންޓްރަލް ރީޖަނަލް ފުޓްބޯޅަ އެސޯސިއޭޝަން އޮފް މޯލްޑިވްސް (ކ، އއ، އދ ،ވ، މ، ފ، އަދި ދ)
- މާލެ ރީޖަނަލް ފުޓްބޯލަ އެސޯސިއޭޝަން އޮފް މޯލްޑިވްސް (މާލެ ސިޓީ ކުލަބުތައް، ދެ ވަނަ ޑިވިޝަން އަދި ތިން ވަނަ ޑިވިޝަން)
- ސައުތު ރީޖަނަލް ފުޓްބޯޅަ އެސޯސިއޭޝަން އޮފް މޯލްޑިވްސް (ތ، ލ، ގއ، ގދ، ތިނަދޫ ސިޓީ، ފުވައްމުލައް ސިޓީ، އައްޑޫ ސިޓީ)
މި އިސްލާޙާ އެކު ވޯޓު ލުމުގެ ޙައްގު 64 ފަރާތަކަށް ލިބިގެން ދާނެ އެވެ. އެއީ ނީތު ރީޖަން އިން 11 ވޯޓު، ސެންޓްރަލް ރީޖަްނ އިން 11 ވޯޓު، މާލެ ރީޖަން އިން 11 ވޯޓު، ސައުތު ރީޖަން އިން 11 ވޯޓި އަދި ދިވެހި ޕްރިމިއާ ލީގުން 20 ވޯޓެވެ.
ޓީސީން ހުށަހަޅާފައިވާ އެ އިސްލާޙުގައި ބުނެފައި ވަނީ މަދުވެގެން 12 މަސް ދުވަހުގެ ތެރޭގައި ރީޖަނަލް އެސޯސިއޭޝަންތައް އުފައްދަން ޖެހޭނެ ކަމަށެވެ. އަދި އެންމެ ގިނަ ވެގެން ވެސް 24 މަސް ދުވަހުގެ ތެރޭގައި ރީޖަނަލް ލީގު ތަކުން ދިވެހި ޕްރިމިއަރ ލީގަށް ޕްރޮމޯޓުވާނެ ގޮތާއި، ރެލިގޭޓު ވާނެ ގޮތަށް ލީގުގެ އުސޫލު އެކުލަވާލަން ޖެހޭނެ އެވެ.
މީގެ އިތުރުން އެފްއޭއެމް މުބާރަތްތަކުގައި ޖެހި ޖެހިގެން ފަސް އަހަރު ކުޅުމުން މެންބަޝިޕް ދިނުމަށް އޮތް މާއްދާ، ޖެހި ޖެހިގެން ތިން އަހަރު ކުޅުމުން މެންބަރޝިޕް ދޭ ގޮތަށް ބަދަލުކުރަން ވެސް ވަނީ ހުށަހަޅައިފަ އެވެ.
އެފްއޭއެމްގެ ހިންގާ ޤަވާއިދަށް ހުށަހަޅާފައިވާ މި އިސްލާހު ތަކަކީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ވެސް ވަރަށް ބޮޑަށް ބޭނުންވާ އިސްލާހުތަކެކެވެ.
