ޗިޓްގައި ސޮއި ކޮށްފައި ވަނީ ގާސިމްގެ މައްސަލަ ބެއްލެވި ގާޒީއެއް ނޫން: މޫސާ ސިރާޖް
އެ ޗިޓުގައި ސޮއި ކޮށްފައިވަނީ އަލީ އާދަމް ކަމަށް ސިރާޖް ވިދާޅުވި
ގާނޫނީ ވަކީލު މޫސާ ސިރާޖް
ޖުމްހޫރީ ޕާޓީގެ ލީޑަރ ގާސިމް އިބްރާހިމަށް ބުރާސްފަތިދުވަހުގެރޭ ދަންވަރު ހުކުމްކޮށްފައި ވަނީ އޭނާގެ މައްސަލަ ބެއްލެވި ގާޒީ ނޫން ކަމަށާއި އެކަން އެގޮތަށް ނުކުރެއްވޭނެ ކަމަށް ކުރީގެ ނައިބު ރައީސް އަހުމަދު އަދީބުގެ ލޯޔަރު މޫސާ ސިރާޖް ވިދާޅުވެއްޖެއެވެ.
ގާސިމް އިބްރާހިމްއަށް ހުކުމް ކުރުމާ ގުޅިގެން ސިރާޖު ކުރެއްވި ޓްވީޓްގައި ވިދާޅުވީ ބުރާސްފަތި ދުވަހުގެ ރޭ ޗިޓުގައި ސޮއިކުރައްވާފައި ވަނީ މައްސަލަ ބެލި ގާޒީ އާދަމް އާރިފް ނޫން ކަމަށެވެ. އެ ޗިޓުގައި ސޮއި ކުރައްވާފައި ވަނީ އަލީ އާދަމް ކަމަށާއި އެކަން އެގޮތަށް ނުކުރެވޭނެ ކަމަށް ސިރާޖް ވަނީ ވިދާޅުވެފައެވެ.
ސިރާޖް ވަނީ ގާސިމް ކޯޓަށް ހާޒިރުވުމަށް އެންގި ޗިޓްތައް ޓްވީޓާ އެކު އެޓޭޗްކުރައްވާފައެވެ.
ސިރާޖް ކުރައްވާފައިވާ އެހެން ޓްވީޓެއްގައި ވިދާޅުވައި ވަނީ އާދަމް އާރީފް ރެކޯޑް މުގުރާލައިފި ކަމަށާއި ފެހި ގާނޫނު އަސާސީގެ ދަށުން ފުތަރަމަ ފަހަރަށް ޖިނާއީ މައްސަލައެއްގައި ޣައިރު ހާޒިރުގައި ގާސިމް ޖަލަށް ލުމަށް ހުކުމްކޮށްފި ކަމަށެވެ.
ރިޝްވަތު ހުށަހެޅުމުގެ ކުށުގައި ގާސިމްގެ މައްޗަށް 3 އަހަރާއި ދެ މަހާއި 12 ދުވަހަށް ޖަލަށް ހުކުމްކޮށްފައި ވަނީ ގާސިމަށް އައިޖީއެމްއެޗްގައި ފަރުވާ ދެމުން ގެންދަނިކޮށެވެ.
