މިހާރު ކުރިއަށްދާ ޤައުމީ ވޮލީ ބޯޅަ ލީގުގުގައި ޕޮލިސް ކުލަބުން ކުޅުނު ދެ ވަނަ މެޗުގައި، ސިޓީ ފްރެންޑްސް ކުލަބުގެ މައްޗަށް ވެސް ކުރި ހޯދައިފި އެވެ.

ލީގުގެ ފުރަތަމަ މެޗުގައި ޕޮލިސް ކުލަބުން ވަނީ ފްލެކްސާ ސްޕޯޓްސް ކުލަބުގެ މައްޗަށް ވެސް ކުރި ހޯދައިފަ އެވެ. އެ މެޗު ޕޮލިސް ކުލަބުން ކާމިޔާބު ކުރީ ތިން ސެޓު އެއް ސެޓުންނެވެ.

ހޯމަ ދުވަހުގެ ހަވީރު ޒުވާނުންގެ މަރުކަޒުގެ އެތެރޭ ކޯޓުގައި ސިޓީ ފްރެންޑްސްއާ ދެކޮޅަށް ކުޅުނު މެޗު ޕޮލިސް ކުލަބުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް ޕޮލިސް ކުލަބުން ކާމިޔާބު ކުރީ 26-24، 25-20 އަދި 25-15 އިންނެވެ.

މެޗުގެ މޮޅު ކުޅުންތެރިޔަކަށް ހޮވުނީ ޕޮލިސް ކުލަބުގެ ބިދޭސީ ކުޅުންތެރިޔާ ސޯފިއާ ގްރެކާ އެވެ.

ލީގުގައި ޕޮލިސް ކުލަބުގެ ތިން ވަނަ މެޗުގައި ނިކުންނާނީ ހުރާ ކޮމިއުނިޓީ ކުލަބާ ދެކޮޅަށެވެ.